بۇل تۋرالى الماتىدا وتكەن «بالانىڭ دەنساۋلىعى مەن دامۋى» اتتى حالىقارالىق عىلىمي-پراكتيكالىق كونفەرەنسيادا ايتىلدى.
جيىنعا توعىز ەلدىڭ عالىمدارى، پەدياترلارى، بالالار حيرۋرگتەرى جانە دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى قاتىستى. ماماندار اۋرۋلاردى ەرتە انىقتاۋ، بالالارعا مەديتسينالىق كومەك كورسەتۋ ساپاسىن ارتتىرۋ جانە مەديتسينا قىزمەتكەرلەرىن دايارلاۋ ماسەلەلەرىن تالقىلادى.
ق ر دەنساۋلىق ساقتاۋ مينيسترلىگى انا مەن بالا دەنساۋلىعىن ساقتاۋ دەپارتامەنتىنىڭ ديرەكتورى ماعريپا ەمبەرگەنوۆانىڭ ايتۋىنشا، قازاقستاندا جوعارى تەحنولوگيالىق مەديتسينالىق كومەكتى ەل ىشىندە قولجەتىمدى ەتۋ باعىتىندا جۇمىستار جۇرگىزىلىپ جاتىر.
قازىر وتاندىق كلينيكالاردا «گامما-پىشاق» جانە پروتوندىق تەراپيا ادىستەرى قولدانىلادى. سونداي-اق مي ىسىكتەرى مەن قان تامىرلارى پاتولوگيالارىن ەمدەۋگە مۇمكىندىك بەرەتىن گيبريدتى وپەراتسيالىق كەشەن ىسكە قوسىلعان.
بالالارعا كورسەتىلەتىن باسقا دا مەديتسينالىق كومەكتىڭ كولەمى ايتارلىقتاي. جىل سايىن 2 مىڭنان استام بالا كارديوحيرۋرگيالىق كومەك الادى، 500 بالاعا ەستۋ يمپلانتتارى ورناتىلادى. ال شالا تۋعان 700 گە جۋىق سابيگە كوزدىڭ تورلى قابىعىنىڭ رەتينوپاتياسىن ەمدەۋ شارالارى جۇرگىزىلەدى.
قازاقستان بالالاردى ەمدەۋ ءۇشىن شەتەلگە جىبەرۋدى ازايتىپ كەلەدى. سوڭعى ءۇش جىلدا تۋىستىق بايلانىسى جوق دونورلاردان ءدىڭ جاسۋشالارىن ترانسپلانتاتتاۋ ءۇشىن شەتەلگە جىبەرىلەتىن بالالار سانى ءۇش ەسە، ال كارديوحيرۋرگيالىق وپەراتسيالار ءۇشىن جىبەرۋ كورسەتكىشى 5,2 ەسە ازايعان.
ۆەدومستۆو الداعى ۋاقىتتا راديويودتەراپيانى ەنگىزىپ، قان تامىرلارى مالفورماتسيالارىن ەمدەۋدىڭ زاماناۋي ادىستەرىن ىسكە قوسۋدى جوسپارلاپ وتىر.
- 2027-جىلدان باستاپ شەتەلدە ەمدەلۋگە جىبەرىلەتىن پاتسيەنتتەر سانىن كەزەڭ-كەزەڭىمەن تاعى 50 پايىزعا قىسقارتۋ جوسپارلانۋدا. بۇل ءۇشىن كلينيكالاردى زاماناۋي جابدىقتارمەن قامتاماسىز ەتۋدى جالعاستىرۋ، يننوۆاتسيالىق تەحنولوگيالاردى ەنگىزۋ جانە كەز كەلگەن كۇردەلىلىكتەگى وپەراتسيالاردى جاساي الاتىن وتاندىق مامانداردى تۇراقتى دايارلاۋ قاجەت، - دەدى ماعريپا ەمبەرگەنوۆا.
ەسكە سالايىق، بۇعان دەيىن قاراعاندىدا تۋعانىنا 19 كۇن بولعان نارەستەگە كۇردەلى جۇرەك وتاسى جاسالعانىن جازعانبىز.