قۇجاتتا مەملەكەتتىك ناگرادالار مەن قۇرمەتتى اتاقتاردىڭ تىزبەسىن ناقتىلاۋ، سونداي-اق ءتيىستى اتاقتارعا يە بولعان پەداگوگتەر مەن مەديتسينا قىزمەتكەرلەرىنە ءبىرجولعى تولەمدەر ەنگىزۋ قاراستىرىلعان.
قۇجاتقا سايكەس، «التىن قىران» وردەنى قازاقستان رەسپۋبليكاسىنىڭ ەڭ جوعارى دارەجەلى ەرەكشەلىك بەلگىسى بولىپ ايقىندالدى.
«حالىق قاھارمانى» اتاعىنا قاتىستى ەرەجەلەر دە ناقتىلاندى.
- «حالىق قاھارمانى» اتاعىنا يە بولعان ادامدارعا ايرىقشا ەرەكشەلىك بەلگىسى - «التىن جۇلدىز» جانە «وتان» وردەنى تابىستالادى، - دەلىنگەن قۇجاتتا.
سونىمەن قاتار، قازاقستان رەسپۋبليكاسىنىڭ وردەندەرى قاتارىنا مىنا ماراپاتتار جاتادى:
· «وتان»؛
· «بارىس»؛
· «داڭق»؛
· «Al-Farabi»؛
· «Qoja Ahmet Yasaui»؛
· «قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ»؛
· «مەيىرىم»؛
· «ايبىن»؛
· «پاراسات»؛
· «دوستىق»؛
· «ەل بىرلىگى»؛
· «قۇرمەت»؛
· «ەڭبەك داڭقى».
قازاقستان رەسپۋبليكاسىنىڭ وردەندەرى تىزبەسىنە «Al-Farabi» جانە «Qoja Ahmet Yasaui» وردەندەرى ەنگىزىلدى. وسىلاردىڭ العاشقىسى ءبىلىم مەن عىلىم، مادەنيەت جانە رۋحاني ءومىر سالالارىندا ايرىقشا ەڭبەك سىڭىرگەن قازاقستان ازاماتتارى مەن شەتەلدىكتەرگە بەرىلەدى. ال «qoja Ahmet Yasaui» وردەنىمەن اعارتۋشىلىق، مادەني-گۋمانيتارلىق جانە الەۋمەتتىك سالالارعا ەلەۋلى ۇلەس قوسقان وتاندىق جانە شەتەلدىك عالىمدار، مەملەكەتتىك جانە قوعام قايراتكەرلەرى ماراپاتتالادى.
ودان بولەك، قازاقستان رەسپۋبليكاسىنىڭ مەدالدارى قاتارىنا مىنالار كىرەدى:
· «ەرلىگى ءۇشىن»؛
· «جاۋىنگەرلىك ەرلىگى ءۇشىن»؛
· «ءشامشى قالداياقوۆ»؛
· «ەرەن ەڭبەگى ءۇشىن»؛
· «شاپاعات».
مەملەكەتتىك مەدالدار تىزبەسىنە «ءشامشى قالداياقوۆ» مەدالى ەنگىزىلدى.
- «ءشامشى قالداياقوۆ» مەدالىمەن كومپوزيتورلار، ديريجەرلەر، ءان اۆتورلارى، ءداستۇرلى جانە ەسترادالىق مۋزىكا ورىنداۋشىلارى، سونداي-اق مۋزىكالىق جانە ءان ونەرىنىڭ دامۋىنا زور ۇلەس قوسقان قازاقستان ازاماتتارى مەن شەتەلدىكتەر ماراپاتتالادى، - دەلىنگەن قۇجاتتا.
وزگەرىستەردىڭ جەكە ءبىر بولىگى قۇرمەتتى اتاقتارعا قاتىستى. ولاردىڭ قاتارىندا «قازاقستاننىڭ ەڭبەك سىڭىرگەن ۇستازى»، «قازاقستاننىڭ ەڭبەك سىڭىرگەن دارىگەرى»، «قازاقستاننىڭ ەڭبەك سىڭىرگەن ينجەنەرى»، «قازاقستاننىڭ ەڭبەك سىڭىرگەن قۇرىلىسشىسى»، «قازاقستاننىڭ ەڭبەك سىڭىرگەن كەنشىسى»، «قازاقستاننىڭ ەڭبەك سىڭىرگەن گەولوگى»، «قازاقستاننىڭ حالىق ءارتىسى»، «قازاقستاننىڭ حالىق جازۋشىسى» جانە «قازاقستاننىڭ ەڭبەك سىڭىرگەن سۋرەتشىسى» اتاقتارى بار.
قۇجاتتا ماتەريالدىق ىنتالاندىرۋ شارالارى دا قاراستىرىلعان. «قازاقستاننىڭ ەڭبەك سىڭىرگەن ۇستازى» قۇرمەتتى اتاعىنا يە بولعان پەداگوگتەرگە «پەداگوگ مارتەبەسى تۋرالى» زاڭدا بەلگىلەنگەن مولشەردە ءبىرجولعى تولەم بەرىلەدى.
ال «قازاقستاننىڭ ەڭبەك سىڭىرگەن دارىگەرى» قۇرمەتتى اتاعىنا يە بولعان مەديتسينا قىزمەتكەرلەرىنە «حالىق دەنساۋلىعى جانە دەنساۋلىق ساقتاۋ جۇيەسى تۋرالى» قازاقستان رەسپۋبليكاسىنىڭ كودەكسىندە بەلگىلەنگەن مولشەردە ءبىرجولعى تولەم تولەنەدى.
«قازاقستاننىڭ عارىشكەر- ۇشقىشى» اتاعىنىڭ يەگەرلەرى ارنايى مەملەكەتتىك جاردەماقى الۋعا قۇقىلى.
سونىمەن قاتار، «قازاقستاننىڭ حالىق ءارتىسى» جانە «قازاقستاننىڭ حالىق جازۋشىسى» اتاقتارىن بەرۋ كريتەرييلەرى ناقتىلاندى. بۇلاردىڭ العاشقى اتالعانى تەاتر، سيرك، مۋزىكا جانە كينو ونەرىنىڭ دامۋىنا ەرەكشە ۇلەس قوسقان ادامدارعا بەرىلەدى. ال ەكىنشى اتاق قازاقستان ادەبيەتىنىڭ دامۋىنا ايرىقشا ەڭبەك سىڭىرگەن تۇلعالارعا تابىستالادى.
زاڭنىڭ جاڭارتىلعان رەداكتسياسىندا «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىن بەرۋ نەگىزدەرى دە جەكە كورسەتىلگەن. بۇل اتاققا سۋرەتشىلەر، مۇسىنشىلەر، كەسكىندەمەشىلەر، گرافيكتەر، زەرگەر-سۋرەتشىلەر، ديزاينەرلەر، رەستاۆراتورلار مەن ساندىك- قولدانبالى ونەر شەبەرلەرى، سونداي-اق مونۋمەنتالدى جانە بەينەلەۋ ونەرىنىڭ دامۋىنا ەرەكشە ۇلەس قوسقان ءارى بۇعان دەيىن قازاقستاننىڭ مەملەكەتتىك ناگراداسىمەن ماراپاتتالعان باسقا دا تۇلعالار يە بولا الادى.
تاعى ءبىر وزگەرىس كوپبالالى انالارعا بەرىلەتىن ناگرادالارعا قاتىستى. زاڭدا ولاردىڭ قاتارىنا «التىن القا» جانە «كۇمىس القا» القالارى جاتاتىنى بەكىتىلدى.
ەڭ جوعارى دارەجەلى ەرەكشەلىك بەلگىلەرىمەن، «وتان»، «بارىس» I دارەجەلى، «داڭق» I دارەجەلى، «Al-FarabI» جانە «Qoja Ahmet YasauI» وردەندەرىمەن ماراپاتتالعان ازاماتتار تۋرالى مالىمەت قازاقستان رەسپۋبليكاسى ۇكىمەتى قۇراتىن قازاقستان رەسپۋبليكاسىنىڭ داڭق كىتابىنا ەنگىزىلەدى.
قازاقستان رەسپۋبليكاسىنىڭ داڭق كىتابىن جۇرگىزۋ جانە ساقتاۋ قاعيدالارىن، سونداي-اق ونىڭ سيپاتتاماسىن قازاقستان رەسپۋبليكاسىنىڭ ۇكىمەتى بەكىتەدى.
زاڭعا قازاقستان رەسپۋبليكاسىنىڭ پرەزيدەنتى قول قويعان كۇننەن باستاپ قولدانىسقا ەنگىزىلەدى.
ايتا كەتەيىك، بۇعان دەيىن ورالدا 4 جاسار بالانى قۇتقارىپ قالعان پوليتسەيلەرگە «ەرلىگى ءۇشىن» مەدالى تابىستالعانىن جازعانبىز.
سونىمەن قاتار، مەملەكەت باسشىسى يوردانيا كورولىن Al-Farabi وردەنىمەن ماراپاتتادى.
ودان بولەك، ورتالىق ازيا ونەر قايراتكەرلەرى «دوستىق» وردەنىنە يە بولدى.