مال ساتقاندا نوقتاسىنا بەكەم بول

استانا. قازاقپارات - قازاقتا «مالدىڭ كيەسى نوقتاسىندا» دەگەن ىرىم بار. سەبەبى، ءىرى قارانىڭ پىرلەرى نوقتادا وتىرادى دەپ تۇسىنەدى. سوندىقتان مالدى ساتقاندا نوقتاسىن قوسا بەرمەيدى. ءتىپتى ءيتتى ساتقاندا دا «باسىنداعى قارعىباۋىن بەرمە» دەپ ايتادى. ءۇيدىڭ كيەسى ءيتتىڭ قارعىباۋىنا دا قوناقتاۋى مۇمكىن. بۇل جايىندا ەل اۋزىندا ساقتالعان كوپتەگەن تىيىم اڭىزدار مەن ىرىمدار دا بار.

ەرتەدە سىر بويىندا ەلتاي دەگەن ادام بولىپتى. وعان اكەسىنەن مۇراعا بەس ءۇيىر جىلقى قالادى. ەلتاي بازارعا ءبىر-ەكى جىلقىسىن اپارىپ، ازىق-تۇلىككە ايىرباستاماق بولادى. جىلقىسى قىمبات باعالانعانىنا قۋانىپ، نوقتاسىن قوسىپ بەرەدى.

سودان باستاپ ەلتايدىڭ داۋلەتى كەمي تۇسەدى. جىلقىلارى ازايىپ، ۇرى مەن قاسقىردىڭ جەمىنە اينالادى. ونان قالسا، سىرەسپە اۋرۋىنا ۇشىراپ، جوق بولادى. ەلتاي تاقىر كەدەيگە اينالادى.

باسىنداعى باقىتسىز كۇيى تۋرالى اۋىلداعى ءبىر قارت مۇڭ شاعادى. سوندا قارت:

- ءاي، بالام-اي! مالدىڭ كيەسى نوقتادا بولادى. مال ساتقاندا باس جىبىمەن بەرمەيتىن ەدى. ادام ءۇشىن باس كيىم قانشالىقتى قاسيەتتى بولسا، مال ءۇشىن دە نوقتا ءجىبى سونشالىقتى قاستەرلى. باق تا، ىرىس تا كوشپەلى التىن ءتارىزدى. باعالاي بىلمەگەن ادامنىڭ قولىنان تەز شىعىپ، كەتىپ قالادى، - دەگەن ەكەن.

مالىمەت «وتباسى حرەستوماتياسى. سالت-ءداستۇر سويلەيدى» كىتابىنان الىندى.