مادەنيەت سالاسى نارازىلىقتار شەرۋىنە، اقپارات سالاسى سوتتاسۋ الاڭىنا اينالدى - دەپۋتات

استانا. KAZINFORM - ءماجىلىس دەپۋتاتى قازىبەك يسانىڭ مالىمەتىنشە سوڭعى 6 ايدىڭ ىشىندە مادەنيەت قايراتكەرلەرى مەملەكەت باسشىسى مەن پارلامەنتتەن كومەك سۇراپ، 6 رەت اشىق حات جازعان.

«كەيىنگى ءبىر جىلدا مادەنيەت سالاسى - نارازىلىقتار شەرۋىنە، اقپارات سالاسى - سوتتاسۋ الاڭىنا اينالدى. سوڭعى 6 ايدىڭ ىشىندە مادەنيەت قايراتكەرلەرى مەملەكەت باسشىسى مەن پارلامەنتتەن كومەك سۇراپ، 6 رەت اشىق حات جازدى، ياعني، ايىنا ءبىر حاتتان كەلەدى. 12- قاراشادا ەكى ەڭبەك ەرى - اسانالى ءاشىموۆ پەن دۋلات يسابەكوۆ باستاعان، حالىق ارتىستەرى مەن حالىق جازۋشىلارى قوستاعان ايگىلى مادەنيەت قايراتكەرلەرى كينو سالاسىنداعى قالىپتاسقان اۋىر احۋالعا نارازىلىق ءبىلدىرىپ، مەملەكەت باسشىسىنان جاعدايدى باقىلاۋعا الۋدى سۇراپ، تاعى دا اشىق حات جازدى»، - دەدى قازىبەك يسا ۇكىمەت باسشىسى اتىنا دەپۋتاتتىق ساۋال جولداپ.

ونىڭ ايتۋىنشا، اشىق حاتتاردىڭ مازمۇنى كينو وندىرىسىنە جاۋاپتى ورىنداردا سالاعا قاتىسى جوق بوگدە ادامدار وتىر جانە جەمقورلىق جايلاعان كينوعا بولىنگەن ميللياردتاعان تەڭگە تالان-تاراجعا ءتۇسىپ جاتىر. ءبىراق اشىق حاتتار پرەزيدەنتكە قايتا-قايتا جازىلىپ جاتسا دا، ۇكىمەت ۇندەمەي وتىرا بەرۋگە ۇيرەنگەن.

«مادەنيەت مينيسترلىگى وزدەرىنىڭ قاتەلىكتەرىنەن شىققان داۋدى تەزىرەك شەشۋ ورنىنا، پرەزيدەنتكە تالاي ۇندەۋ جاسالىپ جاتسا دا، سوڭعى ۇندەۋدەن بەرى ون كۇننەن اسسا دا، مينيستر تۇگىلى، مينيسترلىكتىڭ ءبىر وكىلى دە «قازاق فيلمگە» باس سۇقپاعان ءالى. بۇل مادەنيەتتى قولداۋعا باسا نازار اۋدارىپ وتىرعان پرەزيدەنت قاسىم-جومارت توقايەۆتىڭ ادىلەتتى قازاقستان ساياساتىنا قارسى جاسالىپ وتىرعان سابوتاج ەمەس پە؟!»، - دەيدى ول.

پرەزيدەنت پەن پارلامەنتكە جازىلعان حاتتا «قازاق فيلم» كينوستۋدياسىندا دا، ۇلتتىق كينونى قولداۋ ورتالىعىندا - بىردە-ءبىر كينو سالاسىنىڭ مامانى جوقتىعى جازىلعان.

«مادەنيەت سالاسىنا مادەنيەتتەن حابارى جوق كىم كورىنگەندى باسشى قىلاتىنداي مادەنيەت سالالارى، ۇلتتىق كينو ەكپەريمەنت جاسايتىن ورگان با؟ مادەنيەت جانە اقپارات مينيسترلىگى ەلىمىزدىڭ ۇلتتىق يدەولوگياسى، ادەبيەتى مەن مادەنيەتى، ونەرىنىڭ جەتەكشى ورداسى ەمەس پە؟ كەز كەلگەن سالانى قۇرتۋدىڭ ەڭ وڭاي جولى - ول جەرگە ول سالاعا ەش قاتىسى جوق ادامدى باستىق قىلۋ. ماماندىعى كينوعا ءۇش قايناسا سورپاسى قوسىلمايتىن، ءبىر كۇن دە كينودا ىستەمەگەن، قازاق ءتىلىن قاقپايتىن، ءبىر دە ءبىر رەت قازاق فيلمىن كورمەگەن ادامدى «قازاق فيلمگە» باسشى قىلۋداعى ءمينيستردىڭ ماقساتى وسىلاي ەلدى شۋلاتىپ، جۇمىستى تۇرالاتۋ ما؟»، - دەپ شۇيلىكتى حالىق قالاۋلىسى مينيسترگە.

ءسوز سوڭىندا قازىبەك يسا ۇكىمەت اتالعان ماسەلەگە شۇعىل ارالاسىپ، جاعدايدى تۇراقتاندىرۋى ءتيىس ەكەندىگىن ايتتى.

اۆتور

داۋلەت ىزتىلەۋ