ماحامبەت اۋدانىنداعى جالعانساي اۋىلىنىڭ تۇرعىندارىن ەۆاكۋاتسيالاۋ باستالدى

اتىراۋ. KAZINFORM - اتىراۋ وبلىسىنىڭ ماحامبەت اۋدانىنداعى جالعانساي اۋىلىندا دابىل بەلگىسى ىسكە قوسىلىپ، تۇرعىنداردى تۇگەل ەۆاكۋاتسيالاۋ باستالدى.

اتىراۋ وبلىسىنىڭ جەدەل شتابىنان ءمالىم ەتكەندەي، ءتۇن ورتاسىندا جالعانساي اۋىلىندا سالىنعان بوگەت بۇزىلعان.

«ءدال قازىر اۋىلدىق دارىگەرلىك پۋنكتتى سۋ باسۋ قاۋپى ءتونىپ تۇر. جاعدايدى تۇراقتاندىرۋ ءۇشىن قوسىمشا كۇشتەر مەن رەسۋرستار سۇرالدى. وبلىس اكىمى توتەنشە جاعداي ورنىنا باردى. ساعات 01:20-دا دابىل بەلگىسى ىسكە قوسىلدى. اۋىل تۇرعىندارىن اۋىلداعى مەكتەپ پەن اۋدان ورتالىعىنداعى د. تولەنوۆ، ە. اعەلەۋوۆ اتىنداعى ورتا مەكتەپتەر مەن نۇرشۋاق، التىناي بالاباقشالارىنا ەۆاكۋاتسيالاۋ باستالدى. تۇرعىن ۇيلەرگە قاۋىپ ءتونىپ تۇرعان جوق»، - دەپ حابارلادى وبلىستىق جەدەل شتاب.

قازىر توتەنشە جاعدايدى جويۋعا قورعانىس مينيسترلىگىنىڭ جەكە قۇرامىنان 50 سارباز بەن 15 تەحنيكا تارتىلعان.

جالعانساي اۋىلى اۋدان ورتالىعى - ماحامبەت اۋىلىنان 15 شاقىرىم قاشقىتىقتا ورنالاسقان. بۇل ەلدى مەكەندە 1286 ادام تۇرادى. تۇرعىن ۇيلەر سانى - 237.

ەسكە سالا كەتەلىك، بۇعان دەيىن اتىراۋ وبلىسىنىڭ ماحامبەت اۋدانىندا 66 ەگىن القابى تاسقىن سۋ استىندا قالعانىن حابارلاعان ەدىك.

اۆتور
جولداسبەك شوپەعۇل