ماڭعىستاۋدا 50 گە جۋىق كوشەنىڭ اتاۋى وزگەردى

  ماڭعىستاۋداعى اقتاۋ قالاسىنا قاراستى پريمورسكيي جانە راۋان تۇرعىن ءۇي ماسسيۆتەرىنىڭ ەلۋگە جۋىق كوشەسىنىڭ اتاۋى وزگەردى. ونىڭ ءبىرقاتارىنا قازاقشا اتاۋ بەرىلدى، دەپ حابارلايدى Kazinform.

بۇعان دەيىن اقتاۋ قالاسىنا قاراستى پريمورسكي تۇرعىن ءۇي ءماسسيۆى - اقجەلكەن، ال پريوزەرنىي تۇرعىن ءۇي ءماسسيۆى-ويماشا دەگەن قازاقشا اتاۋ العانىن جازعان ەدىك.

ەندى وسى تۇرعىن ءۇي ماسسيۆتەرىنىڭ كوشەلەرى دە وزگەردى.

اتاپ ايتساق، پريمورسكي تۇرعىن ءۇي ءماسسيۆىنىڭ جەمچۋجينا كوشەسى - اقمارجان، ۆەسەننيايا كوشەسى-كوكتەم، ۋروجاينايا كوشەسى-قۇلاگەر بولىپ وزگەرتىلدى.

راۋان تۇرعىن ءۇي ماسسيۆىندەگى اتاۋى جوق كوشەلەرگە اققورعان، جولبايان، اقمايا، شىڭىراۋ، اقەسپە سىندى اتاۋ بەرىلگەن.

— قازاقستاننىڭ اكىمشىلىك-اۋماقتىق قۇرىلىسى تۋرالى زاڭنىڭ 14-بابىنىڭ 4-تارماقشاسىنا سايكەس، ماڭعىستاۋ وبلىسى اكىمدىگى جانىنداعى ونوماستيكا كوميسسياسىنىڭ 2023-جىلعى 18-ساۋىردەگى قورىتىندىسى نەگىزىندە جانە اۋىل حالقىنىڭ پىكىرىن ەسكەرە وتىرىپ، تۇرعىن ءۇي ءماسسيۆىنىڭ جانە كوشەلەردىڭ اتاۋىن وزگەرتۋ جونىندە شەشىم قابىلداندى. راۋان تۇرعىن ءۇي ماسسيۆىندە - 32 كوشە، ال پريمورسكي ماسسيۆىندە - 16 كوشەنىڭ اتاۋى وزگەردى، - دەدى ءومىرزاق اۋىلىنىڭ اكىمى بيسەنعالي كەنجاليەۆ.