ماشات اسۋىندا جۇك كولىگى جول اپاتىنا ۇشىراپ، تاراز - شىمكەنت تراسساسىن جاۋىپ تاستادى

شىمكەنت. KAZINFORM - جۇك كولىكتەرىنىڭ قوزعالىسىنا ۋاقىتشا شەكتەۋ ەنگىزىلدى. جول 5-ماۋسىم كۇنى ساعات 05:00-دە قايتا اشىلادى دەپ جوسپارلانىپ وتىر.

تۇركىستان وبلىسى تۇلكىباس اۋدانىنا قاراستى كەلتەماشات اۋىلى ماڭىنداعى تاراز - شىمكەنت اۆتوجولىنىڭ 653-شاقىرىمىندا Shacman ماركالى جۇك كولىگى جول-اپاتىنا ۇشىرادى. سالماعى 124,8 توننا، ولشەمدەرى بەلگىلەنگەن نورمالاردان اساتىن كولىك ەكى باعىتتاعى جولدى تولىق جاۋىپ تاستاعان.

- جۇك كولىگى «ر ف شەكاراسى (جايسان وتكىزۋ بەكەتى) - مارتوك - اقتوبە (سولتۇستىك اينالما جولى) - قارابۇتاق - قىزىلوردا - شىمكەنت (سولتۇستىك اينالما جولى) - تاراز (اينالما جول) - قورداي - الماتى - قورعاس - قىتاي شەكاراسى (نۇر جولى وتكىزۋ بەكەتى)» باعىتىمەن ءجۇرىپ كەلە جاتقان، - دەپ مالىمدەدى «قازاۆتوجول» ۇ ك» ا ق.

وقيعاعا ماشات اسۋىندا تەجەگىش جۇيەسىنىڭ ىستەن شىعۋى سەبەپ بولعان. جۇرگىزۋشى كولىككە يە بولا الماي، جولدى جاۋىپ، 200 مەتردەن استام قورشاۋدى بۇلدىرگەن. اپاتتان زارداپ شەككەندەر جوق.

قازىرگى تاڭدا كولىك قوزعالىسى ءبىر جولاقپەن جۇزەگە اسىرىلىپ جاتىر، وقيعا ورنىندا جول قىزمەتتەرى جۇمىس ىستەپ جاتىر.

«قازاۆتوجول» ۇ ك» ا ق فيليالىنىڭ مالىمەتىنشە، بۇل كولىككە جول جۇرۋگە رۇقسات بەرىلمەگەن. ونىڭ پارامەترلەرى نورماتيۆتەن اسقان (ەنى - 5,2 م، بيىكتىگى - 5,2 م).

«قازاۆتوجول» ۇ ك» ا ق تاسىمالداۋشىلار مەن جۇرگىزۋشىلەردى ءىرى كولەمدى جانە اۋىر سالماقتى جۇكتەردى تاسىمالداۋ ەرەجەلەرىن قاتاڭ ساقتاۋعا، ءتيىستى رۇقساتتاردى ۋاقتىلى الۋعا، سونداي-اق كولىك قۇرالدارىنىڭ تەحنيكالىق جاي-كۇيىن باقىلاۋعا شاقىرادى.

- تالاپتاردى ەلەمەۋ زاڭنامانى بۇزىپ قانا قويماي، باسقا دا جول پايدالانۋشىلارعا قاۋىپ ءتوندىرۋى مۇمكىن. مۇنداي جاعدايدا جول قوزعالىسىنىڭ باسقا قاتىسۋشىلارى زارداپ شەگەدى، - دەلىنگەن «قازاۆتوجول» ۇ ك» ا ق مالىمدەمەسىندە.

ايتا كەتەيىك، بۇدان بۇرىن شىمكەنتتە تاكسيدى تاسپەن ۇرعان بويجەتكەن قاماۋعا الىنعانىن جازعان بولاتىنبىز.

اۆتور

قايرات زاينيشەۆ