مادەنيەت جانە اقپارات ءمينيسترى ايدا بالايەۆا سانكت-پەتەربۋرگتە وتانداستارىمىزبەن كەزدەستى
مادەنيەت جانە اقپارات ءمينيسترى ايدا بالايەۆا سانكت-پەتەربۋرگقا جۇمىس ساپارىمەن باردى. ساپار اياسىندا قازاقستاندىقتارمەن جانە قالانىڭ شىعارماشىلىق ينتەلليگەنتسيا وكىلدەرىمەن كەزدەستى، دەپ حابارلايدى Kazinform.
ۆەدومستۆو باسشىسى سانكت-پەتەربۋرگتىڭ شىعارماشىلىق ينتەلليگەنسياسىنا اينالعان وتانداستارىمىزبەن جەكە تانىسىپ، ولارمەن ىنتىماقتاستىقتىڭ كەلەشەگى بار بىرلەسكەن باعىتتارى مەن جوبالاردى تالقىلادى.
سونىمەن قاتار مينيستر بۇكىل الەمگە ەسىمى تانىمال وپەرا ءانشىسى ءاليا كيكەنوۆانى «شاپاعات» مەدالىمەن ماراپاتتادى. ماراپاتتاۋ تۋرالى جارلىققا قازاقستان پرەزيدەنتى قاسىم- جومارت توقايەۆ قول قويعان بولاتىن جانە ول ەلىمىزدىڭ رەسپۋبليكا كۇنىنە ارنالعان ەدى. ءاليا كيكەنوۆاعا مەملەكەتتىك ناگرادا ەلىمىزدىڭ تاۋەلسىزدىگىن دامىتۋعا جانە نىعايتۋعا قوسقان زور ۇلەسى ءۇشىن تابىستالدى.
«مەنىڭ شىعارماشىلىعىم مەن قوعامدىق قىزمەتىمدى جوعارى باعالاپ، نازار اۋدارعانى ءۇشىن قازاقستانعا شىن جۇرەكتەن ريزاشىلىعىمدى بىلدىرەمىن. مەن بۇل ءىستى ۇلكەن ىنتامەن جالعاستىرىپ، ەلىمىزگە قالتقىسىز قىزمەت ەتەتىن بولامىن»، - دەدى ءاليا كيكەنوۆا.
شىعارماشىلىق ينتەلليگەنسيا وكىلدەرىنە جۇگىنگەن ۆەدومستۆو باسشىسى ەلىمىزدىڭ مادەنيەت جانە اقپارات مينيسترلىگى قازاقستان مادەنيەتىن، ونىڭ ىشىندە ادەبيەت، مۋزىكا، كوركەم ونەر مەن كينەماتوگرافيانى تانىتۋ ءۇشىن ۇلكەن جۇمىس ىستەپ جاتقانىن اتاپ ءوتتى. 2024 -جىلى قازاقستاننىڭ شەتەلدىك الاڭدارداعى مادەني كۇندەرىن، كورمەلەر، كونتسەرتتەر، شەبەرلىك كلاستارىن وتكىزۋ جوسپارلانىپ وتىر.
«ءبىز ءۇشىن تاجىريبەنىڭ الماسقانى ماڭىزدى. جازۋشىلار، سۋرەتشىلەر مەن ارتىستەر ءبىر-بىرىمەن ارالاسىپ، مىعىم قارىم-قاتىناس قالىپتاستىرۋى قاجەت. ينتەگراتسيا وسىنداي ادامي ءوزارا قارىم-قاتىناس ەسەبىنەن تەرەڭدەۋى ءتيىس. بۇل ءوز جۇمىسىڭدى كورسەتۋ ءۇشىن دە جاقسى مۇمكىندىك»، - دەپ اتاپ ءوتتى ايدا بالايەۆا.
مينيستر رەسەيدە تۇراقتى تۇراتىن وتانداستارىمىزدىڭ قازاقستان قالالارى ساحنالارى مەن كورمە الاڭدارىندا ونەر كورسەتۋ مۇمكىندىگىن الۋىنا، قازاقستاندىق اۋديتوريانى شىعارماشىلىقتارىمەن تانىستىرۋعا كومەك بەرۋگە دايىن ەكەندىگىن باسا ايتتى.
كەزدەسۋگە ءومىرى مەن شىعارماشىلىعى قازاقستانمەن بايلانىستى قازاقستاندىق جانە رەسەيلىك مادەنيەت جانە ونەر قايراتكەرلەرى قاتىستى: رەسەيدىڭ ەڭبەك سىڭىرگەن سۋرەتشىسى، رەسەي جاراتىلىس تانۋ اكادەمياسىنىڭ اكادەميگى لاتيف قازبەكوۆ، مارين تەاترىنىڭ جەتەكشى ءسوليسى اۆگۋست امونوۆ، ءمۇسىنشى، «ەرارتا پرەميا» حالىقارالىق كونكرسىنىڭ جەڭىمپازى تەمىرلان تەلەشوۆ، مارين تەاترى وركەستىرىنىڭ سوليسى اقان مەيىربەكوۆ، رەسەي سۋرەتشىلەر وداعىنىڭ مۇشەسى، سانكت-پەتەربۋرگ ونەركاسىپتىك تەحنولوگيا جانە ديزاين ۋنيۆەرسيتەتىنىڭ دوتسەنتى ءسابيت نۇرىموۆ قاتىستى.
بۇگىن مادەنيەت ءمينيسترى IX مادەنيەت فورۋمىنا قاتىسادى. وندا 70 تەن استام ەلدىڭ وكىلدەرى مادەنيەت پەن ونەر سالاسىنداعى ءوزارا ءىس-قيمىلدىڭ وزەكتى ماسەلەلەرىن تالقىعا سالاتىن بولادى.
اۆتور
مارلان جيەمباي