ۇلىتاۋدا سوتتالعانداردى ازاپتاعان تۇرمە قىزمەتكەرلەرى اپەللياتسيالىق شاعىم ءتۇسىردى

استانا. KAZINFORM - ۇلىتاۋ وبلىسىندا جازاسىن وتەۋشىلەردى ازاپتادى دەپ ءىستى بولعاندار سوت ۇكىمىمەن كەلىسپەيتىندىگى تۋرالى اپەللياتسيالىق شاعىم ءتۇسىردى.

بيىل 30-شىلدەدە جەزقازعاندا قىلمىستىق ىستەر جونىندەگى مامانداندىرىلعان اۋدانارالىق اسكەري سوتى ءى ءى م قىلمىستىق-اتقارۋ جۇيەسى كوميتەتىنىڭ قاراعاندى جانە ۇلىتاۋ وبلىسى بويىنشا № 62-مەكەمەسىنىڭ 7 قىزمەتكەرى مەن ۇلتتىق ۇلان №6505 اسكەري ءبولىمىنىڭ 4 قىزمەتكەرىنە - جالپى 11 ادامعا سوت ۇكىمىن جاريالادى.

وسى ءىس بويىنشا تاياۋدا زاۋرەش جانۇزاقوۆا ەسىمدى ادام الەۋمەتتىك جەلىدە تۇزەۋ مەكەمەسىندە تەولوگ قىزمەتىن اتقارعان ۇلى ايدار احمەتجانوۆتىڭ جازىقسىز سوتتالعانىن ايتىپ، مەملەكەت باسشىسىنان كومەك سۇرادى.

«2023 -جىلى 31-مامىردا بالام تۇرمەدەگى باعىنباۋشىلىقتى باسۋ ءۇشىن جۇمىسقا دابىلمەن شاقىرتىلعان. اسا اۋىر قىلمىس جاساپ سوتتالعاندار ءوز-وزدەرىن قاساقانا جارالاپ، سۋيتسيد جاساماق بولادى. وقيعا كەزىندە جازاسىن وتەۋشىلەر مەكەمە قىزمەتكەرلەرىنە شابۋىل جاسايدى، پوگوندارىن جۇلادى، ۆيدەوتىركەگىشتەرىن سىندىرادى. بالاما سوتتالعانداردىڭ ءبىرىن تەپتى دەگەن ايىپ تاعىلادى. الايدا ساراپتاما جازاسىن وتەۋشىنىڭ ەشقانداي سوققى الماعانىن كورسەتتى. بەينەجازبادان دا بالامنىڭ ونى تەپكەنى انىقتالمايدى. سوعان قاراماستان، بالاما اۋىر قىلمىس تۋرالى ايىپ تاعىلدى. سوتتالعاننىڭ ءوزى تەولوگ قىزمەتىندەگى ايداردىڭ قاتىسى جوقتىعىن ايتىپ، ءتيىستى ءوتىنىشتى سوتقا وتكىزەدى. سوت وتىرىسىندا ول ءوتىنىشتى ءوز ەركىمەن جازعانىن بىرنەشە رەت ايتادى. ساراپتاما قورىتىندىسىنا قاراماستان، بالام 4 جىلعا سوتتالىپ كەتتى. اتالعان ءمان-جايعا بايلانىستى بالامنىڭ ءىسىن قايتا قاراۋدى سۇرايمىن»، - دەپ مالىمدەدى زاۋرەش جانۇزاقوۆا.

بۇل تۇرعىدا ۇلىتاۋ وبلىسى پروكۋراتۋراسى 2024 -جىلدىڭ 30-شىلدەسىندە سوت ۇكىمى بويىنشا مەكەمە باستىعى مەن ونىڭ رەجيم جونىندەگى ورىنباسارىنا 6 جىل 6 اي مەرزىمگە باس بوستاندىعىنان ايىرۋ جازاسى، سونداي-اق وسى مەكەمەنىڭ 5 جانە اسكەري ءبولىمىنىڭ 4 قىزمەتكەرىنە 4 جىل مەن 4,5 جىل مەرزىمىنە باس بوستاندىقتارىنان ايىرۋ تۇرىندەگى جازا قاراستىرىلعانىن حابارلادى.

«اتاپ ايتقاندا، قۇقىق قورعاۋ قىزمەتى تۋرالى زاڭنىڭ 14-بابى نەگىزىندە قۇقىق قورعاۋ ورگاندارىنىڭ قىزمەتكەرلەرى مەملەكەتتىك بيلىكتىڭ وكىلدەرى سانالادى. لاۋازىمدىق نۇسقاۋلىققا سايكەس، سوتتالعان ا. احمەتجانوۆ ق ر كونستيتۋتسياسىن، ق ر زاڭدارىن، ونىڭ ىشىندە «قۇقىق قورعاۋ قىزمەتى تۋرالى» جانە ق ر ءى ءى م ۆەدومستۆولىق نورماتيۆتىك-قۇقىقتىق اكتىلەرىن، ق ر ءى ءى م، ق ر ءى ءى م ق ا ج ك، قاراعاندى وبلىسى جانە ۇلىتاۋ وبلىسى بويىنشا ق ا ج د بۇيرىقتارىن، ونىڭ ىشىندە ءوزىنىڭ لاۋازىمدىق نۇسقاۋلىعىنا سايكەس جۇزەگە اسىرۋعا مىندەتتى. قازاقستان رەسپۋبليكاسى كونستيتۋتسياسىنىڭ 17-بابى اياسىندا ادامنىڭ قادىر-قاسيەتىنە قول سۇعىلمايدى. ەشكىمدى ازاپتاۋعا، وعان زورلىق-زومبىلىق جاساۋعا، باسقاداي قاتىگەزدىك نەمەسە ادامدىق قادىر-قاسيەتىن قورلايتىنداي ءجابىر كورسەتۋگە نەمەسە جازالاۋعا بولمايدى.

«قىلمىستىق اتقارۋ جۇيەسى مەكەمەلەرىندە ۇستالاتىن ادامداردىڭ مىنەز-قۇلقىن باقىلاۋ مەن قاداعالاۋدى جۇزەگە اسىرۋ جونىندەگى قىزمەتتى ۇيىمداستىرۋ» تۋرالى ق ر ءى ءى م 2017 -جىلعى 20-اقپانىنداعى № 36-بۇيرىعىندا مەكەمە قىزمەتكەرلەرىنىڭ زاڭدى ءىس-ارەكەتتەرى جازىلعان، ياعني سوتتالعانداردى وقشاۋلاپ جانە جاپپاي تارتىپسىزدىككە ۇلاسۋىنا جول بەرمەۋ شارالارىن قابىلداۋ قاجەت. الايدا ءىستى تەرگەۋ بارىسىندا اتالعان بۇيرىق تالاپتارى مەكەمە قىزمەتكەرلەرى تاراپىنان ورىندالماعانى انىقتالدى»، - دەلىنگەن ۇلىتاۋ وبلىسى پروكۋراتۋراسى مالىمەتىندە.

وسى ورايدا پروكۋراتۋرا وقيعا بولعان جەردەن الىنعان بەينەجازبانى قاراۋ بارىسىندا سوتتالعاندار تاراپىنان مەكەمە قىزمەتكەرلەرىنىڭ زاڭدى تالاپتارىنا باعىنباۋ نەمەسە قارسىلىق كورسەتكەن ارەكەتتەرى انىقتالماعانىن مالىمدەدى.

«بۇل جەرگە ا. احمەتجانوۆ دابىل بەلگىسى جاريالانعان سوڭ كەلىپ، زاڭعا قايشى ءىس-ارەكەت جاساعان. سوتقا دەيىنگى تەرگەپ-تەكسەرۋ بارىسىندا سوتتالعان ا. احمەتجانوۆتىڭ قىلمىستىق قۇقىق بۇزۋ ارەكەتىن جاساعاندىعىن اشكەرەلەيتىن دالەلدەمەلەر جيناقتالدى. جابىرلەنۋشىلەردىڭ ءارى كۋاگەرلەردىڭ جاۋاپتارىمەن، ساراپتاما قورىتىندىلارىمەن، جۇرگىزىلگەن بەتتەستىرۋ تەرگەۋ ارەكەتتەرى جانە وقيعا بولعان جەردەن الىنعان بەينەجازبالارمەن دالەلدەنەدى»، - دەپ ناقتىلادى وبلىستىق پروكۋراتۋرا.

ايتا كەتەيىك، قازىرگى كەزدە بۇل وقيعا بويىنشا ءىستى بولعاندار ءبىرىنشى ساتىداعى سوت ۇكىمىمەن كەلىسپەيتىندىگى تۋرالى اپەللياتسيالىق شاعىم تۇسىرگەن. اتالعان ءىس اپەللياتسيالىق ساتىداعى سوتتا قارالادى.

ال، قىلمىستىق-اتقارۋ جۇيەسى كوميتەتى قارايتىن ىشكى ىستەر مينيسترلىگى كەلەسىدەي تۇسىنىك بەردى.

«توتەنشە جاعداي تۋىنداعان كەزدە (ونىڭ ىشىندە قاماۋداعى ادامداردىڭ بۇلىك جاساۋى) قىزمەتتەگى بارلىق اتتەستاتتالعان قىزمەتكەرلەر قۇقىق قورعاۋ قىزمەتى تۋرالى زاڭعا سايكەس ارەكەت ەتۋگە مىندەتتى. قىلمىستىق سوت ىسىن جۇرگىزۋ قىلمىستىق-پروتسەستىك كودەكسپەن بەلگىلەنگەن تارتىپتە ايقىندالادى. قىلمىستىق ىس بويىنشا سوتقا دەيىنگى تەرگەپ-تەكسەرۋدى ءوز قۇزىرەتى شەگىندە جۇزەگە اسىرۋعا ۋاكىلەتتى لاۋازىمدى ادام ءىستىڭ ءمان-جايىن جان-جاقتى، تولىق جانە وبەكتيۆتى زەرتتەۋ ءۇشىن بارلىق شارالاردى قولدانادى. سونىمەن قاتار، ق ر كونستيتۋتسياسىنىڭ 77-بابىنا سايكەس، سوت تورەلىگىن ىسكە اسىرۋ جونىندەگى سوتتىڭ قىزمەتىنە قانداي دا بولسىن ارالاسۋعا جول بەرىلمەيدى جانە ول زاڭ بويىنشا جاۋاپكەرشىلىككە اكەپ سوعادى»، - دەلىنگەن ءىىم اقپاراتىندا.

اۆتور
رۋسلان عابباسوۆ