ەلىمىزدەگى شەتەل ۋنيۆەرسيتەتى فيليالدارىندا «قازاق ءتىلى»، «قازاقستان تاريحى» ءپانىن وقىتۋ مىندەتتەلەدى

استانا. KAZINFORM - بۇگىندە قازاقستاندا 27 شەتەلدىك جوعارى وقۋ ورنىنىڭ فيليالى اشىلعان.

«نەگىزى «فيليال» اتاۋى كوپشىلىكتىڭ قابىلداۋىنا ىڭعايلىراق بولۋى ءۇشىن قولدانىلادى. ال شىن مانىندە بۇلاردى «ستراتەگيالىق سەرىكتەستىك» دەپ اتاۋ دۇرىسىراق بولادى. كوپ جاعدايدا قازاقستاندىق جوعارى وقۋ ورنى نەگىزىندە شەتەلدىك ۋنيۆەرسيتەتتەردىڭ وقۋ باعدارلامالارىن وقىتاتىن بولەك بىرلىك قۇرىلادى. بۇل فيليالدار ۇلتتىق زاڭناماعا سايكەس ادىلەت مينيسترلىگىندە ەسەپتىك تىركەۋگە تۇرادى. سونىمەن قاتار، باسقا ج و و- نان تاۋەلسىز بولەك ورنالاسقان فيليالدار دا بار، بۇلاردىڭ ءبىر بولىگى جەكە زاڭدى تۇلعا رەتىندە تىركەلسە، باسقالارى ەسەپتىك تىركەۋگە تۇرادى»، - دەپ ءتۇسىندىردى عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى جاننا ەسىنبايەۆا اگەنتتىك جولداعان ساۋال جاۋابىندا.

ونىڭ ايتۋىنشا، ەلىمىزدە شەتەل ۋنيۆەرسيتەتتەرىنىڭ فيليالىن اشۋعا ەكى جاقتان دا قىزىعۋشىلىق بار. باستاپقىدا قازاقستاندىق ج و و شەتەلدىك سەرىكتەستەرىنە فيليال اشۋ تۋرالى ۇسىنىس جاساعان بولسا، سوڭعى ۋاقىتتا كەيبىر شەتەلدىك ۋنيۆەرسيتەتتەر عىلىم جانە جوعارى ءبىلىم مينيسترلىگىنە تىكەلەي نەمەسە قازاقستاندىق ۋنيۆەرسيتەتتەرگە ءتيىستى ۇسىنىسپەن كەلىپ جاتىر.

«وتاندىق جانە شەتەلدىك ۋنيۆەرسيتەتتەردىڭ فيليالدارىنىڭ قىزمەتى 2007 -جىلعى 27-شىلدەدەگى №319 ءبىلىم تۋرالى زاڭىنا سايكەس رەتتەلەدى. شەتەلدىك فيليالدار ق ر جوعارى ءبىلىم زاڭناماسىندا كوزدەلگەن ستاندارتتار مەن تالاپتاردى ساقتاۋعا مىندەتتى. سونداي-اق، مينيسترلىك زاڭنامادا بەلگىلەنگەن تارتىپپەن ءتيىستى باقىلاۋ جۇرگىزەدى. سونىمەن قاتار ءبىلىم بەرۋ قىزمەتى ءبىلىم بەرۋ قىزمەتىن جۇرگىزۋگە ارنالعان ليتسەنزيا الۋ نەگىزىندە جۇزەگە اسىرىلادى»، - دەيدى ول.

ەلىمىزدە اشىلعان شەتەلدىك ۋنيۆەرسيتەتتەر كەلەسى تالاپتاردى ورىنداپ، شارتتاردى قامتاماسىز ەتۋى ءتيىس:

- ءبىلىم بەرۋ باعدارلامالارىنىڭ تىزىلىمگە سايكەس كەلۋى؛

- وقىتۋشىلار قۇرامى؛

- وقۋ، وقۋ- ادىستەمەلىك جانە عىلىمي ادەبيەتتەرمەن قامتىلعان كىتاپحانا قورى؛

- وقۋ كورپۋستارى مەن ءۇي- جايلارى (اۋديتوريالار، كابينەتتەر، شەبەرحانالار، سپورت زالدارى، ستۋديالار، زەرتحانالار، اكت زالى، كىتاپحانا)؛

- ءبىلىم الۋشىلاردىڭ تاماقتانۋىن جانە مەديتسينالىق قىزمەت الۋىن ۇيىمداستىرۋ ءۇشىن قاجەتتى جاعداي؛

- مۇقتاج ءبىلىم الۋشىلاردىڭ تۇرۋى ءۇشىن جاعدايلار (جاتاقحانالار/حوستەلدەر/ قوناق ۇيلەر)؛

- ينتەرنەت؛

- كومپيۋتەرلىك كابينەتتەر، كومپيۋتەرلەر، مامانداندىرىلعان ليتسەنزيالىق باعدارلامالار، وقۋ- زەرتحانالىق جانە ماتەريالدىق-تەحنيكالىق بازا، ءبىلىم بەرۋ باعدارلامالارىن ىسكە اسىرۋ ءۇشىن قاجەتتى جابدىقتار.

«سونداي-اق، جوعارى جانە جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك جالپىعا مىندەتتى ستاندارتى بويىنشا دا قويىلاتىن تالاپتار بار. ولاردىڭ نەگىزگىسى وقۋ باعدارلاماسىنا «قازاق ءتىلى» جانە «قازاقستان تاريحى» پاندەرىن مىندەتتى تۇردە ەنگىزۋ. ودان بولەك، فيليالدىڭ پروفەسسورلار- وقىتۋشىلار قۇرامىنىڭ جالپى سانىنىڭ كەمىندە 0- ىن شەتەلدىك پروفەسسورلار- وقىتۋشىلار بولۋى ءتيىس. ارينە، فيليالدارعا جەرگىلىكتى ماماندار دا تارتىلادى»، - دەيدى ج. ەسىنبايەۆا.

اۆتور

داۋلەت ىزتىلەۋ