ساۋالنامالاردىڭ باسىم بولىگى بيلەۋشى «فيدەس» پارتياسىنان ءبولىنىپ شىعىپ، حالىقتىق «تيسا» پارتياسىن قۇرعان پەتەر ماديارعا باسىمدىق بەرىپ وتىر. الايدا سايلاۋ قارساڭىندا وربان وزىنە سەنىمدى ەكەنىن اشىق كورسەتتى.
- ءبىز ءبارىن تاڭعالدىرعان، بالكىم ءوزىمىزدى دە تاڭعالدىراتىن جەڭىسكە جەتەمىز، - دەدى ول بۋداپەشتەگى قامال توبەسىندەگى شاعىن الاڭدا جينالعان بىرنەشە مىڭ جاقتاسىنا.
داۋىس بەرۋ جەرگىلىكتى ۋاقىت بويىنشا ساعات 06:00-دەن 19:00-گە دەيىن وتەدى، العاشقى ناتيجەلەر كەشكە قاراي بەلگىلى بولا باستايدى.
سايلاۋ الدىنداعى احۋال ودان ءارى شيەلەنىسە ءتۇستى. وربان وپپوزيسيانى «بيلىكتى باسىپ الۋ ءۇشىن ەشتەڭەدەن تايىنبايدى» دەپ ايىپتاسا، ماديار سايلاۋشىلاردى «فيدەس» پارتياسىنىڭ قىسىمى مەن بوپسالاۋىنا بەرىلمەۋگە شاقىردى.
ورباننىڭ 16 جىلدىق بيلىگى كەزەڭىندە، ەۋروپارلامەنتتىڭ باعالاۋىنشا، ەلدە «سايلاۋ اۆتوكراتياسىنىڭ گيبريدتى رەجيمى» قالىپتاستى. ماديار مەن ونىڭ «تيسا» پارتياسى بيلىك جۇيەسىن وزگەرتۋگە، ەۋروپالىق وداقپەن قارىم- قاتىناستى قايتا جانداندىرۋعا جانە رەسەيمەن تىعىز بايلانىستاردى توقتاتۋعا ۋادە بەرىپ وتىر.
ونىڭ ەلدەگى ەكىنشى ءىرى قالا - دەبرەتسەندەگى قورىتىندى ميتينگىسىنە بۋداپەشتتەگى وربان جيىنىنان الدەقايدا كوپ ادام جينالدى.
سونىمەن بىرگە وربان ا ق ش پرەزيدەنتى دونالد ترامپتىڭ قولداۋىنا يە بولىپ وتىر. ترامپ ماجار سايلاۋشىلارىن ءوزىنىڭ شىنايى دوسى، كۇرەسكەرى جانە جەڭىمپازى ءۇشىن داۋىس بەرۋگە ۇندەدى.
سەنبىنىڭ كەشىندە سويلەگەن «فيدەس» كوشباسشىسى ءداستۇرلى سايلاۋالدى ۇراندارىن تاعى قايتالادى. ونىڭ سوزدەرى بريۋسسەل مەن ۋكرايناعا قارسى باعىتتالدى.
- ءبىز بالالارىمىزدى بەرمەيمىز، قارۋىمىزدى بەرمەيمىز جانە اقشامىزدى بەرمەيمىز، - دەدى ول.
بۇعان دەيىن قاتارىنان ءتورت رەت جەڭىسكە جەتكەن وربان ءۇشىن بۇل جولعى بەسىنشى سايلاۋ ايتارلىقتاي كۇردەلى بولۋى مۇمكىن.
ەل ەكونوميكاسى قيىن كەزەڭدى باستان كەشىرىپ جاتىر. سونىمەن قاتار بيلىك بىرنەشە ساياسي داۋدىڭ ورتاسىندا قالدى. سونىڭ ىشىندە سىرتقى ىستەر ءمينيسترى پەتەر سييارتونىڭ ەۋروپالىق وداق سامميتتەرىنىڭ الدىندا جانە ودان كەيىن رەسەي ارىپتەسىمەن تۇراقتى تۇردە بايلانىستا بولعانى قوعامدا قىزۋ تالقىلاندى.
ماجارستان ەۋروپالىق وداق پەن ناتو مۇشەسى بولا تۇرا، ۋكرايناعا 90 ميلليارد ەۋرو كولەمىندەگى كومەكتى بۇعاتتاپ، ەۋروپالىق سەرىكتەستەرىنىڭ نارازىلىعىن تۋدىردى.
بۋداپەشتتەگى Political Capital ورتالىعىنىڭ ساراپشىسى روبەرت لاسلونىڭ ايتۋىنشا، ەلدەگى ەڭ سەنىمدى ءۇش الەۋمەتتىك زەرتتەۋ اگەنتتىگى «تيسا» پارتياسىنىڭ ايقىن باسىمدىعىن كورسەتىپ وتىر. ساراپشىلار «فيدەس» ايىرماشىلىقتى قىسقارتادى دەپ بولجاعانىمەن، بۇل ازىرگە بايقالماعان.
ساراپشىلاردىڭ پىكىرىنشە، «تيسا» پارتياسى پارلامەنتتە سەنىمدى ابسوليۋتتى كوپشىلىككە قول جەتكىزۋى مۇمكىن. الايدا كونستيتۋتسيالىق وزگەرىستەردى قايتا قاراۋ ءۇشىن قاجەت باسىمدىقتىڭ ۇشتەن ەكى بولىگىنە يە بولاتىنى ازىرگە بەلگىسىز.
سوڭعى كۇندەرى پوليتسيا، اسكەر جانە بيزنەس وكىلدەرىنىڭ ءبىرقاتارى «فيدەسكە» قارسى پىكىر ءبىلدىردى. ساراپشىلار مۇنى قوعامدىق كوڭىل-كۇيدىڭ ۆيكتور وربانعا قارسى وزگەرگەنىنىڭ بەلگىسى دەپ باعالاپ وتىر.