ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاۋىنشا، قۇجات قازاقستان مەن ا ق ش اراسىنداعى مال شارۋاشىلىعى سالاسىنداعى ىنتىماقتاستىقتى كەڭەيتۋگە باعىتتالعان. تاراپتار اسىل تۇقىمدى ءارى ونىمدىلىگى جوعارى مال جەتكىزۋ، امەريكالىق گەنەتيكالىق تەحنولوگيالاردى ەنگىزۋ جانە وندىرىستىك تاجىريبە الماسۋ ماسەلەلەرىن تالقىلادى.
بۇل تۋرالى اۋىل شارۋاشىلىعى ۆيتسە-ءمينيسترى امانعالي بەرداليننىڭ ا ق ش- تىڭ ايداحو جانە مونتانا شتاتتارىنا جاساعان جۇمىس ساپارى بارىسىندا ايتىلدى. ول شتاتتاردىڭ اۋىل شارۋاشىلىعى دەپارتامەنتتەرى باسشىلارىمەن جانە امەريكالىق اگروبيزنەس وكىلدەرىمەن كەزدەستى.
كەزدەسۋلەردە ۆيتسە-مينيستر قازاقستاننىڭ مال شارۋاشىلىعىن دامىتۋ الەۋەتىنە توقتالدى. ونىڭ ايتۋىنشا، جايىلىمدىق جەر كولەمى بويىنشا الەمدە بەسىنشى ورىندا تۇرعان ەلىمىزدىڭ يەلىگىندە 180 ميلليون گەكتار جايىلىم بار. بۇل سيىر ەتى مەن قوي ەتىن، سونداي-اق ءسۇت ونىمدەرىن ءوندىرۋ كولەمىن ارتتىرۋعا مۇمكىندىك بەرەدى.
مەملەكەت باسشىسىنىڭ تاپسىرماسىمەن بيىل 2026- 2030 -جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپار بەكىتىلىپ، ىسكە اسىرىلا باستادى. جوسپاردا مالدىڭ گەنەتيكالىق ساپاسىن جاقسارتۋ، جەمشوپپەن قامتاماسىز ەتۋ جۇيەسىن نىعايتۋ، سالانى قارجىلاندىرۋدى كەڭەيتۋ، زاماناۋي تەحنولوگيالاردى ەنگىزۋ جانە ءونىمدى قايتا وڭدەۋدى دامىتۋ كوزدەلگەن.
مەموراندۋم اياسىندا قازاقستاندا ەمبريولوگيالىق زەرتحانا قۇرۋ جوسپارلانىپ وتىر. سونىمەن بىرگە شەتەلدىك ساراپشىلاردى تارتا وتىرىپ، وتاندىق مامانداردىڭ بىلىكتىلىگىن ارتتىرۋعا باسىمدىق بەرىلەدى.
قازىر ەلىمىزدە قىزىل ەت ءوندىرۋدىڭ تولىق وندىرىستىك تسيكلىنە نەگىزدەلگەن التى جوبا جۇزەگە اسىرىلىپ جاتىر. بۇدان بولەك، قازاقستاننىڭ وڭتۇستىگىندە العاشقى مامانداندىرىلعان مال بيرجاسىنىڭ قۇرىلىسى باستالدى.
وسى باعىتتا امەريكالىق تاجىريبەنى ەنگىزۋ ماسەلەسى دە قارالدى. تاراپتار مال اۋكسيوندارىن اشىق باعا بەلگىلەۋ ستاندارتتارىنا ساي وتكىزۋ ءۇشىن قازاقستاندىق مامانداردى وقىتۋعا كەلىستى.
ءسۇتتى مال شارۋاشىلىعى دا ەكىجاقتى ىنتىماقتاستىقتىڭ باسىم باعىتتارىنىڭ ءبىرى رەتىندە بەلگىلەندى. سوڭعى جىلدارى قازاقستاندا 100-دەن استام زاماناۋي تاۋارلى-ءسۇت فەرماسى پايدالانۋعا بەرىلدى. ولاردىڭ ءارقايسىسىنىڭ ورتاشا قۇنى 9 ميلليون ا ق ش دوللارىن قۇرايدى.
سونىمەن قاتار سيفرلىق تەحنولوگيالارمەن جابدىقتالعان، ونىمدىلىگى جوعارى تاعى 50 تاۋارلى- ءسۇت فەرماسىنىڭ قۇرىلىسىن جەڭىلدەتىلگەن نەسيە ارقىلى قولداۋ جوسپارلانعان.
وسىعان بايلانىستى امەريكالىق كومپانيالارعا وندىرىستىك كەشەندەردى قاجەتتى جابدىقتارمەن قامتاماسىز ەتۋ، سونداي- اق جابدىق قۇراستىرۋ ءوندىرىسىن قازاقستاندا جەرگىلىكتەندىرىپ، كەيىن ورتالىق ازيا نارىعىنا شىعارۋ مۇمكىندىكتەرى ۇسىنىلدى.
- كەلىسسوزدەر قورىتىندىسىندا تاراپتار ۋاعدالاستىقتاردى ناقتى ينۆەستيتسيالىق جانە ساۋدا جوبالارىنا اينالدىرۋعا كەلىستى. ەتتى باعىتتاعى ءىرى قارا شارۋاشىلىعىندا مونتانا شتاتىنىڭ، ال ونەركاسىپتىك ءسۇت ءوندىرىسى مەن ءونىمدى قايتا وڭدەۋدە ايداحو شتاتىنىڭ تاجىريبەسىن پايدالانۋ كوزدەلىپ وتىر، - دەلىنگەن حابارلامادا.
بىرلەسكەن جوبالاردى ىسكە اسىرۋعا جاردەمدەسۋ جانە ءوزارا ءىس- قيمىلدى ۇيلەستىرۋ ءۇشىن اۋىل شارۋاشىلىعى مينيسترلىگى مەملەكەتتىك ورگاندار، بيزنەس وكىلدەرى مەن عىلىمي ۇيىمداردىڭ قاتىسۋىمەن تۇراقتى جۇمىس الاڭىن قۇرماق.
- قازاقستاننىڭ الەۋەتىن امەريكالىق ارىپتەستەردىڭ تەحنولوگيالارى مەن تاجىريبەسىمەن ۇشتاستىرۋ ءوزارا ءتيىمدى ناتيجەلەرگە قول جەتكىزۋگە مۇمكىندىك بەرەتىنىنە سەنىمدىمىن، - دەدى امانعالي بەردالين.
وسىعان دەيىن قازاقستاننىڭ گەرمانيادان اسىل تۇقىمدى ءىرى قارا مالىن جەتكىزۋدەگى ماقساتى تۋرالى جازدىق.