ماڭعىستاۋلىق تۇرعىن تۇركى حالىقتارىنىڭ 250 جىلدىق تاريحى بار ۇلتتىق بۇيىمدارىن ساقتاعان
اقتاۋ. KAZINFORM - مۇنايلى اۋدانىنىڭ تۇرعىنى اقىلبەردى ناقوۆ تۇركى تىلدەس ەلدەردىڭ ۇلتتىق بۇيىمدارىن جيناۋدى 90-جىلدارى باستاعان. بۇگىندە التى جۇزگە جۋىق كىلەم مەن ەكى جۇزدەن استام ءتۇرلى تۇرمىستىق بۇيىمدارى بار.
- ۇلتتىق قۇندىلىقتارعا دەگەن قىزىعۋشىلىعىم بالا كۇنىمنەن بار. وتباسىندا 14 بالا بولدىق. ۇلدىكى، قىزدىكى دەمەي ءۇيدىڭ شارۋاسىن جاساي بەرەتىنبىز. مەن كوبىنەسە انام باۋ-باسقۇر، الاشا توقىعاندا جانىندا بولىپ، قولىمنىڭ كۇشى بار دەپ كومەكتەسەتىنمىن. سودان بولار مەن سالت-ءداستۇر مەن ۇلتتىق قول ونەر بۇيىمدارىن ساناما ءسىڭىرىپ وسكەنمىن. ەر جەتكەندە ارنايى ساياحاتقا شىعىپ، ەل ارالاپ، ادامدارمەن كوپ ارالاستىم. سول ۇلتتىڭ كونە جادىگەرلەرىن كورسەم سۇراپ، ساتىپ الامىن. كەيدە ۇلكەن كىسىلەر ريزا بولىپ وزدەرى بەرىپ جىبەرەدى، - دەيدى اقىلبەردى ناقوۆ.
اقىلبەردى ناقوۆ تۇركى تىلدەس ەلدەردە وتەتىن كىلەم كورمەلەرى مەن قول ونەر بۇيىمدارىنىڭ جارمەڭكەلەرىن قالت جىبەرمەيدى. مىسالى، يرانداعى كورمەدەن 2 عاسىر بۇرىن قولدان تىگىلگەن كەبەجە ساتىپ العان. ال، شينجياڭ پروۆينسياسىنان ۇيعىردىڭ كىلىمدەرىن اكەلىپتى.
تۇرىكمەنستاننان قونىس اۋدارعان قانداستان ءبىر شارشى مەترلىك كىلەمشەنى 2 مىڭ دوللارعا ساتىپ العان. بۇگىندە قورىندا يران، تۇرىكمەنستان، وزبەكستان، ازەربايجان، داعىستان، ارمەنيا ەلدەرى مەن ۇيعىرلار جانە موڭعولياداعى قازاقتاردىڭ كىلەمدەرى بار.
- قازاقستان بويىنشا كىلەم قىزىلوردا وڭىرىندە وندىرىلگەن. مەنىڭ پايىمداۋىمشا، بۇل كاسىپ 60-جىلدارى جاقسى دامىدى. اۋىل-اۋىل بولىپ جارىسىپ، كىلەم توقىعان دەسەدى. ودان كەيىن شىمكەنتتە توقىلا باستاعان، - دەيدى كوللەكسيونەر.
اقىلبەردى ناقوۆ تۇركى حالىقتارىنىڭ سالت-داستۇرىندەگى ۇقساقتىقتى زەرتتەپ، كىتاپ جازۋدى جوسپارلايدى. سونداي-اق، مۇراجاي اشۋعا دايىندىقتى باستاپ كەتكەن.
اۆتور
اياگوز ءىزباساروۆا