ونىڭ سوزىنشە، جوبالار مۇناي-گاز سالاسىندا سۇرانىس جوعارى ءونىم شىعارۋدى كەڭەيتۋگە، جۇمىس ورىندارىن اشۋعا جانە جەرگىلىكتى ءوندىرىستى دامىتۋعا باعىتتالعان.
- مۇناي-گاز سالاسىندا بارىنشا سۇرانىسقا يە ءتۇپنۇسقا تاۋارلاردىڭ الەمدىك جانە قازاقستاندىق وندىرۋشىلەرىمەن بىرلەسىپ، 37,7 ميلليارد تەڭگەگە 15 جاڭا ءوندىرىستى لوكاليزاتسيالاۋ جۇمىستارى جۇرگىزىلىپ جاتىر. اتالعان جوبالاردى جۇزەگە اسىرۋ جاڭا جۇمىس ورىندارىن قۇرۋدى، سونداي-اق ەل ىشىندە قوسىلعان قۇنى جوعارى تاۋارلاردى ءوندىرۋ جانە ولاردى شىعارۋ بويىنشا قۇزىرەتتىلىكتى ساتىپ الۋدى قامتاماسىز ەتەدى، - دەدى ەرلان اقكەنجەنوۆ.
ونىڭ سوزىنە جۇگىنسەك، 2022-2025 -جىلدار ارالىعىندا قازاقستاندا 7,9 ميلليارد تەڭگە سوماسىنا 10 ءوندىرىس لوكاليزاتسيالاندى، 350-دەن استام جۇمىس ورنى اشىلدى.
سونىمەن قاتار حالىقارالىق سەرتيفيكاتتاۋدان ءوتۋ كەزىندە وتاندىق وندىرۋشىلەردى قولداۋعا ايرىقشا ءمان بەرىلەدى.
- ءتيىستى سەرتيفيكاتتاۋعا جۇمسالعان شىعىنداردى وتەۋ شەگىن 3 مىڭنان 15 مىڭ ايلىق ەسەپتىك كورسەتكىشكە دەيىن ۇلعايتۋ جۇمىسى جۇرگىزىلدى. بۇل وتاندىق كاسىپورىندارعا 60 ميلليون تەڭگەگە دەيىنگى مولشەردەگى شىعىندارىن وتەپ الۋعا مۇمكىندىك بەرەدى جانە سايكەسىنشە قازاقستاندىق وندىرۋشىلەرگە ءۇش ءىرى وپەراتوردىڭ جەتكىزۋ تىزبەگىنە شىعۋعا، سونداي-اق ونىمدەردى شەتەلگە ەكسپورتتىق جەتكىزۋدى جۇزەگە اسىرۋعا مۇمكىندىك اشادى، - دەدى ەرلان اقكەنجەنوۆ.
مەحانيزم قازىردىڭ وزىندە سالانىڭ ەكسپورتتىق مۇمكىندىكتەرىن كەڭەيتۋگە ىقپال ەتە باستادى. ءمينيستردىڭ سوزىنشە، بۇگىنگى تاڭدا مۇناي-گاز سەكتورىندا 7 وتاندىق تاۋار ءوندىرۋشىنىڭ ەۋروپا، سولتۇستىك امەريكا جانە ازيا ەلدەرىنە تاۋار ەكسپورتتاۋ تاجىريبەسى بار.
ايتا كەتەيىك، بۇعان دەيىن ەنەرگەتيكالىق سەكتورداعى جەر قويناۋىن پايدالانۋشىلاردىڭ وتاندىق تاۋارلاردى ساتىپ الۋ كورسەتكىشى وسكەنىن جازعانبىز.