ەلىمىزدىڭ قاي وڭىرىندە جاڭا ستاديون سالىنىپ، ەسكىلەرى جاڭارتىلادى

استانا. KAZINFORM - وسى جىلدىڭ ناۋرىزىندا بۋرابايدا وتكەن ۇلتتىق قۇرىلتايدىڭ 4-وتىرىسىندا مەملەكەت باسشىسى قاسىم-جومارت توقايەۆ ەلىمىزدە فۋتبولدى دامىتۋ ماسەلەسىنە نازار اۋدارتقان بولاتىن.

- ەلىمىزدە فۋتبولدى دامىتۋعا باسا ءمان بەرۋ كەرەك دەپ سانايمىن. دەمەۋشىلەر قارجىسى ەسەبىنەن وبلىستىق ستاديونداردىڭ كوپشىلىگىن جاڭعىرتۋ قاجەت نەمەسە جاڭا فۋتبول ستاديوندارىن سالۋدى قولعا العان ءجون. بۇل ماسەلەنى باقىلاۋدا ۇستايمىن، - دەگەن ەدى پرەزيدەنت.

وسىعان وراي سپورت جانە تۋريزم مينيسترلىگىنە ساۋال جولداپ، ەلىمىزدىڭ قاي وڭىرىندە جاڭا ستاديون سالىنىپ، ەسكىلەرى جاڭارتىلاتىندىعىن سۇراپ بىلگەن ەدىك.

سونىمەن ۆەدومستۆو مالىمەتىنشە، رەسپۋبليكادا 28 نەگىزگى ستاديون جۇمىس ىستەيدى. بۇل رەتتە 14 جاڭا ستاديون سالۋ قاجەت. جۇمىس ىستەپ تۇرعان 11 ستاديون جوندەۋدى نەمەسە قايتا جاڭارتۋدى تالاپ ەتەدى.

جالپى، بۇگىندە 9 ستاديون سالۋ ءۇشىن قاجەتتى ءىس-شارالار جۇرگىزىلىپ جاتىر. ونىڭ ىشىندە مىنا ەكى نىساننىڭ قۇرىلىس جۇمىستارى قولعا الىنعان:

قىزىلوردا قالاسىندا 10 مىڭ ورىن تريبۋناسى بار (جەر ۋچاسكەسىنىڭ اۋدانى - 0,75 گەكتار) ستاديون، اياقتالۋ مەرزىمى - 2025 -جىلعى شىلدە؛
استانا قالاسىندا (ق. مۇڭايتپاسوۆ اتىنداعى) شامامەن 3600 ورىن (جەر ۋچاسكەسى - 2,19 گەكتار) تريبۋنالارى بار، جۇمىستار جۇرگىزىلىپ جاتىر. قۇرىلىس جۇمىستارىنىڭ اياقتالۋ مەرزىمى - 2026 -جىلدىڭ 1- توقسانى.

Фото: Үкімет

سونىمەن قاتار مىنا قالالاردا 7 ستاديون بويىنشا جوبالىق-سمەتالىق قۇجاتتاما ازىرلەۋ قولعا الىنعان:

اقتوبە قالاسىندا 35 مىڭ ورىندىق، جەر ۋچاسكەسىنىڭ اۋدانى - 25 گەكتار، ساراپتاما قورىتىندىسىن الۋ مەرزىمى - 2025 -جىلعى جەلتوقسان؛
پەتروپاۆل قالاسىندا (بەرەكە شاعىن اۋدانىندا) ۋەفا- نىڭ ءۇشىنشى ساناتتى 5000 ورىندىق فۋتبول ارەناسى (فۋتبول اكادەمياسىمەن)، جەر ۋچاسكەسىنىڭ اۋدانى - 10,0 گەكتاردان استام، ساراپتاما قورىتىندىسىن الۋ مەرزىمى - 2025 -جىلعى جەلتوقسان؛

Фото: Атырау облыстық дене шынықтыру, спорт және туризм басқармасы

اتىراۋ قالاسىندا 12 مىڭ ورىندىق، جەر ۋچاسكەسىنىڭ اۋدانى - 9,9 گەكتار، ساراپتاما قورىتىندىسىن الۋ مەرزىمى - وسى جىلدىڭ قىركۇيەگى؛
اقتاۋ قالاسىندا 10 مىڭ ورىندىق، جەر ۋچاسكەسىنىڭ اۋدانى - 12 گەكتار، ساراپتاما قورىتىندىسىن الۋ مەرزىمى - 2025 -جىلعى جەلتوقسان؛
شىمكەنت قالاسىندا 35 مىڭ ورىندىق، جەر ۋچاسكەسىنىڭ اۋدانى - 20,1 گەكتار، ساراپتاما قورىتىندىسىن الۋ مەرزىمى - 2025 -جىلعى جەلتوقسان؛
سەمەي قالاسىندا 12,5 مىڭ ورىندىق، جەر ۋچاسكەسىنىڭ اۋدانى - 5,84 گەكتار ساراپتاما قورىتىندىسىن الۋ مەرزىمى - 2025 -جىلعى جەلتوقسان؛
وسكەمەن قالاسىندا 5 مىڭ ورىندىق جابىق ستاديون، جەر ۋچاسكەسىنىڭ اۋدانى - 9,8 گەكتار، ساراپتاما قورىتىندىسىن الۋ مەرزىمى - 2025 -جىلعى قىركۇيەك.

Фото: olympic.kz

- جوبالاۋ- سمەتالىق قۇجاتتامانى ازىرلەۋ جەرگىلىكتى بيۋدجەتتەردەن قارجىلاندىرىلادى. ۋەفا تالاپتارىنا سايكەس كەلەتىن 5 جاڭا ستاديون سالۋعا قاتىستى (10 مىڭ جانە ودان دا كوپ ورىندىق تريبۋنالارى بار) ماسەلە بويىنشا شەشىم قابىلداۋ ساتىسىندا تۇر، - دەدى مينيسترلىكتەن.

مينيسترلىك استانا قالاسىندا قۇنى 13 ميلليارد تەڭگە بولاتىن 30 مىڭ ورىنعا ارنالعان «استانا- ارەنا» جانە پەتروپاۆل قالاسىندا قۇنى 1,6 ميلليارد تەڭگە بولاتىن «قاراساي» ستاديونىن (2-كەزەڭ) جاڭارتۋ جۇمىستارى اياقتالعانىن اتاپ وتەدى.

مۇنان بولەك، جەكە ينۆەستورلار ەسەبىنەن ەكى قالادا ستاديون سالۋ ءۇشىن جوبالىق-سمەتالىق قۇجاتتار ازىرلەنگەن. ناقتىراق ايتقاندا، ورال قالاسىندا (اتويان اتىنداعى) 8320 ورىندىق جانە اقتاۋ قالاسىندا («جاس قانات» ) 3275 ورىندىق تريبۋنالارى بار ستاديون قۇرىلىسىنا مەملەكەتتىك ساراپتامانىڭ وڭ قورىتىندىلارى الىنعان.

Фото: olympic.kz

سونداي-اق اتىراۋ قالاسىنداعى «مۇنايشى» ستاديونىن رەكونسترۋكسيالاۋعا جانە الماتى قالاسىنداعى ورتالىق ستاديوندى جاڭارتۋعا جوبالاۋ- سمەتالىق قۇجاتتاما ازىرلەنىپ جاتىر.

Фото: Айзада Агильбаева / Kazinform

ال شىمكەنت (ق. مۇڭايتپاسوۆ اتىنداعى ستاديون)، قاراعاندى («شاحتەر» )، وسكەمەن («شىعىس» )، جەزقازعان («مەتاللۋرگ»)، پاۆلودار («ورتالىق») قالالارىندا ستاديوندارعا قاتىستى جوبالاۋ-سمەتالىق قۇجاتتاما الداعى ۋاقىتتا ازىرلەنبەك.

ايتا كەتسەك، جۋىردا مەملەكەت باسشىسى ەلوردادا جەكە ينۆەستوردىڭ قارجىسىنا سالىنىپ، بيىل پايدالانۋعا بەرىلگەن بەكزات ساتتارحانوۆ اتىنداعى سپورت كەشەنىن ارالاپ كوردى.

اۆتور

مارلان جيەمباي