ماڭعىستاۋدا قىزدى ازاپتاپ ولتىرگەن كۇدىكتى 22 جىلعا سوتتالدى
اقتاۋ. KAZINFORM - ماڭعىستاۋلىق 21 جاستاعى ۆالەريا شالنوۆانى ازاپتاپ ءولتىرىپ، دەنەسىن كانالعا تاستاپ كەتكەن كۇدىكتىگە ماڭعىستاۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇكىم شىعاردى.
سەگىز ايعا سوزىلعان تەرگەۋدەن سوڭ اقتاۋ تۇرعىنى 22 جىلعا باس بوستاندىعىنان ايرىلدى. ەندى ول جازاسىن قاتاڭ رەجيمدەگى كولونيادا وتەيدى. الايدا كىنالى ءوز ايىبىن مويىنداماي، مارقۇم سۋيتسيد جاسادى دەپ وتىر.
قىلمىستىق ءىس بويىنشا مارقۇم ۆالەريانىڭ اناسى سۆەتلانا شالنوۆانىڭ ولىمىنە قاتىستى ءادىل ۇكىم شىعارىلعانىن ايتتى. ول ءىستى تەرگەۋگە اتسالىسقان بارشا جانعا العىسىن ءبىلدىردى.
«وتكەن جىلى بولعان بۇل وقيعا قابىرعامىزدى قايىستىرىپ كەتتى. سودان بەرى ءبىز تەرگەۋدىڭ قالاي اياقتالاتىنىن كۇتۋمەن بولدىق. وسى رەتتە سوت سۋدياسى دوسەتوۆا حانىمعا، ماڭعىستاۋ وبلىسى پروكۋرورىنىڭ ورىنباسارىنا، قىلمىستىق پوليتسيانىڭ جەدەل تەرگەۋ بولىمىنە، قورعاۋشىعا قىزىمنىڭ ءولىمىنىڭ ءادىل تەرگەلىپ، لايىقتى ۇكىم شىعارىلعانىنا سەپتەسكەنى ءۇشىن العىسىمدى جەتكىزگىم كەلەدى. ايتا كەتەتىن جايت، سوت كەزىندە قىزىمدى ولتىرگەن كۇدىكتى ءوزىنىڭ قىلمىسىن مۇلدەم مويىندامادى. سوتتىڭ ۇكىمىمەن كەلىسپەدى. ودان بولەك، قىلمىستىق جاۋاپكەرشىلىكتەن قاشىپ، قىزىمنىڭ سۋيتسيد جاساعانىن ايتتى»، - دەدى سۆەتلانا شالنوۆا.
ونىڭ سوزىنشە، كىسى ءولىمى قوعامدا تالقىلاۋعا تۇسكەن سوڭ ايىپكەر جازادان قۇتىلا الماعان.
«سوت وعان قىلمىسى بويىنشا لايىقتى جازا كەستى. ەندى ول قاتاڭ رەجيمدەگى كولونيادا 22 جىل جازاسىن وتەيدى. وسى جاعداي ءبىزدىڭ قايعىمىزعا از بولسا دەمەۋ بولدى»، - دەدى مارقۇمنىڭ اناسى.
22 جىلعا سوتتالعان ايىپتالۋشى ق ر قىلمىستىق كودەكسىنىڭ 99-بابىنىڭ 2- ءبولىمىنىڭ 3، 10-تارماقشالارى جانە 120-باپتىڭ 1- ءبولىمى بويىنشا جاۋاپقا تارتىلدى. بۇدان بولەك، قىلمىستىق ءىستى تەرگەۋ كەزىندە كەدەرگى كەلتىرۋگە تىرىسقان قۇقىق قورعاۋ قىزمەتكەرلەرى تەرگەلەتىن بولادى.
ۆالەريا شالنوۆانىڭ ءمايىتى بىلتىر شىلدە ايىنىڭ باسىندا اقتاۋ ىرگەسىندەگى كانالدان تابىلعان بولاتىن. ىزدەستىرۋ كەزىندە وقيعاعا كىنالى كۇدىكتى ءبىر كۇننەن كەيىن تابىلىپ، ول قىزدىڭ بۇرىنعى جىگىتى ەكەنى انىقتالعان.