ۇلىتاۋ وبلىسىندا قولدا بار مال مەن اكىمدىكتىڭ ستاتيستيكاسى ءبىر-بىرىنە سايكەسپەيدى

جەزقازعان. KAZINFORM - ۇلتتىق ستاتبيۋرو ۇلىتاۋ وبلىسىندا پروفيلاكتيكالىق باقىلاۋ بارىسىندا مال باسى بويىنشا ۇسىنىلاتىن اكىمشىلىك دەرەكتەردىڭ ناقتى كورسەتكىشپەن سايكەسسىزدىگىن انىقتادى.

ءۇي شارۋاشىلىقتارىن ارالاۋ كەزىندە بيۋرو قىزمەتكەرلەرى كورسەتكىشتەردى اسىرا كورسەتۋ/تومەندەتۋ فاكتىلەرىن تىركەدى.

بۇگىنگى تاڭدا مال باسىنىڭ دەرەكتەرى شارۋاشىلىق ەسەپتەرىنىڭ اكىمشىلىك دەرەكتەرى جانە «مال باسىن بىردەيلەندىرۋ» اقپاراتتىق جۇيەسى نەگىزىندە قالىپتاستىرىلادى.

«پروفيلاكتيكالىق باقىلاۋ اياسىندا قارساقپاي جانە كەڭگىر ەلدىمەكەندەرىندەگى 25 شارۋاشىلىقتى ارالادىق. الدىن الۋ شارالارىنىڭ ناتيجەسىندە قازاقستاننىڭ مەملەكەتتىك ستاتيستيكا سالاسىنداعى زاڭناما بۇزۋشىلىقتارى انىقتالدى. مىسالى، قارساقپاي اۋىلىندا ءىرى قارا مال باسىنىڭ سانى شارۋاشىلىق ەسەپ پەن ناقتى دەرەكتەردى سالىستىرعاندا - 5، كەڭگىر اۋىلىندا جىلقى سانى بويىنشا - " سايكەسپەيدى»، - دەدى بيۋرونىڭ دەرەكتەر بازاسىنىڭ ساپاسىن باقىلاۋ ءبولىمىنىڭ باسشىسى نيكيتا بۋرميستروۆ.

ول پروفيلاكتيكالىق باقىلاۋ ءىس-شارالارىنىڭ قورىتىندىسى بويىنشا اكىمدەرگە ناقتى دەرەكتەر مەن شارۋاشىلىق ەسەپتە ۇسىنىلعان اكىمشىلىك دەرەكتەر اراسىنداعى سايكەسسىزدىكتەردەن تۋىنداعان بۇزۋشىلىقتاردى جويۋ جونىندە ۇيعارىم شىعارىلعانىن اتاپ ءوتتى.

بيۋرو ماماندارى ۇلىتاۋ وڭىرىنە ساپارى بارىسىندا جەرگىلىكتى اتقارۋشى ورگاندارمەن ارنايى سەمينار وتكىزىپ، وندا اكىمشىلىك دەرەكتەردى جيناۋ ماسەلەلەرىن تالقىلاپ، مەملەكەتتىك ستاتيستيكا سالاسىنداعى زاڭنامانى ءتۇسىندىردى جانە «اۋىل شارۋاشىلىعى جانۋارلارىن بىردەيلەندىرۋ» تاقىرىبىنداعى ينتەراكتيۆتى باقىلاۋ تاقتاسىنىڭ مۇمكىندىكتەرىن كورسەتتى.

ايتا كەتەيىك، مۇنداي پروفيلاكتيكالىق ءىس-شارالار تۇركىستان، ماڭعىستاۋ، اقمولا جانە قاراعاندى وبلىستارىندا جانە ۇلىتاۋ وبلىسىنىڭ تاعى التى اۋىلدىق وكرۋگىندە جۇرگىزىلەدى.