ەگەر 2025-جىلدىڭ قورىتىندىسىندا الەۋمەتتىك كومەك الۋشىلار سانى 54,4 مىڭ وتباسى بولسا، قازىرگى ۋاقىتتا بۇل كورسەتكىش 41,3 مىڭ وتباسىنا دەيىن ازايعان. بۇل ماسەلە ۇكىمەتتە وتكەن ورنىقتى دامۋ ماقساتتارى جونىندەگى ۇيلەستىرۋ كەڭەسىنىڭ XI وتىرىسىندا قارالدى.
پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جيىنعا ب ۇ ۇ وكىلدەرى، ورتالىق مەملەكەتتىك ورگاندار مەن وبلىس اكىمدىكتەرىنىڭ باسشىلارى قاتىستى.
كەزدەسۋدى اشا وتىرىپ، سەرىك جۇمانعارين قازاقستاننىڭ جاھاندىق ورنىقتى دامۋ كۇن تارتىبىنە جوعارى بەيىلدىلىك تانىتىپ، ورتالىق ازياداعى كوشباسشى مارتەبەسىن بەكىتكەنىن جانە حالىقارالىق قوعامداستىقتاعى پوزيتسياسىن نىعايتقانىن اتاپ ءوتتى.
- مەملەكەت باسشىسى قاسىم-جومارت توقايەۆ الدەنەشە رەت نازار اۋدارعانداي، و د م- نى جۇزەگە اسىرۋ ءبىزدىڭ ۇلتتىق باسىمدىقتارىمىزبەن تىكەلەي بايلانىستى. پرەزيدەنت ب ۇ ۇ باس اسسامبلەياسىنىڭ 80-سەسسياسىندا سويلەگەن سوزىندە قازاقستان ورنىقتى دامۋ مىندەتتەرىن مەملەكەتتىك جوسپارلاۋ مەن بيۋدجەتتى قالىپتاستىرۋعا بىرىكتىرگەنىن اتاپ ءوتتى. وسى باعدارلارعا قول جەتكىزۋدە ءبىز حالىقارالىق ۇيىمدارمەن ىنتىماقتاستىقتى نىعايتۋعا ەرەكشە ءمان بەرەمىز، - دەدى ۆيتسە-پرەمەر.
ب ۇ ۇ- نىڭ قازاقستانداعى تۇراقتى ۇيلەستىرۋشىسى سارانگو رادنااراگچا و د م بويىنشا جىل سايىنعى ۇلتتىق ەسەپتى دايىنداۋدىڭ، بيۋدجەتتىك جوسپارلاۋدى ورنىقتى دامۋ مىندەتتەرىمەن بايلانىستىرۋدىڭ جانە وڭىرلىك ىنتىماقتاستىقتى نىعايتۋدىڭ ماڭىزدىلىعىن اتاپ ءوتتى. سونداي-اق كليماتتىڭ وزگەرۋى جانە سۋ رەسۋرستارىن باسقارۋ ماسەلەلەرىندەگى قازاقستان مەن ب ۇ ۇ- نىڭ بىرلەسكەن جۇمىسىنا نازار اۋداردى.
ب ۇ ۇ دامۋ باعدارلاماسىنىڭ (ب ۇ ۇ د ب) قازاقستانداعى تۇراقتى وكىلى كاتارجينا ۆاۆەرنيا ەلىمىزدە و د م- دى مەملەكەتتىك جوسپارلاۋ جۇيەسىنە ەنگىزۋ باعىتىندا ىلگەرىلەۋشىلىك بارىن ايتتى. ونىڭ پىكىرىنشە، كەلەسى ماڭىزدى قادام - ۇلتتىق باسىمدىقتاردى ءار ءوڭىردىڭ ەرەكشەلىگىنە بەيىمدەۋ، جەرگىلىكتى ءوزىن-ءوزى باسقارۋدى دامىتۋ جانە اۋماقتاردىڭ ەكونوميكالىق الەۋەتىن اشۋ.
ول ەۋروپالىق وداقتىڭ قولداۋىمەن جەرگىلىكتى ءوزىن-ءوزى باسقارۋ رەفورماسىنا جاردەمدەسۋگە ارنالعان ءۇش جىلدىق باستاما ىسكە قوسىلعانىن حابارلادى. جوبا ۇلتتىق ەكونوميكا مينيسترلىگىمەن جانە جەرگىلىكتى اتقارۋشى ورگاندارمەن بىرلەسىپ، اباي، جەتىسۋ، تۇركىستان، ماڭعىستاۋ جانە قوستاناي وبلىستارىندا جۇزەگە اسىرىلادى. باستاما جەرگىلىكتى ەكونوميكانى ىنتالاندىرۋعا، وڭىرلەردىڭ الەۋەتىن نىعايتۋعا، جۇمىسپەن قامتۋدى كەڭەيتۋگە جانە حالىقتىڭ تابىسىن ارتتىرۋعا باعىتتالعان.
وتىرىس بارىسىندا قاتىسۋشىلار و د م- عا قول جەتكىزۋدىڭ ارالىق كورسەتكىشتەرىن قاراستىرىپ، الداعى پەرسپەكتيۆالاردى تالقىلادى.
وڭىرلەردەگى ناتيجەلەردىڭ قاتارىندا قىزىلوردا وبلىسىنداعى ينكليۋزيۆتى ءبىلىم بەرۋ كورسەتكىشتەرى دە اتالدى. مۇندا ينكليۋزيۆتى ءبىلىم بەرۋگە جاعداي جاسالعان مەكتەپتەردىڭ ۇلەسى 99,3 پايىزعا جەتكەن. سونىمەن قاتار ءۇش اۋىسىمدى جانە اپاتتىق مەكتەپتەر ماسەلەسى تولىق شەشىلگەن.
جەتىسۋ وبلىسىندا گازداندىرۋ جۇمىستارى اياسىندا كەربۇلاق اۋدانىنان تالدىقورعان قالاسىنىڭ ماڭىنداعى ايماققا دەيىنگى 110 ەلدى مەكەن گازبەن قامتاماسىز ەتىلدى. 2022-جىلى گازبەن قامتىلعان ەلدى مەكەندەر سانى نەبارى بەسەۋ بولعان. قازىرگى ۋاقىتتا وبلىستى گازداندىرۋ دەڭگەيى 67,2 پايىزعا جەتىپ، 467 مىڭ ادام گازبەن قامتىلعان. بيىل تاعى 16 ەلدى مەكەندى گازداندىرۋ جوسپارلانىپ وتىر. ناتيجەسىندە وبلىستى گازداندىرۋ دەڭگەيى 72 پايىزعا جەتۋگە ءتيىس.
الداعى باعىتتاردىڭ ءبىرى - ورنىقتى دامۋ ماقساتتارىنىڭ ىسكە اسىرىلۋىن تۇراقتى مونيتورينگتەۋ مەن باعالاۋدىڭ تۇتاس ۇلتتىق جۇيەسىن قالىپتاستىرۋ. بۇل رەتتە ينديكاتورلاردى جەرگىلىكتى دەڭگەيگە بەيىمدەۋ جۇمىسى جالعاستىرىلادى.
وسىعان دەيىن قازاقستاننىڭ دامۋ كورسەتكىشى بويىنشا ورتالىق ازيادا كوش باستاعانى تۋرالى جازدىق.