ماڭعىستاۋدا جۇزدەگەن بالا ۋلانىپ قالعان مەكتەپ اسحاناسى جابىلدى

استانا. KAZINFORM - وقۋ-اعارتۋ مينيسترلىگى ماڭعىستاۋ وبلىسىندا بالالاردىڭ ۋلانۋىنا قاتىستى مالىمدەمە جاسادى. قازىر وقيعا ورنىندا بالا قۇقىقتارىن قورعاۋ كوميتەتىنىڭ وكىلدەرى جۇمىس ىستەۋدە. بالالارعا قاجەتتى مەديتسينالىق جانە پسيحولوگيالىق كومەك كورسەتىلىپ جاتىر. اتالعان فاكتى بويىنشا قىلمىستىق ءىس قوزعالدى.

بۇگىنگى تاڭدا دارىگەرگە جۇگىنگەن بالا سانى - 460، ونىڭ 377 سى ءۇي جاعدايىندا باقىلاۋعا جىبەرىلدى.

وبلىستىق بالالار جۇقپالى اۋرۋلار اۋرۋحاناسىنا 83 بالا جاتقىزىلدى. ال جانساقتاۋ بولىمىندەگى ەكى بالا بۇگىن جالپى پالاتاعا اۋىستىرىلدى. وقۋشىلاردىڭ دەنساۋلىعى جاقسارىپ كەلەدى. ال ۇيىندە باقىلاۋدا بولعان وقۋشىلار بۇگىن مەكتەپكە بارا باستادى.

مەكتەپ اسحاناسى ءمور باسىلىپ، جابىلدى. بالالار تولىق ساۋىققاننان كەيىن ولارعا قوسىمشا ساباقتار ۇيىمداستىرىلادى.

بۇگىننەن باستاپ ق ر وقۋ-اعارتۋ ءمينيسترىنىڭ تاپسىرماسى بويىنشا بارلىق وبلىستار مەن قالالاردا مەكتەپتەردىڭ اس بلوكتارىنا مونيتورينگ جۇرگىزۋ ءۇشىن موبيلدى توپتار ۇيىمداستىرىلدى.

بۇل توپتار ىستىق تاماقتى ۇيىمداستىرۋ ساپاسىن جانە بالالاردىڭ سانيتارلىق-ەپيدەميولوگيالىق اماندىعىن قامتاماسىز ەتۋ جانە تاماقتان ۋلانۋدىڭ الدىن الۋ ماقساتىندا سانيتارلىق-ەپيدەميولوگيالىق تالاپتاردىڭ ساقتالۋىن باقىلايدى.

«ايتا كەتەيىك، مەكتەپكە تاماق جەتكىزۋشىلەر ازىق- تۇلىك ساپاسىن قامتاماسىز ەتۋگە جانە ولاردىڭ سانيتارلىق-ەپيدەميولوگيالىق نورمالارعا سايكەس بولۋىنا تىكەلەي جاۋاپتى. ءاربىر ارەكەتتىڭ ارتىندا بالالارىمىزدىڭ ءومىرى مەن دەنساۋلىعى تۇرعانىن ەستە ۇستاعان ءجون» دەيدى ۆەدومستۆودان.

ەسكە سالايىق، 7-قىركۇيەك كۇنى مۇنايلى اۋدانىنىڭ ەمحاناسىنا استان ۋلانعان 141 بالا كومەككە جۇگىنگەن بولاتىن.

ۋلانعان وقۋشىلاردىڭ ىشىندە 67 بالا اۋرۋحاناعا جاتقىزىلدى.

كەيىننەن اس ىشكەن سوڭ جاعدايى ناشارلاعان وقۋشىلاردىڭ سانى 222-گە جەتتى.

بۇگىن بۇل ءىستى ۇكىمەت ءوز باقىلاۋىنا الىپ، تەز ارادا بۇكىل مەكتەپتەردىڭ اسحاناسى تەكسەرىلەتىنىن مالىمدەدى.