ماڭعىستاۋ وڭىرىنە تاتارستاننان كەلگەن العاشقى رەيستەن 100 گە جۋىق تۋريست ءتۇستى
استانا. KAZINFORM - ماڭعىستاۋ وبلىسى رەسەيدەن، تاتارستان رەسپۋبليكاسىنان جاڭا چارتەرلىك رەيستى قارسى الدى. 100 گە جۋىق تۋريست تۇبەككە تابان تىرەدى، دەپ حابارلايدى قوعامدىق كوممۋنيكاتسيا ورتالىعى.
ايتا كەتەيىك ق ر پرەزيدەنتى قاسىم-جومارت توقايەۆ ماڭعىستاۋ وبلىسىنىڭ اكىمى نۇرداۋلەت قيلىبايعا وڭىردەگى ءتۋريزمدى دامىتۋدى ءجىتى تاپسىرعان بولاتىن. تاپسىرما اياسىندا جۇمىستار اتقارىلۋدا.
ماڭعىستاۋدا تۋريستىك ماۋسىمنىڭ باستالۋىنا وراي Rixos Water World Aktau كومپانياسى تۋريستەردى قارسى الۋ ءداستۇرىن جالعادى. رەسەيدەن، تاتارستان رەسپۋبليكاسىنان العاشقى چارتەرلىك رەيسى بۇگىن اقتاۋعا كەلدى. ماڭعىستاۋ وبلىستىق تۋريزم باسقارماسىنىڭ باسشىسى نۇرادىل يمانعاليەۆ تۋريزم سالاسىن دامىتۋ، تۋريستەر اعىنىن ارتتىرۋ بويىنشا اتقارىلعان ءىس-شارالار تۋرالى پىكىر ءبىلدىردى.
- ماڭعىستاۋدا تۋريزم، كولىك جانە لوگيستيكا سالالارىن دامىتۋ باعىتىندا ءبىرقاتار جۇمىس اتقارىلۋدا. بۇگىننەن باستاپ رەسەي، تاتارستان رەسپۋبليكاسىنان قازان- اقتاۋ باعىتى بويىنشا جاڭا چارتەرلىك رەيسى اشىلدى، تۋريستەردى اپتاسىنا ءبىر رەت قارسى الاتىن بولامىز. ءار رەيس اياسىندا شامامەن 100 جولاۋشى كەلەدى دەپ كۇتىلۋدە. اتالعان، جاڭا رەيستىڭ اشىلۋى تۋريستەر اعىنى ارتتىرۋ تۇرعىدا كوپ سەپتىگىن تيگىزەدى. ونىمەن قوسا ماڭعىستاۋ مەن تاتارستان اراسىنداعى مادەني جانە ەكونوميكالىق بايلانىستاردى ورناتۋعا ۇلكەن مۇمكىندىك بەرەدى، - دەدى نۇرادىل يمانعاليەۆ.
تۋريستەردى ارنايى ءان-شاشۋمەن، كەرەمەت كوڭىل كۇيمەن قارسى الدى. وسى تۇرعىدا، قازان قالاسىنىڭ تۇرعىنى، وزىندىك اسەرىمەن بولىسە كەتتى.
- بۇگىن ءبىز قازان قالاسىنان ارنايى ماڭعىستاۋ وڭىرىنە كەلۋدەمىز. اقتاۋ قالاسىن ياعني ءوڭىردى زەرتتەپ، كەرەمەت اسەرگە كەنەلەتىنىمە سەنىمدىمىن. تۋريستىك ايماقتىڭ ءبىرى بولعاندىقتان بۇكىل وتباسىممەن كەلدىم. ولارعا ۋاقىتتىڭ تىعىزدىعىنا قاراماي، بارلىعىن كورسەتكىم كەلەدى. اقتاۋعا ساپار ىڭعايلى ءارى جايلى بولدى. شامامەن، 2 ساعاتقا جۋىق ۇشتىق. سونداي-اق، جاڭا كىرگەن ساتتەن باستاپ، سىزدەردىڭ قوناقجاي ەكەندەرىڭىزگە كوزىم جەتتى. وتە قۋانىشتىمىز، ءدال وسىلاي ەرەكشە كۇتىپ الادى دەپ ويلامادىق. بالالار دا وتە قۋانىشتى، راحمەت، - دەدى اناستاسيا كۋنگۋروۆا، تۋريست، قازان قالاسىنىڭ تۇرعىنى.
اۆتور
اسحات رايقۇل