ەلىمىزدىڭ قاي وڭىرىندە ەتنوتۋريزم جاقسى دامىپ كەلەدى

استانا. KAZINFORM - تۋريزم جانە سپورت مينيسترلىگى ەلىمىزدىڭ قاي وڭىرىندە ەتنوتۋريزم جاقسى دامىپ كەتە جاتقانىن اتادى.

«ەتنوتۋريزمنىڭ دامۋى ەلىمىزدە الماتى جانە تۇركىستان وبلىستارىندا باسقا وڭىرلەرگە قاراعاندا جوعارى دەڭگەيدە. بۇل وڭىرلەردە ۇلتتىق داستۇرلەر مەن مادەنيەتكە نەگىزدەلگەن تۋرلار ۇيىمداستىرىلادى. سونىمەن قاتار، قازاق حالقىنىڭ تۇرمىس-تىرشىلىگى مەن قولونەرىن كورسەتۋ ماقساتىندا ەتنواۋىلدار قۇرىلىپ جاتىر. تۇركىستان وبلىسىندا ۇلى جىبەك جولى مۇراسى نەگىزىندە ەتنو تۋرلار ۇسىنىلادى»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.

دەگەنمەن ۆەدومستۆو وتكەن جىلى ەتنوتۋريزم باعىتىندا قازاقستانعا قانشا تۋريست كەلگەنى تۋرالى ناقتى مالىمەت جوق ەكەندىگىن اتاپ وتەدى. ويتكەنى، بۇل باعىتتا جەكە رەسمي ستاتيستيكا جۇرگىزىلمەيدى.

«ءبىراق، جالپى تۋريزم سالاسىنداعى كورسەتكىشتەرگە قاراپ، بۇل باعىتتىڭ دا قارقىندى دامىپ جاتقانىن بايقاۋعا بولادى. قازاقستانعا كەلەتىن تۋريستەردىڭ باسىم بولىگى رەسەي، قىتاي، جانە گەرمانيا سياقتى ەلدەردەن كەلەدى. ولاردىڭ اراسىندا ەتنوتۋريزمگە قىزىعۋشىلىق تانىتاتىندار دا از ەمەس. ودان باسقا، اراب ەلدەرىنەن كەلەتىن تۋريستەردىڭ ەتنوتۋريزمگە قىزىعۋشىلىعى جوعارى. قازاقستاننىڭ باي مادەني مۇراسى مەن اسەم تابيعاتى شەتەلدىك تۋريستەردىڭ نازارىن اۋدارادى جانە بۇل سالا الداعى ۋاقىتتا ودان ءارى دامي بەرەتىنىنە سەنىم مول»، - دەدى مينيسترلىكتەن.

اۆتور

مارلان جيەمباي