ەم ىزدەگەن شەتەلدىكتەر كوبىنە قاي ەلدەردەن كەلەدى - سۇحبات
الماتى. KAZINFORM - شەتەلدە وتاندىق مەديتسينانى تانىتىپ، ۇگىتتەپ جۇرگەن قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتسپەن اگەنتتىك ءتىلشىسى سۇحباتتاستى.
- مەديتسينالىق تۋريزم ۇعىمىنا انىقتاما بەرسەڭىز. بۇل تەرميندى قاراپايىم سوزبەن قالاي تۇسىندىرۋگە بولادى؟
- مەديتسينالىق تۋريزم - بۇل ادامداردىڭ ەم الۋ ءۇشىن باسقا ەلگە ساياحاتتاۋى. ياعني، ادامنىڭ بەلگىلى ءبىر ەلگە مەديتسينالىق قىزمەت الۋ ماقساتىندا ارنايى جولعا شىعۋى. ەگەر ازامات گەرمانياعا دەمالۋعا بارىپ، ساياحات كەزىندە دەنساۋلىعىن تەكسەرىپ العىسى كەلسە، بۇل مەديتسينالىق تۋريزم بولىپ سانالمايدى. ويتكەنى بۇل جاعدايدا ساپاردىڭ باستاپقى ماقساتى - دەمالىس.
- شەتەلدىكتەر قازاقستاندا كوبىنە قانداي مەديتسينالىق قىزمەت تۇرلەرىن تاڭدايدى؟ ەلىمىزگە كوبىنە قاي ەلدىڭ ازاماتتارى كەلەدى؟
- شەتەلدىكتەر قازاقستاندا كوبىنە بىرنەشە مەديتسينالىق قىزمەت تۇرلەرىن تاڭدايدى. ەڭ الدىمەن، بۇل ءداستۇرلى مەديتسينا: دياگنوستيكا جانە ەمدەۋ، سونداي- اق پروفيلاكتيكالىق تەكسەرۋلەر. سونىمەن قاتار حيرۋرگيا سالاسىندا، اسىرەسە ورتوپەديا، كارديوحيرۋرگيا جانە پلاستيكالىق حيرۋرگيا باعىتتارى ەرەكشە سۇرانىسقا يە. ستوماتولوگيا دا ەلىمىزدىڭ مەديتسينالىق تۋريزمىندە ماڭىزدى ورىن الادى. ودان بولەك ادامدى جاسارتۋ پروتسەدۋرالارى، بوتوكس ينەكسيالارى جانە كونتۋرلىق پلاستيكا سىندى ەستەتيكالىق مەديتسينا قىزمەتتەرىنە دە شەتەلدىكتەر ءجيى جۇگىنەدى. رەپرودۋكتيۆتى مەديتسينا، اتاپ ايتقاندا بەدەۋلىكتى ەمدەۋ جانە جاساندى ۇرىقتاندىرۋ دا شەتەلدىك پاتسيەنتتەردى ەرەكشە قىزىقتىرادى. سونداي-اق ساۋىقتىرۋ مەن وتادان كەيىنگى قالپىنا كەلۋ باعدارلاماسى، ونكولوگيالىق اۋرۋلاردى ەمدەۋ جانە دياگنوستيكا قىزمەتتەرىنىڭ دە بارعان سايىن تانىمالدىعى ارتىپ كەلەدى.
جالپى قازاقستاننىڭ مەديتسينالىق تۋريزمى 45 ەلدى قامتيدى. دەگەنمەن، ونىڭ باسىم كوپشىلىگى - ت م د ەلدەرىنىڭ تۇرعىندارى، ولار جالپى تۋريستەر سانىنىڭ �- ىن قۇرايدى، ال قالعان - الىس شەتەلدەن كەلگەن ازاماتتار. ءبىرىنشى - رەسەي. گەوگرافيالىق جاقىندىق جانە ەكى ەل اراسىنداعى بايلانىس قازاقستاندى رەسەيلىك پاتسيەنتتەر ءۇشىن تارتىمدى ەتەدى. ولار، اسىرەسە، ستوماتولوگيا، كارديولوگيا جانە ورتوپەديا سالالارىندا مەديتسينالىق كومەك ىزدەيدى. ەكىنشىدەن - وزبەكستان. وزبەكستاندىقتار قازاقستاندى باسقا ەلدەرمەن سالىستىرعاندا قولجەتىمدى جانە جاقىن بولعانى ءۇشىن تاڭدايدى، اسىرەسە حيرۋرگيا جانە دياگنوستيكا قاجەت بولعاندا كەلەدى. قىرعىزستان مەن تاجىكستاندى دا اتاپ ءوتۋ كەرەك. بۇل ەلدەردىڭ ازاماتتارى قازاقستانعا، اسىرەسە الماتى سەكىلدى ءىرى قالالارعا مەديتسينالىق كومەك الۋ ءۇشىن ارنايى كەلەدى. تاعى ءبىرى - قىتاي. ارنايى مەديتسينالىق قىزمەت تۇرلەرىن ىزدەيتىن قىتايلىق پاتسيەنتتەردىڭ سانى ارتىپ كەلەدى. ولار قازاقستان مەديتسيناسىنىڭ قولجەتىمدى باعاسىنا قىزىعادى.
- قازاقستان مەديتسينالىق تۋريزم قاۋىمداستىعىنىڭ نەگىزگى مىندەتى مەن ماقساتى قانداي؟ ەلىمىزدىڭ مەديتسينالىق تۋريزم دامىتۋ باعىتىندا قانداي جۇمىستار اتقارىلىپ جاتىر؟
- قازاقستان مەديتسينالىق تۋريزم قاۋىمداستىعى مەديتسينالىق تۋريزم سالاسىندا جەتەكشى رولگە يە بولا وتىرىپ، ۇلكەن جۇمىس اتقاردى. ءبىز بۇل سالانى ۇنەمى دامىتىپ، جەتىلدىرۋگە تىرىسامىز، ماڭىزدى ءىس-شارالاردى ۇيىمداستىرامىز جانە ءوزىمىز دە قاتىسامىز. حالىقارالىق ارەنادا قازاقستاننىڭ مەديتسينالىق تۋريزمىن تانىمال ەتۋ ءۇشىن ءبىز ەلىمىزدىڭ مەديتسينالىق مەكەمەلەرىمەن بىرگە ابۋ-دابي، مينسك، باكۋ، تاشكەنت، بەيجىڭ جانە باسقا دا قالالاردا وتەتىن حالىقارالىق كورمەلەرگە قاتىسامىز. سونداي-اق شەتەلدىك مەديتسينالىق اگەنتتىكتەردىڭ قازاقستاندىق كلينيكالارعا سەنىمىن ارتتىرۋ ماقساتىندا اقپاراتتىق تۋر ۇيىمداستىرامىز.
تاعى ءبىر ماڭىزدى باعىت - مەديتسينالىق قىزمەتكەرلەردىڭ بىلىكتىلىگىن ارتتىرۋ. شەتەلدىك ساراپشىلاردى تارتا وتىرىپ، ترەنينگتەر مەن ۆەبينارلار وتكىزەمىز. 2023 -جىلى قازاقستان مەديتسينالىق تۋريزم قاۋىمداستىعى ۇيىمداستىرعان ەڭ ءىرى ءىس- شارالاردىڭ ءبىرى — قازاقستان رەسپۋبليكاسىنىڭ پرەزيدەنتىنىڭ قاتىسۋىمەن وتكەن «استانانىڭ 25 جىلدىعى: استانا - بولاشاق قالاسى» اتتى حالىقارالىق فورۋم بولدى. فورۋم اياسىندا ەكى ماڭىزدى پانەلدىك سەسسيا ءوتتى. ولار: «تۋريزمنىڭ جاھاندىق نارىعى: ماسەلەلەر مەن ءوسىم درايۆەرلەرى» جانە «استانا مەديتسينالىق تۋريزم كارتاسىندا». سەسسيالارعا قىرعىزستان، وزبەكستان، رەسەي، ازەربايجان، بەلارۋس جانە قىتاي ەلدەرىنىڭ مەديتسينالىق تۋريزم قاۋىمداستىقتارى شاقىرىلدى.
- وزگە ەلدەرگە قاراعاندا قازاقستاننىڭ مەديتسينالىق ءتۋريزمىن تارتىمدى ەتەتىن باستى سەبەپتەر قانداي؟
— ەلىمىز سوڭعى جىلدارى مەديتسينالىق تۋريزم نارىعىندا ەرەكشە كوڭىل اۋدارىپ كەلەدى. 2022 -جىلى 20 مىڭنان استام شەتەلدىك مەديتسينالىق قىزمەت الۋ ءۇشىن قازاقستاندى تاڭداعان. ال 2024 -جىلى بۇل سان 80 مىڭعا جەتتى. بۇل ەلدەگى ساپالى مەديتسينالىق قىزمەتكە دەگەن قىزىعۋشىلىقتىڭ ارتقانىن كورسەتەدى. جالپى قازاقستاندى مەديتسينالىق تۋريزم ءۇشىن تارتىمدى ەتەتىن سەبەپتەردىڭ ءبىرى — قولجەتىمدىلىك. بىزدەگى قىزمەت باعاسى باتىس ەۋروپا نەمەسە سولتۇستىك امەريكا ەلدەرىمەن سالىستىرعاندا الدەقايدا تومەن. سونىمەن قاتار قازاقستان مەديتسينالىق تۋريزمگە ارنالعان ينفراقۇرىلىمدى بەلسەندى تۇردە دامىتىپ كەلەدى.
ەكىنشىدەن، مەملەكەتىمىزدە مەديتسينالىق جانە مادەني تۋريزمدى ءوزارا بىرىكتىرەتىن بىرەگەي باعدارلامالار بار. پاتسيەنتتەر تەك دەنساۋلىعىن جاقسارتىپ قانا قويماي، سونىمەن بىرگە ەلدىڭ تاريحىنا مەن مادەنيەتىنە بويلاي الادى، كورىكتى قالالاردى ارالاپ، جەرگىلىكتى اسحانادان ءدام تاتا الادى. سونىمەن قاتار ەلدەگى 9 مەديتسينالىق مەكەمەنىڭ حالىقارالىق JCI (Joint Commission International) اككرەديتاتسياسى بار ەكەنىن اتاپ وتكەن ءجون. بۇل قازاقستاننىڭ مەديتسينالىق تۋريزمىن جاھاندىق نارىقتا ىلگەرىلەتۋگە ايتارلىقتاي كومەكتەسەدى. كەم دەگەندە، قازاقستاننىڭ ەكى مەگاپوليسى - استانا مەن الماتى مەديتسينالىق تۋريزم كارتاسىندا الدەقاشان ماڭىزدى ورىنعا يە بولدى دەپ ايتا الامىز.
— ال شەتەلدىكتەرگە ەلىمىزدە ەم الۋدى تاڭداۋعا ءجيى كەدەرگى كەلتىرەتىن قانداي توسقاۋىلدار بار؟
— قازاقستانداعى مەديتسينالىق تۋريزمنىڭ دامۋىن كەدەرگى بولاتىن ىشكى سەبەپتەردى اتاساق: الەمدىك اۋە كومپانيالاردىڭ تىكەلەي رەيستەرىنىڭ از بولۋى، مەديتسينالىق تۋريستەر بويىنشا سەنىمدى ستاتيستيكالىق دەرەكتەردىڭ بولماۋى، مەديتسينالىق ۇيىمداردىڭ ءالسىز ماركەتينگى جانە باسقا دا. قازاقستان رەسپۋبليكاسىنىڭ زاڭناماسىندا مەديتسينالىق تۋريزمدى انىقتايتىن جانە رەتتەيتىن نورماتيۆتىك- قۇقىقتىق اكتىنىڭ بولماۋى — بۇل سالانىڭ مەملەكەتتىك دەڭگەيدە دامۋىن ايتارلىقتاي تەجەيتىن فاكتور دەسەك بولادى.
ال شەتەلدىكتەر تاراپىنان اقپاراتتىڭ جەتكىلىكسىزدىگى، ءتىل مەن مادەني ايىرماشىلىقتار قازاقستانعا ەم الۋ ءۇشىن كەلمەۋگە سەبەپ بولۋى مۇمكىن. ەڭ الدىمەن، كوپتەگەن پاتسيەنتتەر قازاقستاندا ەم الۋ مۇمكىندىكتەرى، ەمحانالار مەن ماماندار تۋرالى بىلمەيدى. ودان بولەك شەتەلدىك ازاماتتار مەديتسينا قىزمەتكەرلەرىمەن قارىم- قاتىناس كەزىندە ءتىل بىلمەۋگە بايلانىستى تۇسىنبەۋشىلىكتەن قورقۋى مۇمكىن. بۇل توسقاۋىلداردى جويۋ ءۇشىن قازاقستان مەديتسينالىق تۋريزم قاۋىمداستىعى رەسمي سايتتى، الەۋمەتتىك جەلىلەردى بەلسەندى جۇرگىزىپ، حالىقارالىق كورمەلەرگە قاتىسادى جانە شەتەلدىك مەديتسينالىق اگەنتتىكتەر ءۇشىن اقپاراتتىق تۋر ۇيىمداستىرادى.
— قازاقستاندا شەتەلدىكتەر تاراپىنان ەرەكشە باعالاناتىن بىرەگەي مەديتسينالىق قىزمەت بار ما؟
— 2017 -جىلى ەلورداداعى ۇلتتىق عىلىمي كارديوحيرۋرگيا ورتالىعىندا العاش رەت تولىعىمەن جاساندى CARMAT جۇرەگىن يمپلانتاتسيالاۋ وتاسى جاسالدى. 2021 -جىلى استاناداعى ۇلتتىق نەيروحيرۋرگيا ورتالىعىندا شۆەتسيادا جاسالعان زاماناۋي «گامما- پىشاق» كەشەنى ىسكە قوسىلدى. بۇل - مي ىسىكتەرىن، قان تامىرلارى مەن فۋنكتسيونالدىق اۋرۋلاردى ەمدەۋگە ارنالعان راديوحيرۋرگيالىق قۇرىلعى. وسىلايشا، قازاقستان ت م د ەلدەرىنىڭ ىشىندە ءۇشىنشى جانە ورتالىق ازيادا العاشقى بولىپ مۇنداي جوعارى تەحنولوگيالىق جابدىقتى ىسكە قوستى.
سونىمەن قاتار ەلىمىزدە ءبىرقاتار ەرەكشە مەديتسينالىق قىزمەت تۇرلەرى بار، ولار باسقا ەلدەرمەن سالىستىرعاندا اناعۇرلىم قولجەتىمدى بولۋى مۇمكىن. مىسالى، كليماتوتەراپيا - الماتىدا جانە كاسپي تەڭىزى جاعالاۋىنداعى شيپاجايلاردا تىنىس الۋ جولدارىنىڭ اۋرۋلارىن، اللەرگيانى جانە باسقا دا دەرتتەردى تازا اۋا جانە تابيعات ارقىلى ەمدەۋ كەڭ تارالعان. وعان قوسا، بۋراباي مەن قاپشاعايدا ورنالاسقان شيپاجايلاردا ءتۇرلى اۋرۋلاردى ەمدەۋگە ارنالعان مينەرالدى سۋ پروتسەدۋرالارى ۇسىنىلادى. قازاقستاننىڭ كەيبىر ەمحانالارىندا بۋىن جانە ومىرتقا اۋرۋلارىن ەمدەۋدە ارتروسكوپيا جانە ەندوپروتەزدەۋ (جاساندى بۋىن ورناتۋ) سياقتى بىرەگەي ادىستەر دامىعانىن اتاپ وتكەن ءجون.
ەسكە سالايىق، بىلتىر قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتس شەتەلدىك تۋريستەردى ەلىمىزدىڭ مەديتسيناسىنىڭ قاي سالالارى قىزىقتىراتىنىن ايتقان ەدى.
بۇعان دەيىن كەيىنگى ءۇش جىلدا ەلىمىزدە ەكوتۋريستەر سانى @- عا وسكەنىن جازعانبىز.
اۆتور
دوسبول اتاجان