- قازاقستاندا ءدىن سالاسىنىڭ ماماندارىن دايارلايتىن 15 تەولوگيالىق ءبىلىم بەرۋ ۇيىمى جۇمىس ىستەيدى. بۇل وقۋ ورىندارىندا 5,6 مىڭنان استام ستۋدەنت ءبىلىم الىپ جاتىر، - دەلىنگەن كوميتەتتىڭ اگەنتتىك ساۋالىنا بەرگەن جاۋابىندا.
ءدىن سالاسىنداعى ۋاكىلەتتى ورگان قازاقستان اۋماعىندا قۇرىلعان ءدىني بىرلەستىكتەردىڭ، ميسسيونەرلەردىڭ جانە ءدىني ءبىلىم بەرۋ ۇيىمدارىنىڭ قىزمەتىن ءوز قۇزىرەتى شەگىندە زەردەلەپ، تالداۋ جۇرگىزەدى. قولدانىستاعى زاڭناماعا سايكەس رەسپۋبليكالىق جانە وڭىرلىك ءدىني بىرلەستىكتەر ءوز جارعىلارىنا ساي ءدىني قىزمەتشىلەردى دايارلاۋدىڭ كاسىپتىك وقۋ باعدارلامالارىن ىسكە اسىراتىن ءدىني ءبىلىم بەرۋ ۇيىمدارىن قۇرۋعا قۇقىلى.
- قازىرگى تاڭدا قازاقستاندا ءدىن سالاسىنداعى مامانداردى دايارلاۋعا باعىتتالعان 15 تەولوگيالىق وقۋ ورنى بار. ونىڭ 13 ءى يسلامدىق باعىتتا، ەكەۋى حريستياندىق باعىتتا ءبىلىم بەرەدى، - دەپ اتاپ وتەدى ۆەدومستۆودان.
كوميتەت مالىمەتىنشە يسلامدىق باعىتتاعى وقۋ ورىندارىنىڭ قاتارىندا «نۇر- مۇباراك» مىسىر يسلام مادەنيەتى ۋنيۆەرسيتەتى، 9 مەدرەسە- كوللەدج، حۋسامۋددين اس- سىعاناقي اتىنداعى يسلام ينستيتۋتى، قازاقستان مۇسىلماندارى ءدىني باسقارماسى جانىنداعى يمامداردىڭ بىلىكتىلىگىن ارتتىرۋ رەسپۋبليكالىق يسلام ينستيتۋتى جانە قوجا احمەت ياساۋي اتىنداعى يمامداردىڭ بىلىكتىلىگىن ارتتىرۋ رەسپۋبليكالىق يسلام ينستيتۋتى بار.
ال حريستياندىق باعىتتاعى ءدىني ءبىلىم بەرۋ جۇيەسىندە الماتى پراۆوسلاۆيە ءدىني سەمينارياسى جانە قاراعاندىداعى «ءماريام - شىركەۋ اناسى» ەپارحياارالىق جوعارى رۋحاني سەمينارياسى جۇمىس ىستەيدى. اتالعان ءبىلىم بەرۋ ۇيىمدارىندا تەولوگيالىق جانە ءدىني كادرلاردى دايارلاۋ جۇزەگە اسىرىلادى.
ۋاكىلەتتى ورگاننىڭ مالىمەتىنشە، قازىرگى ۋاقىتتا قازاقستان اۋماعىندا وزگە ءدىني ءبىلىم بەرۋ ۇيىمىن اشۋعا قاتىستى تىركەلگەن وتىنىمدەر جوق.
بۇعان دەيىن ءدىني قىزمەت سالاسىنداعى زاڭنامانى بۇزعانى ءۇشىن بيىل قانشا ازامات جاۋاپقا تارتىلعانىن جازعان ەدىك.