ماۋلەن اشىمبايەۆ جاس ءدىني كوشباسشىلاردى جالعان اقپاراتپەن بەلسەندى كۇرەسۋگە شاقىردى

استانا. KAZINFORM - سەنات ءتوراعاسى، الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمبايەۆ جاس ءدىني كوشباسشىلار فورۋمىنا الەمنىڭ 30-دان استام ەلىنەن كەلگەن جاس ءدىني كوشباسشىلار جينالعانىن ايتتى.

«ءبىز بۇگىن وسى الاڭدا قازىرگى تاڭدا بۇكىل الەمدى الاڭداتىپ وتىرعان وزەكتى ماسەلەلەردى تالقىلايمىز. بۇل باستاما جاس ليدەرلەر اراسىندا جان- جاقتى ديالوگ قالىپتاستىراتىن جانە قازىرگى سىن- قاتەرلەردى بىرلەسىپ ەڭسەرەتىن جاڭا مۇمكىندىكتەرگە جول اشاتىن بىرەگەي پلاتفورماعا اينالادى دەپ ۇمىتتەنەمىز. بۇگىنگى سيفرلىق عاسىردا جالعان جاڭالىقتار مەن بۇرمالانعان اقپاراتتىڭ تارالۋى تۇراقتىلىق پەن بەيبىتشىلىككە ۇلكەن قاۋىپ ءتوندىرىپ تۇر. ول شىندىقتى بۇرمالاپ، دۇشپاندىق پەن وشپەندىلىك تۋدىرادى. سىزدەر ءوز سالاڭىزدىڭ كوشباسشىسى رەتىندە شىنايى اقپاراتتى عانا ىلگەرىلەتىپ، سىني ويلاۋ ۇلگىسىن كورسەتۋ ارقىلى قوعام ساناسىنا مانيپۋلياتسيا جاساۋ ارەكەتتەرىنە قارسى تۇرا الاسىزدار»، - دەدى ول.

سەنات سپيكەرى جاس ءدىني كوشباسشىلاردىڭ حالىققا شىندىقتى وتىرىكتەن اجىراتۋعا كومەكتەسىپ، جالعان اقپارات پەن زياندى ناسيحاتقا توزبەۋشىلىكتى ارتتىرۋى وتە ماڭىزدى ەكەنىن اتاپ ءوتتى.

«ءبىلىم - كەدەيلىك پەن تەڭسىزدىكتى جەڭۋدىڭ نەگىزگى فاكتورى. بۇل - بارشانىڭ گۇلدەنۋى مەن دامۋىنىڭ قاينار كوزى. مەن سىزدەردى بالالار مەن جاستاردىڭ ساپالى بىلىمگە قول جەتكىزۋىن جاقسارتۋعا باعىتتالعان ءبىلىم بەرۋ باعدارلامالارىنا بەلسەندى قاتىسۋعا شاقىرامىن. ينكليۋزيۆتى ءبىلىم بەرۋدى قولداۋ جانە بارلىق الەۋمەتتىك توپتارداعى ادامدارعا تەڭ مۇمكىندىكتەردى قامتاماسىز ەتۋ وتە ماڭىزدى»، - دەدى ماۋلەن اشىمبايەۆ.

ايتا كەتەيىك، اتالمىش فورۋم بيىل العاش رەت ۇيىمداستىرىلىپ وتىر.