ماڭعىستاۋدا بوزجىرا شاتقالىندا ۆيزيت-ورتالىعىنىڭ قۇرىلىسى باستالدى
اقتاۋ. KAZINFORM - جوبا بويىنشا ۆيزيت-ورتالىقتا ساياحاتتاۋشىلارعا بارلىق جاعداي قاراستىرىلادى. مۇندا قوناق كۇتۋ ورتالىعى، ەتنو- كافە مەن گلەمپينگتەر بوي كوتەرمەك.
ايماق تۇرعىندارى جوبانىڭ باستالعانىنا قۋانىپ، ءبىراۋىزدان قولداۋ ءبىلدىردى.
- كوپتەن كۇتكەن كەشەننىڭ باستالعانىنا وتە قۋانىشتىمىز. ماڭعىستاۋ ەكونوميكاسى ەندى تەك مۇنايعا ەمەس، تۋريزمگە دە ارقا سۇيەي الادى. كەشەننىڭ سالىنۋىنا قولداۋ بىلدىرەمىز. مۇندا جەرگىلىكتى كاسىپكەرلەر دە تابىس تابادى، - دەيدى جاڭاوزەن قالاسىنىڭ تۇرعىنى ءشارىپ اقجىگىتوۆ.
كەشەن قۇرىلىسى وتاندىق ينۆەستوردىڭ جەكە قارجىسىنا جۇزەگە اسىرىلماق. جوبا اۆتورلارىنىڭ ايتۋىنشا، ۆيزيت ورتالىعى ەكولوگيالىق تالاپتارعا جانە تۇراقتى تۋريزم پرينتسيپتەرىنە تولىقتاي ساي كەلەدى.
- ۆيزيت- ورتالىق قورشاعان ورتاعا زيان كەلتىرمەيتىندەي ەتىپ جوبالانعان. بيولوگيالىق تازارتۋ جۇيەلەرى، قوقىستى سۇرىپتاپ جيناۋ، كۇن ەنەرگياسىن پايدالانۋ سىندى شەشىمدەر كوزدەلىپ وتىر. تۋريستەرگە بارلىق جاعداي جاساۋ - باستى ماقساتىمىز. سونىمەن قاتار قازاقتىڭ ۇلتتىق تاعامدارى مەن قۇندىلىقتارىن ناسيحاتتاۋعا دا ءمان بەرەمىز، - دەيدى جوبا جەتەكشىسى ساۋلە جاڭابايەۆا.
جوبادا 17 گلەمپينگ پاۆيلونى، 50 قوناقۇي بولمەسى، جالپى اۋماعى 450 شارشى مەتر بولاتىن ۆيزيت-ورتالىق پەن ەتنو- كافە قاراستىرىلعان. تۋريستىك كەشەن 2027 -جىلى پايدالانۋعا بەرىلمەك.
بۇعان دەيىن، ماڭعىستاۋدا قۇرىق پورتى قۇرعاق جۇك تاسيتىن جاڭا كەمەمەن تولىققانى تۋرالى جازعان بولاتىنبىز.