ماكرون فرانسيانىڭ جاڭا پرەمەر-ءمينيسترىن تاعايىندادى

استانا. KAZINFORM - فرانسيا پرەزيدەنتى ەممانۋەل ماكرون ورتالىق وڭشىل ساياساتكەر ميشەل بارنەنى پرەمەر- مينيستر ەتىپ تاعايىنداپ، وعان ۇكىمەت قۇرۋدى تاپسىردى، دەپ جازادى BBC.

بارنە ۇكىمەتى 30-ماۋسىم مەن 7-شىلدە ارالىعىندا وتكەن سايلاۋدان كەيىن پارلامەنت مۇشەلەرىنىڭ سەنىمىنە يە بولا ما، جوق پا - ازىرگە بەلگىسىز.

73 جاستاعى بارنە - فرانسياداعى كونسەرۆاتيۆتى رەسپۋبليكاشىلدار (LR) پارتياسىنىڭ ارداگەرى.

ول سونداي-اق ەۋروپالىق وداق قۇرىلىمدارىندا جۇمىس ىستەگەن جانە 2016-2019 -جىلدارى ۇلى بريتانيانىڭ ە و-دان شىعۋ شارتتارى بويىنشا كەلىسسوزدەرگە جەتەكشىلىك ەتكەنىمەن تانىمال.

ماكرون كەزەكتەن تىس سايلاۋدان ەكى اي وتكەن سوڭ پرەمەر-ءمينيستردى تاعايىنداۋعا ءماجبۇر بولدى، ويتكەنى ءوزىنىڭ تسەنتريستىك اليانسى پارلامەنتتەگى ورنىنان ايىرىلدى، ال وڭشىل «ۇلتتىق بىرلەستىك» مارين لە پەن مەن سولشىل پارتيالار اليانسى ابسوليۋتتى كوپشىلىك داۋىسىنا يە بولا المادى جانە ۇكىمەتتى ءوز بەتىنشە قۇرا المادى.

پارلامەنتتە 2025 -جىلعا ارنالعان بيۋدجەتتى تالقىلاۋ كۇنى جاقىنداپ كەلەدى. ول قازان ايىندا باستالۋى ءتيىس. ال سايلاۋدان كەيىن قالىپتاسقان تىعىرىقتان شىعۋ قاجەتتىگى كۇشەيىپ كەلەدى.

ماكرون تۇراقتى ۇكىمەتكە كەپىلدىك بەرەتىن جوعارى قولداۋعا يە ادام ىزدەپ، پرەمەر- مينيستر لاۋازىمىنا بىرنەشە كانديداتتى قاراستىردى.

ماكرون كەڭسەسى بارنەنىڭ پرەمەر-مينيستر بولىپ تاعايىندالعانىن جاريالاعان مالىمدەمەسىندە وعان «ەلگە جانە فرانتسۋز حالقىنا قىزمەت ەتەتىن بىرىكتىرۋشى ۇكىمەت قۇرۋ» مىندەتى جۇكتەلگەنى ايتىلعان.