ەلىمىزدىڭ ءبىرقاتار وڭىرىندە سپورت نىساندارى مەملەكەت مەنشىگىنە قايتارىلدى

استانا. KAZINFORM - ەلىمىزدىڭ ءبىرقاتار وڭىرىندە سپورت نىساندارى مەملەكەت مەنشىگىنە قايتارىلدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.

«5 وڭىردە سپورت وبەكتىلەرىن ءتيىمسىز باسقارۋ تاۋەكەلدەرى بەلگىلەنگەن. تالداۋ ناتيجەلەرى بويىنشا ءبىرقاتار نىسان مەملەكەت مەنشىگىنە قايتارىلدى»، - دەدى دانيار بيگايداروۆ.

ونىڭ دەرەگىنشە، مىنا نىساندار مەملەكەت مەنشىگىنە قايتارىلدى:

- اتىراۋ وبلىسىندا «مۇز سارايى» (اۋدانى 6 مىڭ شارشى مەتر) سپورت نىسانى. ول 2018 -جىلى «بايبارىس- اتىراۋ» حوككەي كلۋبىنىڭ باسقارۋشىسى - جەكە كاسىپكەرگە نەگىزسىز بەرىلگەن.

- الماتى قالاسىندا بۇرىن مەملەكەتتىك- جەكەشەلىك ارىپتەستىك اياسىندا وتەۋسىز نەگىزدە جەكە ۇيىمنىڭ باسقارۋىندا بولعان «حالىق ارەنا» جانە «الماتى ارەنا» قۇرىلىستارى (جەر ۋچاسكەسىنىڭ اۋدانى 15,9042 گەكتار، ءۇي- جايلاردىڭ اۋدانى 136112,7 شارشى مەتر) .

- باتىس قازاقستان وبلىسىندا جەكە ۇيىمنىڭ سەنىمگەرلىك باسقارۋىنداعى فۋتبول الاڭى بار ستاديون.

- شىمكەنت قالاسىندا 7 جىل بۇرىن 128 ميلليون تەڭگەگە ساتىلعان «مۇز سارايى» سپورت كەشەنىنىڭ 67 پايىز ۇلەسى.

- جامبىل وبلىسىندا 2017 -جىلى جەكەشەلەندىرىلگەن جانە جاۋاپكەرشىلىگى شەكتەۋلى سەرىكتەستىك بولىپ قايتا قۇرىلعان «ايشا ءبيبى» سۋ پولوسى بويىنشا كلۋب.

«سونداي-اق، جالعان قۇجاتتار نەگىزىندە سپورتتىق اتاقتار بەرۋ فاكتىلەرى انىقتالدى»، - دەدى ول.

اۆتور

مارلان جيەمباي