ماكرون: گازا بەيبىت تۇرعىندارى شەككەن ازاپ اياقتالۋى ءتيىس

پاريج. KAZINFORM - فرانسيا باسشىسى گۋمانيتارلىق كومەكتى جەتكىزۋ ءۇشىن وتكىزۋ بەكەتتەرىن اشۋعا شاقىردى، دەپ جازدى انادولى.

گازا سەكتورىنداعى بەيبىت تۇرعىنداردىڭ شەككەن ازابى توقتاۋى ءتيىس. بۇل تۋرالى فرانسيا پرەزيدەنتى ەممانۋەل ماكرون يزرايل پرەمەر- ءمينيسترى بينيامين نەتانياحۋمەن تەلەفون ارقىلى سويلەسۋ بارىسىندا ايتتى.

ماكرون ءوزىنىڭ X (بۇرىنعى Twitter) پلاتفورماسىنداعى مالىمدەمەسىندە نەتانياحۋمەن تەلەفون ارقىلى سويلەسكەنىن حابارلادى.

ول فرانسيانىڭ يزرايل مەن ونىڭ ازاماتتارىنىڭ قاۋىپسىزدىگىن قولدايتىنىن راستادى، ءبىراق: «حاماس- تى قارۋسىزداندىرۋ - ماڭىزدى باسىمدىق، ءدال سول سەكىلدى بارلىق تۇتقىنداردى بوساتۋ دا ماڭىزدى»، - دەپ اتاپ ءوتتى.

ماكروننىڭ ايتۋىنشا، تۇتقىنداردى بوساتۋدىڭ جالعىز جولى - وق اتۋدى توقتاتۋ.

فرانسيا پرەزيدەنتى گۋمانيتارلىق كومەك جەتكىزۋ ءۇشىن بارلىق وتكىزۋ بەكەتتەرىن اشۋدىڭ بەيبىت تۇرعىندار ءۇشىن ومىرلىك ماڭىزى بار ەكەنىن دە ايتتى.

- مەن ءوز باسىم ەگيپەتتەگى ەل-اريش قالاسىندا گۋمانيتارلىق كومەكتىڭ شەكارانىڭ ەكىنشى جاعىندا بوگەلىپ تۇرعانىن كوردىم. بۇل كومەك مۇمكىندىگىنشە تەز جەتۋى ءتيىس. گازا تۇرعىندارىنىڭ ازاپ شەگۋى توقتاۋ كەرەك، - دەدى ماكرون.

سونداي-اق، ول بۇل ايماققا شۇعىل تۇردە بەيبىتشىلىك قاجەت ەكەنىن اتاپ ءوتتى.

اڭگىمە يزرايل پرەمەر-ءمينيسترىنىڭ ۇلى ياير نەتانياحۋدىڭ فرانسيا پرەزيدەنتىنە قاتىستى ايتقان قورلاۋ سيپاتىنداعى سوزدەرىنەن كەيىن تۋىنداعان جانجال اياسىندا ءوربىدى.

ماكرون پالەستينانى مويىنداۋ مۇمكىندىگىن ايتتى.

بۇعان دەيىن ەگيپەتكە جاساعان ەكى كۇندىك ساپاردان كەيىن France 5 تەلەارناسىنا بەرگەن سۇحباتىندا ماكرون:

فرانسيا پالەستينانى مويىنداۋ باعىتىنا قاراي جىلجۋى كەرەك، ءارى بۇل الداعى ايلاردا جۇزەگە اسۋى مۇمكىن ەكەنىن جەتكىزدى.

ول بۇل قادامدى ساۋد ارابياسىمەن بىرلەسىپ وتكىزىلەتىن ەكى مەملەكەت قاعيداتى بويىنشا حالىقارالىق كونفەرەنتسيا اياسىندا ىسكە اسىرۋعا نيەتتى ەكەنىن ايتتى.

2023 -جىلعى 7- قازاندا ءيزرايلدىڭ گازاعا جاساعان شابۋىلىنان بەرى يسپانيا، نورۆەگيا، يرلانديا، سلوۆەنيا، ارمەنيا، باگام ارالدارى، ترينيداد جانە توباگو، يامايكا جانە باربادوس سىندى ەلدەر پالەستينانى رەسمي تۇردە مويىندادى. وسىلايشا، پالەستينانى مويىنداعان ەلدەردىڭ سانى 146-عا جەتتى.

يزرايل پرەمەر-ءمينيسترىنىڭ ۇلى ياير نەتانياحۋ ماكروننىڭ پالەستينانى مويىنداۋ تۋرالى مالىمدەمەسىنە X جەلىسىندە قاتقىل رەاكسيا ءبىلدىرىپ، «توزاققا ءتۇس!» دەپ جازعان ەدى.

ەسكە سالا كەتەيىك، بۇعان دەيىن ماكرون «پالەستينانى مەملەكەت رەتىندە مويىنداۋىمىز ابدەن مۇمكىن» دەپ مالىمدەمە جاساعانىن جازعان بولاتىنبىز.