ماۋلەن اشىمبايەۆ سيفرلاندىرۋعا بولىنگەن اقشانىڭ ءتيىمسىز يگەرىلەتىنىن سىنادى

استانا. KAZINFORM - سەناتتىڭ جالپى وتىرىسىندا سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆتىڭ سيفرلاندىرۋ سالاسىنداعى جەتىستىكتەر تۋرالى بايانداما وقىعان.

پالاتا ءتوراعاسى ماۋلەن اشىمبايەۆ باياندامادا ايتىلعان كورسەتكىشتەر قازاقستاندىقتاردىڭ ناقتى ءومىر دەڭگەيىمەن سايكەسپەيتىنىن سىنادى.

«سيفرلاندىرۋدىڭ ارقاسىندا ينۆەستيتسيا ارتتى ما؟ بازالىق تۇرعىدا قاراساق، ينۆەستيتسيا كولەمى قۇلدىراپ بارادى. سولاي ەمەس پە؟ پرەزيدەنت تاپسىرماسى بويىنشا ەكونوميكالىق ءوسىمدى 6 پايىزعا جەتكىزە الدىق پا؟ جەتكىزگەن جوقپىز. الەۋمەتتىك شىعىنداردى قىسقارتتىق پا؟ جوق، الەۋمەتتىك شىعىندار ارتىپ جاتىر. اۋىلعا ساپالى ينتەرنەت تارتتىق پا؟ جوق، تارتقان جوقپىز. ساراپتاپ قاراساق، ءسىز ايتقان قۇرعاق سيفرلاردىڭ كەرەگى نە»، - دەدى سەنات سپيكەرى.

سونداي-اق، ول سالاعا بولىنگەن اقشانىڭ ءتيىمدى يگەرىلىپ جاتقانىنا كۇمان كوپ بولۋى ورىندى ەكەنىن ايتتى.

«تەك ءسىزدىڭ مينيسترلىك بويىنشا عانا قاراساق تا قوماقتى قارجى بولىنگەن. ونىڭ سىرتىندا اكىمدىكتەر، وزگە مينيسترلىكتەر، ۇلتتىق كومپانيالار قاراجات جۇمسايدى. سيفرلاندىرۋعا، ونىڭ قۇرالدارىن ساتىپ الۋعا كەتكەن قاراجاتتىڭ ءبارىن ينتەگراتسيالاساق، رەسپۋبليكالىق بيۋجەتتىڭ قوماقتى بولىگىن الىپ جاتىر. وسى اقشانىڭ ءبارىن قانشالىقتى ءتيىمدى يگەرىپ جاتىرمىز دەگەن سۇراق زاڭدى دەپ ويلايمىن»، - دەدى سەنات ءتوراعاسى.

مينيستر سالاعا بولىنگەن قاراجاتتىڭ ەسەبىنەن، Astana hub ورتالىعىنىڭ مول جەتىستىككە جەتىپ جاتقانىن، IT قىزمەتتەر ەكسپورتىنىڭ وسكەنىن، «ەلەكتروندى ۇكىمەت» جوباسىنىڭ جەمىستى ىسكە اسقانىن ەسكە سالدى.

«جالپى، ءبىز تسيفرلاندىرۋعا قىرۋار قارجى قۇيىلىپ جاتقانىن جوققا شىعارمايمىز. ءبىراق ءبىز جۇرگىزگەن ۇزاق مەرزىمدى ساياساتقا كوز جۇگىرتسەك، نەگىزى بۇل ينۆەستيتسيالاردىڭ ءوز پايداسىن بەرە باستاعانىن كورىپ وتىرمىز. مەن ءوز باياندامامدا نەبارى 4-5 جىلدىڭ ىشىندە ەكسپورتتىڭ جىلدىق كولەمى 30 ميلليوننان 500 ميلليون دوللارعا دەيىن وسكەنىن ايتتىم. مىنە، بۇل ەكسپورتتىق كىرىستى ءارتاراپتاندىرۋعا ناقتى ۇلەس بولىپ ەسەپتەلەدى»، - دەدى جاسلان ماديەۆ.