ماجارستاننىڭ قازاقستانعا قۇيعان ينۆەستيتسياسى 370 ميلليون دوللارعا جەتتى - دوڭگەلەك ۇستەل
بۋداپەشت. KAZINFORM - پرەزيدەنت قاسىم-جومارت توقايەۆ قازاق-ماجار ينۆەستيتسيالىق دوڭگەلەك ۇستەلىنە قاتىستى، دەپ حابارلايدى اقوردا.
مەملەكەت باسشىسى، ەڭ الدىمەن، ەكى ەل اراسىنداعى ەكونوميكالىق قارىم-قاتىناس قارقىندى دامىپ كەلە جاتقانىن اتاپ ءوتىپ، بۋداپەشتكە العاشقى مەملەكەتتىك ساپارى قازاق-ماجار ستراتەگيالىق سەرىكتەستىگىنىڭ جاڭا كەزەڭىنە جول اشاتىنىن جەتكىزدى.
- بيىل قازاقستان مەن ماجارستاننىڭ ستراتەگيالىق سەرىكتەستىك تۋرالى دەكلاراتسياعا قول قويعانىنا 10 جىل تولدى. وسى ۋاقىت ارالىعىندا ءبىز ءوزارا سەنىم مەن ورتاق ماقساتتارعا نەگىزدەلگەن تىعىز ىنتىماقتاستىقتىڭ ىرگەسىن قالادىق. ماجارستاننىڭ قازاقستانعا قۇيعان ينۆەستيتسياسى 370 ميلليون دوللارعا جەتتى. ەلىمىزدە ماجارلاردىڭ 70-تەن استام كومپانياسى تابىستى جۇمىس ىستەپ جاتىر. ولاردىڭ قاتارىندا MOL Group جانە Gedeon Richter سەكىلدى كومپانيالار بار. قازىرگى تاڭدا ماشينا جاساۋ، اۋىل شارۋاشىلىعى جانە لوگيستيكا سالالارىندا جالپى ينۆەستيتسيا كولەمى 540 ميلليون دوللاردان اساتىن بىرلەسكەن جوبالاردى جۇزەگە اسىرۋ ماسەلەسى پىسىقتالىپ جاتىر، - دەدى پرەزيدەنت.
مەملەكەت باسشىسى قازاقستان جاڭا ساياسي جانە ەكونوميكالىق پاراديگماعا بەت بۇرعانىن ايتتى. ءبىلىم مەن يننوۆاتسيانى تۋ ەتكەن وزگەرىستەر بۇل ۇدەرىستىڭ باستى قاعيداتىنا اينالادى.
پرەزيدەنت ماجارستان بيزنەسمەندەرىنە ەنەرگەتيكا، سيرەك كەزدەسەتىن ماتەريالداردى ءوندىرۋ، كولىك جانە لوگيستيكا، اۋىل شارۋاشىلىعى، فارماتسيەۆتيكا، سيفرلاندىرۋ، قارجى نارىعى سەكىلدى ماڭىزدى سالالاردا ينۆەستيتسيالىق ىنتىماقتاستىقتى نىعايتۋدىڭ كەلەشەگى زور ەكەنىن مالىمدەدى.
قاسىم-جومارت توقايەۆ ءسوزىن قورىتىندىلاي كەلە، ماجار كومپانيالارىنىڭ باسشىلارىن كەلەسى جىلى مامىر ايىندا وتەتىن استانا حالىقارالىق فورۋمىنا قاتىسۋعا شاقىردى.
ينۆەستيتسيالىق دوڭگەلەك ۇستەل بارىسىندا ماجارستاننىڭ قارجى ءمينيسترى، قازاق-ماجار ەكونوميكالىق ىنتىماقتاستىعى جونىندەگى ۇكىمەتارالىق كوميسسيانىڭ تەڭ ءتوراعاسى ميحاي ۆارگا مەن ءىرى كومپانيالاردىڭ جەتەكشىلەرى ءسوز سويلەدى.
جيىن قورىتىندىسى بويىنشا اۋىل شارۋاشىلىعى، كولىك ينفراقۇرىلىمىن سيفرلاندىرۋ، ءبىلىم سالالارىنا جانە بىرلەسكەن ينۆەستيتسيالىق جوبالاردى قولداۋعا قاتىستى 7 كوممەرتسيالىق قۇجاتقا قول قويىلدى.
وسىعان دەيىن مەملەكەت باسشىسى ماجارستان پرەزيدەنتى تاماش شۋيوكپەن كەزدەستى.