ماڭعىستاۋ دالاسىندا سيرەك كەزدەسەتىن سوعدى قىزعالداعى گۇلدەدى

اقتاۋ. KAZINFORM - بلوگەر اباي جانىسبايەۆ Instagram پاراقشاسىندا ماڭعىستاۋ دالاسىنىڭ گۇلدەنگەن ءساتىن تۇسىرگەن ۆيدەوسىن جاريالادى.

جارقىراعان كوكتەمگى تۇستەر مەن كوركەم پەيزاجدار قولدانۋشىلاردىڭ نازارىن اۋدارىپ، ءوڭىر تابيعاتىنىڭ سۇلۋلىعىنا ءتانتى ەتتى.

ۆيدەودا كوكالا قورىق-جايىلىمىنىڭ كوركەم كورىنىستەرى بەينەلەنگەن. كادرلاردان دالانىڭ كوگەرىپ، پەيزاجعا اشىق كوكتەمگى رەڭك بەرگەنى بايقالادى.

سوعدى قىزعالداعى (Tulipa sogdiana) - سيرەك كەزدەسەتىن ەرەكشە وسىمدىكتەردىڭ ءبىرى. بيىكتىگى 10-25 س م- گە جەتەتىن كوپجىلدىق گۇل ناۋرىز-ءساۋىر ايلارىندا گۇلدەيدى. قىزىلقۇم، قاراقۇم، ماڭعىستاۋ وڭىرلەرىنىڭ قۇمدى، كەيدە سازدى نەمەسە تاستى شولدەرىندە وسەدى. بۇل سيرەك كەزدەسەتىن ءارى جويىلىپ كەتۋ قاۋپى بار وسىمدىكتەردىڭ قاتارىنا جاتادى جانە قىزىل كىتاپقا ەنگىزىلگەن.

سوعدى قىزعالداعى قازاقستاننىڭ قىزىل كىتابىنا ەنگەن قىزعالداقتىڭ ءبىرى. قۇمدى، سازدى شولدە وسەدى.

ايتقانداي، بۇل قىزعالداقتاردى جۇلۋعا بولمايدى!