ماجىلىسكە تۇركيا ۇلى ۇلتتىق ءماجىلىسىنىڭ ءتوراعاسى كەلدى

استانا. KAZINFORM - ءماجىلىس سپيكەرى ەرلان قوشانوۆ قازاقستانعا رەسمي ساپارمەن كەلگەن تۇرىك رەسپۋبليكاسى ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋشپەن كەزدەستى.

ەرلان قوشانوۆ قازاقستان مەن تۇركيانى عاسىرلار بويى ورتاق رۋحاني جانە مادەني قۇندىلىقتار بىرىكتىرىپ كەلە جاتقانىن اتاپ ءوتتى.

- ەكى ەل باسشىلارىنىڭ بەرىك دوستىعى، ۇندەسكەن ساياساتى قازاق-تۇرىك قارىم-قاتىناسىن جاڭا بەلەسكە كوتەرۋگە ەرەكشە قارقىن بەرۋدە. ءبىزدىڭ پرەزيدەنتتەرىمىزدىڭ تۇراقتى كەزدەسۋلەرى - وسىنىڭ ايقىن دالەلى. ءبىز پارلامەنت تاراپىنان جوعارى دەڭگەيدە قول جەتكىزىلگەن بارلىق ۋاعدالاستىقتاردى ىسكە اسىرۋ ءۇشىن قولدان كەلگەننىڭ ءبارىن جاسايمىز، - دەدى ءماجىلىس ءتوراعاسى.

ەرلان قوشانوۆ تۇرىك ارىپتەستەرىنە قاسىم-جومارت توقايەۆتىڭ باسشىلىعىمەن ەلىمىزدە جۇرگىزىلىپ جاتقان ەكونوميكالىق، ساياسي رەفورمالار تۋرالى ايتىپ بەردى.

ول بۇگىندە قازاقستاندا مەملەكەتتىك بيلىكتىڭ بارلىق تارماعىن تەپە-تەڭدىكتە ۇستايتىن جاڭا ساياسي جۇيە قالىپتاسىپ كەلە جاتقانىن اتاپ ءوتتى.

پالاتا ءتوراعاسى مەملەكەت باسشىسىنىڭ 2029-جىلعا قاراي ەكونوميكانىڭ ەكى ەسە ءوسۋىن كوزدەيتىن جاڭا ەكونوميكالىق ساياساتى تۋرالى دا ايتتى.

مارتەبەلى مەيماندارعا ءماجىلىستىڭ زاڭ شىعارۋ قىزمەتى تۋرالى اقپارات بەرىلدى. تاراپتار ەكى ەل دەپۋتاتتارى دوستىق توپتارىنىڭ جۇمىسى تۋرالى دا پىكىر الماستى.

ءوز كەزەگىندە نۋمان كۋرتۋلمۋشتۇركيا پرەزيدەنت قاسىم-جومارت توقايەۆتىڭ ساياسي جانە ەكونوميكالىق رەفورمالارىن تولىق قولدايتىنىنا نازار اۋداردى.

- بۇل - دەموكراتيا جولىنداعى باتىل قادامدار. سونىڭ ارقاسىندا قازاقستاننىڭ حالىقارالىق ارەناداعى بەدەلى مەن ءرولى نىعايا تۇسەدى. حالىقتارىمىزدىڭ اراسىندا تىعىز ءارى كوپ قىرلى بايلانىس ورنىقتى. تۇركيا مەن قازاقستان كوشباسشىلارىن دوستىق جانە شىنايى قارىم-قاتىناس بايلانىستىرادى. مەملەكەتتەرىمىز اراسىنداعى كەڭەيتىلگەن ستراتەگيالىق ارىپتەستىك الداعى ۋاقىتتا دا كوپتەگەن سالادا الەۋەتتى جوبالاردى ىسكە اسىرۋعا سەپتىگىن تيگىزەتىنىنە سەنىمدىمىن. ءبىز پارلامەنتتىڭ دە، كوپجاقتى پارلامەنتتىك ۇيىمداردىڭ دا ءوزارا ءىس-ارەكەتىن ارتتىرۋعا دايىنبىز، - دەدى تۇرىك رەسپۋبليكاسى ۇلى ۇلتتىق ءماجىلىسىنىڭ ءتوراعاسى.

كەزدەسۋ بارىسىندا ءماجىلىس سپيكەرى تۇرىك حالقىنا سۋ تاسقىنى كەزىندە قازاقستانعا قولداۋ كورسەتكەنى ءۇشىن العىس ايتتى.

سونداي- اق تۇركيا رەسپۋبليكاسىنىڭ 100 جىلدىعىنا وراي وتكەن جىلى استانادا انادولى كوشەسى، شىمكەنتتە تۇركيا داڭعىلى مەن ساياباق اشىلعانىن، الماتىدا مۇستافا اتاتۇرىككە ەسكەرتكىش ورناتىلعانىن ەسكە سالدى.

جيىن سوڭىندا ەرلان قوشانوۆ ۇلى ۇلتتىق جينالىس ءتوراعاسىنىڭ رەسمي ساپارى ساياسي ديالوگتى نىعايتىپ، قازاقستان مەن تۇركيا اراسىنداعى پارلامەنتارالىق ىنتىماقتاستىقتى ودان ءارى دامىتۋعا قۋاتتى سەرپىن بەرەتىنىنە سەنىم ءبىلدىردى.