ەلىمىزدىڭ ءتورت وبلىسىندا - 3 گرادۋسقا دەيىن ۇسىك جۇرەدى - قازگيدرومەت

استانا. KAZINFORM - «قازگيدرومەت» ر م ك-سى مامىردىڭ 11 ى كۇنگى كۇن رايى بولجامىن جاريالادى.

كاسىپورىننىڭ بولجامىنا قاراعاندا، بۇگىن اتموسفەرالىق فرونتالدى بولىكتەردىڭ اسەرىنەن ەلىمىزدىڭ باسىم بولىگىندە كۇن قۇبىلمالى بولادى. ەلدىڭ باسىم بولىگىندە نايزاعاي ويناپ، جاڭبىر جاۋادى. وڭتۇستىك، وڭتۇستىك-شىعىس، شىعىستا قاتتى جاڭبىر، بۇرشاق جاۋادى.

رەسپۋبليكامىزدىڭ باتىسى، سولتۇستىك- باتىسى، سولتۇستىگىندە انتيسيكلون جوتاسىنىڭ اسەرىنەن كۇن جاۋىن-شاشىنسىز بولادى. رەسپۋبليكا بويىنشا جەل كۇشەيىپ، وڭتۇستىگىندە، وڭتۇستىك- شىعىسى، شىعىسىندا داۋىل تۇرادى، باتىسى، سولتۇستىك-باتىسىندا تۇندە جانە تاڭەرتەڭ تۇمان تۇسەدى.

تۇندە باتىس قازاقستان وبلىسىنىڭ سولتۇستىگىندە، شىعىسىندا، اقتوبە وبلىسىنىڭ سولتۇستىگىندە، قوستاناي وبلىسىنىڭ باتىسىندا، شىعىسىندا، اقمولا وبلىسىنىڭ باتىسىندا، وڭتۇستىگىندە، سولتۇستىك قازاقستان وبلىسىنىڭ وڭتۇستىگىندە 1-3 گرادۋس ۇسىك جۇرەدى.

قاراعاندى وبلىسىنىڭ باتىسىندا، وڭتۇستىگىندە، ۇلىتاۋ وبلىسىنىڭ ورتالىعىندا، اباي، اقتوبە وبلىستارىنىڭ وڭتۇستىگىندە، باتىس قازاقستان وبلىسىنىڭ وڭتۇستىگىندە، ورتالىعىندا، قىزىلوردا وبلىسىنىڭ باتىسىندا، ورتالىعىندا ءورت قاۋپى ساقتالادى، اتىراۋ وبلىسىنىڭ باتىسىندا دا ءورت قاۋپى ساقتالادى. تۇركىستان وبلىسىنىڭ ءشولدى اۋداندارىندا توتەنشە ءورت قاۋپى ساقتالادى.

اۆتور
ايدار وسپاناليەۆ