ماعان بۇيىرماعان وليمپيادانىڭ التىنى پاريجدە وتانداستارىما بۇيىرسا ەكەن - ادىلبەك نيازىمبەتوۆ

استانا. KAZINFORM - قازاقستاننىڭ ەڭبەك سىڭىرگەن سپورت شەبەرى، قۇرمەت وردەنىنىڭ يەگەرى، وليمپيادا ويىندارىنىڭ ەكى دۇركىن كۇمىس جۇلدەگەرى ادىلبەك نيازىمبەتوۆ قازاق بوكسشىلارى پاريج وليمپياداسىندا جۇلدەگە تالاسۋعا تولىق مۇمكىندىگى بارىن ايتتى.

- ادىلبەك ءسابيت ۇلى، ريو وليمپياداسىنان كەيىن ۇلكەن سپورتتان كەتكەنىڭدى جاقسى بىلەمىز. قازىر وليمپيادانىڭ ەكى دۇركىن كۇمىس جۇلدەگەرى قايدا، نە ىستەپ ءجۇر؟

- شارشى الاڭنان كەتسەم دە، سپورت الەمىنەن كەتكەن جوقپىن. قازىرگى تاڭدا مەن اقتاۋ قالاسىنداعى وبلىستىق وليمپيادالىق دايارلاۋ ورتالىعىندا بوكس مەكتەبىنىڭ ديرەكتورىمىن. ءوزىم اينالىسقان سپورت تۇرىنەن جاستارعا ءتالىم-تاربيە بەرىپ، تاجىريبەممەن ءبولىسىپ ءجۇرمىن.

- ورتالىقتاعى جاستاردىڭ سپورتقا دەگەن قىزىعۋشىلىعى قالاي؟ ءسىز سياقتى وليمپيادا جۇلدەگەرى بولعىسى كەلەتىن جەتكىنشەكتەردىڭ قاتارى كوپ پە؟

- كوپ دەپ ايتا الامىن. مۇندا بوكستان ۇزدىك ناتيجەلەرگە قول جەتكىزىپ، وليمپياداعا بارۋدى ارمانداپ جۇرگەن، تالپىنىپ جۇرگەن جاس جەتكىنشەكتەر جەتەرلىك. ءبىزدىڭ مىندەتىمىز - سول جاستارعا جول سىلتەپ، بولاشاق چەمپيونداردى دايىنداۋ.

- بيىل - وليمپيادا جىلى. باستى دودادا بوكسشىلاردان كىمدەرگە سەنىم ارتاسىز؟

- قازىرگى تاڭدا مىرزاعالي ايتجانوۆ باپتايتىن قازاقستان ۇلتتىق قۇراماسىندا كىل مىقتى بوكسشىلار جينالعان. ولاردىڭ اراسىنان مەن ەشكىمدى بولە-جارعىم كەلمەيدى. بارلىعىنىڭ دا جۇلدەگە تالاسۋعا مۇمكىندىگى بار. مەن تەك، بارلىعىنا ساتتىلىك تىلەيمىن. بىزدە قازىر قامشىبەك قوڭقابايەۆتان باسقاسى ءالى جولداما الىپ ۇلگەرگەن جوق. الدا ەكى ىرىكتەۋ تۋرنيرى تۇر. مەن سول جارىستاردان ۇلتتىق قۇرما پاريجگە تولىق قۇرامدا جولدامانى جەڭىپ الادى دەپ سەنەمىن.

- ءوزىڭىز ءبىر ەمەس، ەكى وليمپيادا ويىندارىنا قاتىسىپ، ەكى مارتە كۇمىس جۇلدەگەر اتاندىڭىز. «اتتەڭ-اي» دەگەن كەزىڭىز بولدى ما؟

- ءيا، مەن ەكى رەت وليمپياداعا باردىم. ەكەۋىنەن دە جۇلدەسىز قايتقام جوق. تەك، التىن الا الماي كەتكەنىم بولماسا، باسقا وكىنىشىم جوق. شامام كەلگەنشە ەل ءۇمىتى ءۇشىن بارىن سالدىم. قولىمنان كەلگەندى جاسادىم. جانكۇيەرلەرىمنىڭ كوڭىلىن جابىرقاتقان جوقپىن دەپ ويلايمىن. مەن الماعان التىندى الداعى وليمپيادادا قازىرگى بوكسشىلارىمىز السا ەكەن دەگەن تىلەگىم بار.

- اڭگىمەڭىزگە راحمەت!

اۆتور كۇنسۇلتان وتارباي