استانا. KAZINFORM - قازاقستاندا ءمايىت دونورلىعى ارقىلى بالالارعا اعزا ترانسپلانتاتسياسىن دامىتۋ جوسپارلانىپ وتىر. بۇل تۋرالى ق ر دەنساۋلىق ساقتاۋ مينيسترلىگى ترانسپلانتاتتاۋ جانە جوعارى تەحنولوگيالىق مەديتسينالىق قىزمەتتەردى ۇيلەستىرۋ جونىندەگى رەسپۋبليكالىق ورتالىعى ديرەكتورىنىڭ ورىنباسارى نازگۇل جىلگەلدينا ايتتى.
ونىڭ ايتۋىنشا، پەدياتريالىق ترانسپلانتاتسيانى كەڭەيتۋ - دەنساۋلىق ساقتاۋ مينيسترلىگىنىڭ ستراتەگيالىق باعىتتارىنىڭ ءبىرى.
- قازىر بۇل باعىتتا جۇيەلى جۇمىستار جۇرگىزىلىپ جاتىر. بيىل ەلىمىزدە العاش رەت بالاعا جۇرەك ترانسپلانتاتسياسى جاسالدى. ەندىگى ماقساتتارىمىزدىڭ ءبىرى - ءمايىت دونورلىعى ارقىلى بالالارعا ترانسپلانتاتسيا جاساۋدى دامىتۋ، - دەدى نازگۇل جىلگەلدينا.
ونىڭ سوزىنشە، بۇل باعىتتى دامىتۋ بالالارعا جوعارى تەحنولوگيالىق مەديتسينالىق كومەكتىڭ قولجەتىمدىلىگىن ارتتىرىپ، كۇردەلى دياگنوزى بار ناۋقاستاردىڭ ءومىرىن ساقتاپ قالۋعا مۇمكىندىك بەرەدى.
ەسكە سالايىق، ەلىمىزدە دونورلىق اعزاعا مۇقتاج 4739 ادام ترانسپلانتاتسيا كەزەگىندە تۇر. ولاردىڭ 125 ى - بالالار.
بەيسەن سۇلتان
Сұлтан Бейсен Әл-Фараби атындағы ҚазҰУ-дың журналистика факультетінің түлегі. Еңбек жолын 2007 жылы "Жазушы" баспасында редактор болып бастаған. 2008 жылы "Ара" журналында, 2010-2011 жылы Алматы облысының "Талдықорған кеші" газетінде тілші, 2012 жылы "Талдықорған Севен" газетінде тілші болып жұмыс істеген. 2013 жылы сәуір айынан бастап "ҚазАқпарат" ХАА-нде Төте жазу редакциясында шығарушы редактор болып жұмысқа орналасқан