ەلىمىزدىڭ بازارلارىندا يمپورتتالعان ەت ساتىلمايدى – ا ش م ۆيتسە-ءمينيسترى

استانا. KAZINFORM - بازارلاردا يمپورتتالعان ەت مۇلدە ساتىلمايدى. بۇل تۋرالى ق ر اۋىل شارۋاشىلىعى ۆيتسە- ءمينيسترى ازات سۇلتانوۆ ايتتى.

«اتامەكەن» ۇ ك پ سيەز الدى جيىنى كەزىندە Kazinform ءتىلشىسى ۆيتسە- مينيستردەن وزىمىزدە مال شارۋاشىلىعىنا جەتكىلىكتى جايىلىم، قولايلى كليمات بولا تۇرا، ۋرۋگۆاي، برازيليا سەكىلدى الىس شەتەلدەردەن نە سەبەپتى ەت تاسيتىنىمىزدى، ول ەتتەر قايدا جۇمسالاتىنى جايلى سۇراعان ەدى.

«بىرىنشىدەن، بۇل يمپورتتىڭ كولەمى (جالپى ەلدە تۇتىنىلاتىن ەتتىڭ كولەمىنە شاققاندا - رەد) از. نە ءۇشىن ءبىز ەت يمپورتتايمىز؟ ۋرۋگۆاي مەن برازيليادان اكەلىنەتىن ەت - مۇزداتىلعان سۇرپ ەت (سۇيەگىنىن سىلىنعان ەت - رەد). جارتى ۇشا بولىپ كەلەدى. ەلىمىزگە اكەلىنگەن سوڭ ول قايتا وڭدەۋگە جىبەرىلەدى: كونسەرۆىلەنگەن ەت، بۇقتىرىلعان ەت جاسالادى. نە ءۇشىن بۇنداي ەت قولدانىلادى دەسەڭىز، بۇل ەتتىڭ وزىندىك قۇنى الدەقايدا ارزان تۇسەدى. ال ەندى، ىشكى نارىققا شىعاتىن ەت - ول تەك قازاقستاندىق ءونىم. بازارلاردا ساتىلاتىن ەتتىڭ ءبارى - اۋىلداعى شارۋالاردىڭ، وتاندىق فەرمەرلەردىڭ وسىرگەن مالىنىڭ ەتى. ەشقانداي ۋرۋگۆايدىڭ، برازيليانىڭ ەتى وندا ساتىلمايدى. ونداي ەتتى تەك قايتا وڭدەۋمەن اينالىساتىن كاسىپكەرلەر شيكىزات رەتىندە اكەلىپ جاتىر»، - دەدى ۆيتسە- مينيستر.

ايتا كەتەيىك، كەشە «اتامەكەن» ۇ ك پ XII سەزى ءوتتى. وندا كاسىپكەرلەردى تولعاندىرعان سۇراقتار تالقىلانىپ، 204 وزەكتى ماسەلە ۇكىمەتكە جولداندى.

سونداي-اق، بۇگىن استانادا مەملەكەتتىك ورگانداردىڭ، بيزنەس- قاۋىمداستىق وكىلدەرىن جانە قازاقستاننىڭ بارلىق ءوڭىرىنىڭ تابىستى كاسىپكەرلەرىن بىرىكتىرگەن «ادال ازامات. ادال ەڭبەك. ادال بيزنەس» شاعىن جانە ورتا بيزنەس فورۋمى ءوتتى.

اۆتور

ەربول جانات