ماۋلەن اشىمبايەۆ: ەگەمەندىك - ءبىزدىڭ ەڭ باستى قۇندىلىعىمىز

سەنات ءتوراعاسى ماۋلەن اشىمبايەۆ قازاقستان حالقىن تاۋەلسىزدىك كۇنىمەن قۇتتىقتادى، دەپ حابارلايدى Kazinform.

«بارشاڭىزدى تاۋەلسىزدىك كۇنىمەن شىن جۇرەكتەن قۇتتىقتايمىن! تاۋەلسىزدىك كۇنى - مەملەكەتتىلىكتى نىعايتاتىن، وتانشىلدىقتى ارتتىراتىن جانە ۇلتتى ۇيىستىراتىن ايشىقتى مەرەكە. سوندىقتان بۇل داتانىڭ ماڭىزى زور، ءمانى ەرەكشە. ەگەمەندىك - ءبىزدىڭ ەڭ باستى قۇندىلىعىمىز. تاۋەلسىزدىككە وڭايلىقپەن قول جەتكىزبەگەنىمىز انىق. سول سەبەپتى بۇگىنگىدەي قاستەرلى مەرەكەدە ءبىز ازاتتىق جولىندا باسىن بايگەگە تىككەن ارىستارىمىز بەن ەركىندىك ءۇشىن ەتىگىمەن سۋ كەشكەن اعا بۋىننىڭ رۋحىنا تاعزىم ەتەمىز. ولاردىڭ عيبراتتى عۇمىرى مەن ەڭسەلى ەلدىككە باستاعان باتىل قادامدارىن كەڭىنەن دارىپتەيمىز. بۇل - تاۋتۇلعالارىمىزدى ماڭگى جادىمىزدا ساقتاۋ جانە تاۋەلسىزدىكتىڭ ءقادىرىن جەتە ءتۇسىنۋ ءۇشىن اسا ماڭىزدى»، - دەپ جازدى ماۋلەن اشىمبايەۆ Facebook-تەگى پاراقشاسىندا.

سەنات ءتوراعاسى قازىرگى تاڭدا پرەزيدەنت قاسىم-جومارت توقايەۆتىڭ باستاماسىمەن ەلىمىزدە اۋقىمدى رەفورمالار ىسكە اسىرىلىپ جاتقانىن اتاپ ءوتتى. ونىڭ ءبارى تاۋەلسىزدىكتى ساقتاۋ، قازاقستاندى ءوسىپ- وركەندەگەن، دامىعان ەلگە اينالدىرۋ جانە ادىلەتتىلىك سالتانات قۇرعان مەملەكەت قالىپتاستىرۋ سياقتى ماڭىزدى مىندەتتەرگە تابان تىرەيدى.

«وسى جولدا ءبارىمىز جۇدىرىقتاي جۇمىلا بىلسەك، شىن مانىندە، ەلدىگىمىزدىڭ ىرگەسى بەكەمدەلىپ، ەڭسەسى بيىكتەي تۇسەدى. بارشاڭىزدى مەرەكەمەن قۇتتىقتاي وتىرىپ، ءار شاڭىراققا شاتتىق، ەلىمىزگە اماندىق، جەرىمىزگە تىنىشتىق تىلەيمىن! تاۋەلسىزدىگىمىز تۇعىرلى بولىپ، رۋحىمىز اسقاقتاي بەرسىن!» - دەدى سەنات ءتوراعاسى.

اۆتور

ەلميرا ورالبايەۆا