ەلىمىزدەگى وقىرمانى ەڭ كوپ 100 كىتاپ انىقتالاتىن بولدى
استانا. KAZINFORM - ەلىمىزدە ەڭ ۇزدىك 100 كىتاپتى انىقتايتىن ۇلتتىق ساۋالناما باستالدى.
- ۇلتتىق قۇرىلتايعا مۇشە دەپۋتاتتار جاڭا باستاما كوتەرىپ جاتىر. بۇل باستامانىڭ ماقساتى - ءوز اۆتورلارىمىزدىڭ ەڭبەكتەرىن ناسيحاتتاۋ. كوپتەگەن ەلدەردە وسىنداي تاماشا ءداستۇر بار.
ۇلى بريتانيا، فرانسيا ەلدەرىندە وسىنداي ساۋالنامانىڭ ناتيجەسىندە ۇزدىك دەپ تانىلعان 200، 100 شىعارمانىڭ ءتىزىمىن جاريالاپ جاتادى. ءبىز دە سول داستۇرگە ساي ءوز ەلىمىزدە وسىنداي جالپىۇلتتىق ساۋالناما باستايىق دەپ شەشتىك، - دەدى ق ر مەملەكەتتىك كەڭەسشىسى ەرلان قارين باستامانىڭ اشىلۋىندا.
ونىڭ ايتۋىنشا، بۇل باستامانىڭ ماقساتى تەك ۇزدىك 100 شىعارمانىڭ ءتىزىمىن جاساۋ ەمەس، وقىرماندار اراسىندا ەڭبەكتەردى تالقىلاۋ ءداستۇرىن قالىپتاستىرۋ.
مالىمەتكە ساي، ساۋالناما eGov پورتالى ارقىلى جۇرگىزىلەتىن بولادى. وندا ارنايى انكەتا دايىندالعان. ەلىمىزدىڭ كەز كەلگەن ازاماتى eGov mobile قوسىمشاسى ارقىلى ءوزىنىڭ 10 سۇيىكتى كىتابىن ۇسىنا الادى.
بۇل كىتاپتار ءارتۇرلى جانردا بولۋى مۇمكىن، ياعني تاريحي شىعارمالار، كوركەم ادەبيەت، بالالار ادەبيەتى جانە فانتاستيكا جانرىنداعى تۋىندىلار ەنە الادى.
- ساۋالناما 3 اي بويى جۇرگىزىلەدى. ونىڭ ناتيجەسىن تامىز ايىندا اباي كۇنىنە وراي جاريالايتىن بولامىز. بۇل ساۋالناما ناتيجەسى ءاربىر قازاقتىڭ كىتاپ سورەسىندە تۇراتىن كىتاپتاردىڭ ءتىزىمىن انىقتاپ قانا قويماي، باسپا ىسىنە دە جاڭا ءۇردىس بەرە مە دەپ ويلايمىز، - دەدى ەرلان قارين.
ايتا كەتەيىك، Meloman كىتاپ دۇكەنى جەلىسى ساۋالناماعا قاتىسۋشىلارعا ارنايى جۇلدە دايىنداپ وتىر. ونىڭ ىشىندە ەڭ جاس قاتىسۋشىعا، وتباسى مۇشەلەرىنىڭ ءبارى داۋىس بەرگەن جانۇياعا جانە ەڭ بەلسەندى ايماقتارعا ارنايى سىيلىقتار بار.
ەسكە سالايىق، قىزىلوردا وبلىسىنىڭ پوليتسيا بولىمىندە العاشقى كىتاپحانا اشىلدى.