ەلىمىزدەگى ەڭ قارت تۇرعىن ۇلىتاۋ وبلىسىندا تۇرادى

استانا. KAZINFORM - ەلىمىزدە 100 جاساعان جانە ودان دا ۇلكەن جاستاعى 423 ازامات بار. جاسى ەڭ ۇلكەن تۇرعىن ۇلىتاۋ وبلىسىندا تۇرادى.

اق جاۋلىقتى اجەمىز بيىل 114 جاسقا تولعان تۋعان كۇنىن اتاپ ءوتتى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتتى.

ادەتتە، ەڭ كوپ ءومىر سۇرەتىندەر ەلىمىزدىڭ وڭتۇستىك وڭىرىندە كوبىرەك دەۋگە بولادى. ماسەلەن، تۇركىستان وبلىسىندا 100 جانە ودان جوعارى جاستاعى 64 ادام بار ەكەنىن ايتا كەتۋ كەرەك.

ۇزاق ءومىر سۇرۋشىلەر سانى بويىنشا ەلىمىزدەگى ەكىنشى ورىندا ەڭ ءىرى قالامىزدىڭ ءبىرى - الماتى. قازىر الماتى قالاسىندا 100 جاستان اسقان 48 ادام تۇرادى. ۇزاق ءومىر سۇرەتىندەر سانى بويىنشا ءۇشىنشى ورىندا الماتى وبلىسى تۇر، وندا 100 جانە ودان جوعارى جاستاعى 38 ادام تۇرادى. ەڭ قارت قازاقستاندىقتاردىڭ ۇشتىگىنە ۇلىتاۋ وبلىسىنىڭ تۇرعىنى - 114 جاس، پاۆلودار وبلىسى - 112 جاس، تۇركىستان وبلىسى - 110 جاس كىردى.

ەستەرىڭىزگە سالا كەتەيىك، جىل سايىن بۇكىل الەمدە، ونىڭ ىشىندە قازاقستاندا دا 1 -قازاندا حالىقارالىق قارتتار كۇنى اتاپ وتىلەدى. بۇل مەرەكەنى 1990 -جىلى 14 -جەلتوقساندا بىرىككەن ۇلتتار ۇيىمىنىڭ باس اسسامبلەياسى 45 سەسسيادا جاريالادى.

ونى وتكىزۋدىڭ باستى ماقساتى - ەگدە جاستاعى ادامداردىڭ مەملەكەت پەن قوعام الدىنداعى ەڭبەگىن قۇرمەتتەۋ جانە تانۋ، سونداي- اق ولاردىڭ پروبلەمالارى مەن قاجەتتىلىكتەرىنە، ءومىر ءسۇرۋ ساپاسىن ارتتىرۋ قاجەتتىلىگىنە نازار اۋدارۋ، ولارعا جالپىعا بىردەي قامقورلىق كورسەتۋ.