ماڭعىستاۋدا ازەربايجان ۇلتىنىڭ وكىلى قازاق تىلىنەن ساباق بەرەدى

اقتاۋ. KAZINFORM - ماڭعىستاۋ وڭىرىندە تۇراتىن ۇلت پەن ۇلىس وكىلدەرىنىڭ باسىم كوپشىلىگى قازاق ءتىلىن جەتىك مەڭگەرىپ، قازاق حالقىنىڭ ءداستۇرىن بەرىك ۇستانادى. سونىڭ ءبىرى اقتاۋدا تۇراتىن ازەربايجان قىزى ساميرا ابدۋللايەۆا قازاق ءتىلىن قالاي جەتىك مەڭگەرۋگە بولاتىنى تۋرالى تاجىريبەسىمەن ءبولىستى.

ساميرا ابدۋللايەۆا 1998 -جىلى وتباسىمەن بىرگە ازەربايجاننان قونىس اۋدارعان. ازەربايجان قىزى قازاق توپىراعىنا قونىس اۋدارعاندا شەتتەتپەي، قوناقجايلىقپەن قابىلداعان قازاق حالقىنا ۇلكەن العىسىن ءبىلدىردى.

«باستاپقىدا مەن قازاق ءتىلىن بىلگەن جوقپىن. ءتىلدى ەركىن مەڭگەرەمىن دەپ ماقسات قويدىم. ءبىزدىڭ ازەربايجان ءتىلى مەن قازاق ءتىلىنىڭ اراسىندا ۇقساستىق بار. سەبەبى ولار تۇركى ءتىلىنىڭ توبىنا كىرەدى. 1998 -جىلى ازەربايجاننىڭ گياندجا قالاسىنان وتباسىمىزبەن ءبىلىم الۋ ماقساتىندا كوشىپ كەلگەنبىز. قازاقستانعا كەلگەننەن بەرى مەملەكەتتىك ءتىلدى ۇيرەنىپ، ەركىن مەڭگەرىپ، ماقساتىما جەتتىم. اقتاۋداعى مەديتسينالىق كوللەدجدى، ش. ەسەنوۆ اتىنداعى ۋنيۆەرسيتەتتى ءتامامدادىم. اقتاۋدا ءتۇرلى سالادا قىزمەت ەتتىم. ءوز جۇمىسىڭدى جاقسى ءبىلىپ، مەملەكەتتىك تىلدە سويلەسەڭ، تابيعاتتى قورعاساڭ ءار ادامعا ەركىن ءومىر سۇرۋگە بولادى دەپ ويلايمىن»، - دەدى ول.

ساميرا اقتاۋدا ەتنو-مادەني بىرلەستىكتەرمەن جۇمىس ىستەۋ ءبولىمىنىڭ باسشىسى بولعان. ول ماڭعىستاۋ وبلىسى اكىمىنىڭ ورىنباسارى زۆيرا تۇگەل قىزى قازاق ءتىلىن مەڭگەرۋىنە كوپ سەپتىگىن تيگىزگەنىن ايتىپ ءوتتى.

«قازاق اقتاۋداعى مەكتەپتەردىڭ بىرىندە مەدبيكە بولىپ جۇمىس ىستەيمىن. جۇمىستان تىس ۋاقىتتا قازاق تىلىنەن ساباق بەرەمىن. ءىنىم جەكە سپورت زالىن اشقان. سونىڭ ىرگەسىندە قازاق ءتىلى سىنىبىن اشىپ، وزگە ۇلتتارعا انا ءتىلدى ۇيرەتىپ ءجۇرمىن. مەنىڭ كوپتەگەن وقۋشىلارىم بار. ۇلتتارىنا قاراماي ماعان قازاق ءتىلىن ۇيرەتەسىز بە دەسە، مەن باس تارتپايمىن. دۇيسەنبى، بەيسەنبى كۇندەرى قازاق تىلىنەن ساباق بەرەمىن. وقۋشىلارىم مەنى 27-ساۋىردە تۋعان كۇنىممەن قازاق تىلىندە قۇتتىقتادى. بۇل مەن ءۇشىن ۇلكەن قۇرمەت»، دەدى ول.

سونىمەن قاتار، ول قازاق ءتىلىن قالاي ەركىن مەڭگەرۋگە بولاتىنىمەن دە ءبولىستى. ماڭعىستاۋ ولكەسى قازاقتىڭ ءتىلى مەن سالت-ءداستۇرىن جەتىك ۇستانعان. وسىنىڭ دا قازاقتىڭ جان دۇنيەسىن تەرەڭ ءتۇسىنىپ، ءتىلدى مەڭگەرۋگە سەپتىگى ۇلكەن دەيدى ول.

«1998 -جىلدان بەرى مەن كۇنىنە ءبىر سوزدەن جاتتاي باستادىم. قازاق ءتىلى وتە باي ءتىل. ونىڭ بارلىق ءسوزىن مەڭگەرۋگە كوپتەگەن جىلدار كەتەدى. ءار ءوڭىردىڭ ديالەكتىلەرى دە ءار ءتۇرلى. باسقا ايماقتاردىڭ دا ءسوز قولدانىسىن مەڭگەردىم. مىسالى، كولىك دوڭگەلەگىن اقتاۋدا «اياق»، وڭتۇستىكتە «دوڭگەلەك»، باسقا جاقتا «دوڭعالاق» دەيدى. بۇل سوزدەردى قازاق ءتىلىن ۇيرەنىپ جۇرگەن وزگە ۇلت وكىلدەرى تۇسىنبەي قالىپ جاتادى. قازاق تىلىمەن قاتار سالت-ءداستۇردى دە مەڭگەردىم. بىزدەر ازەربايجاندار دا قوناقجاي ۇلتپىز. ءبىراق ەڭ كۇشتى سالت-ءداستۇر قازاقتا. سەبەبى ۇيگە كىرگەن كەز كەلگەن ادامعا اۋىز ءتيىڭىز دەيدى. بۇل ءداستۇر ەشبىر ەلدە جوق. شىنىمدى ايتسام بۇل مەنى ەرەكشە تاڭ قالدىرادى»، - دەپ اعىنان جارىلدى.

ساميرانىڭ وتباسىندا ءبارى قازاق ءتىلىن جاقسى بىلەدى. ءىنىسى قازاق قىزىنا ۇيلەنگەن. سامير ابدۋللايەۆ ەرەجەسىز جەكپە-جەكتەن ەلىمىزدىڭ تۋىن كوتەرىپ، بىرنەشە حالىقارالىق جارىستا جۇلدەگەر اتاندى. وسىلايشا ازەربايجان ۇلتىنىڭ وكىلدەرى قازاقتىڭ سالت ءداستۇرىن ناسيحاتتاپ، قازاقتىڭ تۋىن بيىكتەرگە جەلبىرەتىپ ءجۇر.

اۆتور
جانكەلدى قارجان