ماڭعىستاۋلىق مۇعالىم ەرەكشە بالمۇزداقتىڭ دايىندالۋ ءادىسىن جاريالادى

استانا. KAZINFORM - قازاقستاندىق پەداگوگ ىرىمشىكتەن ەلدە جوق بالمۇزداق جاساپ شىعاردى. ول وسى جاڭا دەسەرت ارقىلى حالىقارالىق بايقاۋدا جەڭىمپاز اتانعان.

ماڭعىستاۋ وبلىسىنداعى تۋريزم كوللەدجىنىڭ وندىرىستىك وقۋ شەبەرى «بۇگىن LIVE» باعدارلاماسىنا ونلاين سۇحبات بەرىپ، اۆتورلىق تاعامىن تانىستىردى.

- 2024 -جىلى تاراز قالاسىندا وتەتىن حالىقارالىق جارىسقا دايىندالىپ جاتقانبىز. جارىسقا قاتىسۋشىلار التى ەلدەن وزدەرىنىڭ ۇلتتىق تاعامدارىن ۇسىندى. بىزدە سول كەزدە تەك باۋىرساق بولدى. سول ساتتە دەسەرت رەتىندە ەرەكشە نارسە ۇسىنۋ تۋرالى يدەيا تۋىندادى. وسى ماقساتپەن سيىردىڭ ىرىمشىگى مەن تۇيەنىڭ تابيعي سۇتىنەن دايىندالعان بالمۇزداق جاساۋدى ۇيعاردىم. ناتيجەسى وتە تاماشا بولدى. مەن قاسىمداعى ستۋدەنتىمدى وسى رەتسەپت بويىنشا دايىنداپ، ۇيرەتتىم دە، جارىسقا قاتىستىق، - دەيدى ەلامان نۇراي.

تورەشىلەر دە ەرەكشە بالمۇزداقتى جوعارى باعالاپتى.

- تورەشىلەر بالمۇزداقتىڭ ءدامىن تاتقان سوڭ قاتتى تاڭ قالدى. ولار بالمۇزداقتى جوعارى باعالاپ، ءتىپتى ونىڭ پاتەنتىن الۋ قاجەتتىگىن ايتتى. وسى بالمۇزداقتىڭ ارقاسىندا ءبىز جارىستا ءبىرىنشى ورىنعا يە بولدىق، - دەيدى مامان.

ەلامان نۇراي ەندى اۆتورلىق تۋىندىسىن نارىقتا كەڭىنەن تاراتۋدى كوزدەپ وتىر.

- الداعى ۋاقىتتا وسى ءونىمدى نارىققا شىعارۋدى جوسپارلاپ وتىرمىن. قازىر تاپسىرىستار قابىلداپ جاتىرمىن، الايدا ءونىمدى كوپ مولشەردە وندىرە الاتىن كاسىپورنىم جوق. قازىرگى تاڭدا اقتاۋ قالاسىنان كوپتەپ تاپسىرىس الىپ، ءوزىم دايىنداپ جىبەرىپ جاتىرمىن. سونىمەن قاتار، اتىراۋ مەن اقتوبە قالالارىنان دا تاپسىرىستار كەلىپ ءتۇستى. بۇل قالالارعا تاجىريبە رەتىندە دايىن ونىمدەردى جىبەرىپ كوردىم، ءبارى جاقسى بولدى. كاسىپتى دوڭگەلەتىپ، ءارى قاراي كەڭەيتۋ جوسپاردا بار، - دەيدى پەداگوگ.

دەسەرت اۆتورى جاڭا تاعامنىڭ دايىندالۋ ءادىسىن ءتۇسىندىردى.

- بالمۇزداقتى سيىردىڭ ىرىمشىگى، تۇيەنىڭ ءسۇتى جانە بالقايماقتى ارالاستىرا وتىرىپ دايىندايمىن. 100 ادامعا جەتەتىندەي مولشەردەگى بالمۇزداقتى جاساۋعا شامامەن 1 ساعات ۋاقىت كەتەدى، - دەيدى ول.

ايتا كەتەيىك، TurkicSkills-2025 چەمپيوناتى اياسىندا وتكەن حالىقارالىق «Caspian» فەستيۆالىنىڭ كورمەسىندە ماڭعىستاۋ تۋريزم كوللەدجىنىڭ وندىرىستىك وقۋ شەبەرى نۇراي ەلامان ءوز اۆتورلىق تاعامىن تانىستىردى.