ماڭعىستاۋلىق شارۋالار مال ازىعىنا سۋبسيديا سۇراپ وتىر
اقتاۋ. KAZINFORM - ايماققا ءشوپتىڭ-80 پايىزى ال، جەم-100 پايىز وزگە وڭىرلەردەن تاسىمالدانادى. سوندىقتان باعا قىمبات.
بەكى اۋىلىنان 12 شاقىرىم جەردەگى شارۋا قوجالىعىنىڭ يەسى ساۋالبەك جولبەرگەنوۆ قىستىڭ قامىن جاساپ، شاماسى كەلگەنشە قويماسىن جەم- شوپكە تولتىرىپ جاتىر. شارۋا 20 كەلى كەبەكتى-1500 تەڭگەدەن، ءبىر تۇك ءشوپتى 600 تەڭگەدەن ساتىپ الۋدا. ءتورت تۇلىگىن قىستان الىپ شىعۋ ءۇشىن شامامەن 1 مىڭ تۇك ءشوپ قاجەت.
- ۇكىمەت جىلما-جىل سۋبسيدياسىن بەرىپ تۇرسا جاقسى بولار ەدى. بىلتىر مىسالى بەردى، ءوزىمىز سوعان ەداۋىر ريزا بولدىق. ال، بيىل توقتاپ قالدى. قونىس جاقسى بولسا دا ءبىز جەم-ءشوپ الامىز. ونسىز بولمايدى. اۋا-رايىنىڭ قالاي بولارىن ەشكىم بىلمەيدى. سوندىقتان دايىن بولۋ كەرەكپىز، - دەيدى شارۋا.
«ەسكەلدى» شارۋا قوجالىعىنىڭ يەسى باليبەك ەسەنگەلديەۆ تە جەم-شوپكە جەڭىلدىك جاسالسا، شارۋالارعا ۇلكەن كومەك بولاتىنىن ايتادى. ويتكەنى، مال باعۋ - شىعىنى كوپ كاسىپ. شارۋا قوجالىعىنداعى باستى ماسەلە - سۋ تاپشىلىعى. باليبەك ەسەنگەلديەۆ تىرشىلىك ءنارىن اۋدان ورتالىعى شەتپەدەن تاسىمالداپ وتىر. ول جەر استى سۋىن پايدالانۋ ءۇشىن، ءار مەترىنە 17 مىڭ تەڭگە تولەپ، 80 مەتر تەرەڭدىككە دەيىن قۇدىق قازدىرعان، الايدا سۋ شىقپاعان.
- سۋ شىقپادى، 1 ميلليون 360 مىڭ تەڭگەم دالاعا كەتتى. سوسىن ەندى ۆودوۆوزبەن تاسىمالداپ وتىرمىز. قىسقا قاراي كۇنىنە ءبىر ۆودوۆوز، جاز ايلارىندا 3 ۆودوۆوز كەتەدى. باسقا جەر الىپ، قۇدىق قازدىرعىم كەلەدى. ءبىراق 150 مەتردەن بەرىدە سۋ شىقپايتىن سياقتى. بۇرىن قۇدىق قازدىرۋدىڭ 20 پروتسەنتىن شارۋا قوجالىعى، 80 پروتسەنتىن ۇكىمەت كومەكتەسىپ تولەيتىن ەدى. قازىر سونى 50 دە 50 قىلىپ تاستادى، ول بىزگە وتە قيىن، - دەيدى باليبەك ەسەنگەلديەۆ.
اۋىل شارۋاشىلىق مينيسترلىگى مال شارۋاشىلىعى سالالارىن دامىتۋ باسقارماسى باسشىسىنىڭ مىندەتىن اتقارۋشى ايدوس جاقىپتىڭ مالىمدەۋىنشە، ماڭعىستاۋلىق شارۋالارعا مال ازىعىنا سۋبسيديا بەرۋ جالعاسادى.
- مال ازىعىن سۋبسيديالاۋ توتەنشە جاعداي جاريالانعاندا نەمەسە انومالدى تابيعي جاعداي تۋىنداعاندا عانا بەرىلەدى. ءبىراق، وسى قاعيداعا جۋىردا وزگەرىس ەنگىزىلدى. سوعان سايكەس، ماڭعىستاۋ، اتىراۋ، قىزىلوردا جانە ۇلىتاۋ وڭىرلەرىندەگى شارۋالارعا كومەك بەرىلە بەرەدى. مىسالى، ماڭعىستاۋ وبلىسىنا 1 ميلليارد 200 ميلليون تەڭگە سۋبسيديا قاراستىرىلعان. ونىڭ 392 ميلليونى بىلتىرعى وتىنىمدەرگە. قالعان 800 ميلليون تەڭگەسىنە قازىرگى تاڭدا وبلىس اكىمىنىڭ قاۋلىسى دايىندالىپ جاتىر. سول قاۋلى بەكىتىلگەننەن كەيىن سۋبسيديا بەرىلەدى، - دەيدى مينيسترلىك وكىلى.
بۇعان دەيىن، ماڭعىستاۋدا يتبالىقتاردىڭ جاپپاي قىرىلۋىنا قاتىستى ەكولوگيا ۆيتسە- ءمينيسترى پىكىر بىلدىرگەن بولاتىن.