ماعان وليمپيادا مەدالىن الۋعا ءبىر قادام قالدى - ءابيبا ءابۋجاقىنوۆا

اتىراۋ. KAZINFORM - قازاقستاندىق دزيۋدوشى ءابيبا ءابۋجاقىنوۆا 27-شىلدەدە پاريج وليمپياداسىنداعى العاشقى بەلدەسۋىن وتكىزەدى. دزيۋدوشى ارۋ ءدۇبىرلى دوداداعى بەلدەسۋى قارساڭىندا سپورتتاعى العاشقى قادامى، ءوزىن جەتىستىككە جەتكىزگەن باپكەرلەرى تۋرالى ايتىپ بەردى.

ءابيبا ءابۋجاقىنوۆانىڭ ايتۋىنشا، دزيۋدوعا 4 جاسىندا كەلگەن. سپورتتىڭ بۇل ءتۇرىن ءوزى تاڭداعان. ال، 2015 -جىلى الماتى سپورت كوللەدجىنە وقۋعا تۇسكەن.

«سول وقۋ ورنىندا العاشقى جاتتىقتىرۋشىم نۇربول سۇلەيمەنوۆپەن كەزدەستىم. العاشقى باپكەرىممەن 9 جىلدان بەرى جۇمىس ىستەپ كەلەمىن. جاتتىقتىرۋشىمنىڭ كەڭەسىمەن ۇلكەن جەتىستىكتەرگە جەتتىم. اتىراۋ وبلىسىنىڭ اتىنان كۇرەسۋدى 2019 -جىلى باستادىم. قازىرگى جاتتىقتىرۋشىم مەيىرجان ەسماعامبەتوۆتىڭ جەتىستىكتەرگە جەتۋىمە كوپ كومەگى ءتيدى. وسى جاتتىقتىرۋشىلارىمنىڭ ەڭبەگىنىڭ ناتيجەسىندە قازىر الەمدىك رەيتينگتە ءۇشىنشى ورىندا تۇرمىن»، - دەدى ءابيبا ءابۋجاقىنوۆا.

ول - دزيۋدودان الەمدىك، قۇرلىقتىق دودالاردا مەدال يەلەنگەن العاشقى قازاق قىزى. الەم چەمپيوناتىندا ەكى رەت قولا مەدالعا يە بولعان. ازيا چەمپيوناتىنىڭ ەكى دۇركىن كۇمىس جۇلدەگەرى اتاندى. ازيا ويىندارىنان دا كۇمىس مەدالعا يە بولعان. سونداي- اق، Grand Slam جانە Grand Prix تۋرنيرلەرىنىڭ بىرنەشە دۇركىن جۇلدەگەرى اتانعان.

«ءوزىمنىڭ باپكەرلەرىمە ەرەكشە العىسىمدى بىلدىرەمىن. ولار ماعان ءارقاشان قولداۋ بىلدىرەدى. ءارقاشان سەنىم ارتادى. مەن ەلدىڭ، باپكەرلەرىمنىڭ سەنىمىن اقتاۋ ءۇشىن كۇرەسەمىن. ەندى ماعان وليمپيادا مەدالىن الۋعا ءبىر قادام قالدى»، - دەدى ءابيبا ءابۋجاقىنوۆا.

ەسكە سالا كەتەلىك، بۇدان بۇرىن اتىراۋ وبلىستىق دزيۋدو فەدەراتسياسىنىڭ ۆيتسە- پرەزيدەنتى ءابيبا ءابۋجاقىنوۆانىڭ وليمپيادا جۇلدەسىنىڭ جولاشارى بولۋى مۇمكىن ەكەنىن ايتقان ەدى.
اۆتور
جولداسبەك شوپەعۇل