ەلىمىزدىڭ ەڭ قارت تۇرعىنى باتا بەردى

استانا. KAZINFORM - ەلىمىزدە قارتتاردىڭ دەنى تۇركىستان وبلىسىندا تۇرادى. ەڭ ۇلكەن قارت - 114 جاستاعى تۇيمەگۇل تەمىربايەۆا اپامىز. بۇل تۋرالى Jibek Joly تەلەارناسى حابارلايدى.

ەلىمىزدە 100 جاستان اسقان 423 ادام بار. ولاردىڭ دەنى تۇركىستان وبلىسىندا تۇرادى. بۇل وڭىردە ءبىر عاسىر جاساعان 64 قاريا ءومىر ءسۇرىپ جاتىر. ال، تىزىمدە ەكىنشى بولىپ الماتى قالاسى تۇر، شاھاردا 48 ادام تىركەلگەن. ەگدە جاستاعى كىسىلەردىڭ سانى بويىنشا ءۇشىنشى ورىندا الماتى وبلىسى، ءوڭىردىڭ 38 تۇرعىنى 100 جاستان اسقان.

ايتا كەتسەك، ەلىمىز بويىنشا قاريالاردىڭ ەڭ ۇلكەنى - 114 جاستاعى تۇيمەگۇل تەمىربايەۆا. ول ۇلىتاۋ وبلىسىندا تۇرادى. ودان سوڭ 112 جاستاعى پاۆلودار وبلىسىنىڭ تۇرعىنى كۇلجاميا احمەديانوۆا جانە 110 جاستاعى تۇركىستان وبلىسىنىڭ تۇرعىنى ۋنگاي بەگبايەۆا.

«وتانىمىز تىنىش بولسىن، دەنساۋلىعىمىز مىقتى بولسىن. حالقىمىز امان، بىرلىگىمىز ءبۇتىن بولسىن»، - دەپ باتاسىن بەردى 114 جاسقا كەلگەن تۇيمەگۇل تەمىربايەۆا.

ايتا كەتسەك، قازاقستان ب ۇ ۇ ستاندارتى بويىنشا قارتايعان ەلدەر قاتارىنا كىرەدى.

اۆتور

داۋلەت ىزتىلەۋ