ەلىمىزدىڭ ايماقتارىندا شۇجىق قانشادان ساتىلىپ جاتىر

اقتوبە. KAZINFORM - قازاقستاندىقتار ءجيى تۇتىناتىن تاعامنىڭ ءبىرى - شۇجىق. مەرەكە مەن وتباسىلىق وتىرىستا كەسىپ قويىلعان شۇجىق داستارحاننىڭ ءسانىن كەلتىرىپ تۇرادى. كەيبىرى تاڭعى اسقا تىسكەباسار جاساپ، تۇسكە دەيىن توق ءجۇرۋدىڭ قامىن ويلايدى. پىسكەن شۇجىق پا، جوق كەپتىرىلگەن شۇجىق پا؟ باعاسىن Kazinform اگەنتتىگى سالىستىرىپ كوردى.

پىسكەن شۇجىقتىڭ ەڭ ارزانى قوستانايدا بولىپ شىقتى. مۇندا تارتىلعان ەتتەن جاسالعان ءونىمنىڭ كەلىسى 935-2900 تەڭگە. ال جارتىلاي ىستالعان شۇجىق باعاسى 3350-5400 دەپ كورسەتىلگەن.

اتىراۋ قالاسىندا پىسكەن ەتتەن جاسالعان شۇجىقتىڭ كەلىسى 950 تەڭگەدەن باستالعانىمەن، 5200 تەڭگەگە دەيىن جەتەدى. جارتىلاي ىستالعان ءونىم بولسا 1800-2400 تەڭگە.

شۇجىق باعاسى شامالاس قالالار دا بار. ماسەلەن پىسكەن ەتتەن جاسالعان شۇجىق استانادا كەلىسىنە 1100-2400 تەڭگە، الماتىدا 1100-3500 تەڭگە، ال پەتروپاۆلدا كەلىسىنە 1100 تەڭگە. جارتىلاي ىستالعان شۇجىقتىڭ كەلىسى وڭتۇستىك استانادا 2300-دەن باستالىپ، 8000 تەڭگەگە جەتەدى. استانالىقتار بولسا كەلىسىن 2700-5000 تەڭگەگە ساتىپ الىپ ءجۇر.

ەلىمىزدەگى قىزىلوردا، پاۆلودار، جەزقازعان، تاراز، سەمەي جانە قونايەۆ قالالارىندا پىسكەن ەتتەن جاسالعان شۇجىقتىڭ كەلىسى شامامەن 1200-1500 تەڭگە تۇرادى. ءسال قىمباتتاۋى 2300-4000 تەڭگەدەن ساتىلادى. ال جارتىلاي ىستالعان ءونىم باعاسى اركەلدى. پاۆلوداردا - 1900-6400 تەڭگە، سەمەيدە- 3000-5200 تەڭگە، قىزىلوردادا - 2000-6500 تەڭگە، قونايەۆتا - 2300-8000 تەڭگە، جەزقازعاندا - 2700-5000 تەڭگە، سونىمەن بىرگە تارازدا - 2500-2700 تەڭگە.

تالدىقورعاندا شۇجىقتىڭ ارزانى كەلىسىنە 1400 تەڭگە بولسا، ساپاسىنا قاراي 4000 تەڭگەگە ساتىپ الۋعا بولادى. جارتىلاي ىستالعانىنىڭ كەلىسى 2500-8000 مىڭ تەڭگە تۇرادى. وسكەمەندە پىسكەن ەتتەن جاسالعان شۇجىقتىڭ كەلىسى 1600-7900 تەڭگە بولسا، جارتىلاي ىستالعانى 3900-5400 تەڭگە.

ەلىمىزدىڭ باتىس وڭىرلەرى، اتاپ ايتقاندا اقتاۋ، اقتوبە جانە ورالدا پىسكەن ەتتەن جاسالعان شۇجىقتىڭ كەلىسى 1700-3400 تەڭگە. ال جارتىلاي ىستالعان ءونىم باعاسى 1800 تەڭگەدەن باستالىپ، 6500 تەڭگەگە دەيىن جەتەدى.

كوكشەتاۋدا پىسكەن ەتتەن جاسالعان شۇجىقتىڭ كەلىسى 2400-3400 تەڭگەگە ساتىلىپ جاتىر. ال جارتىلاي ىستالعانى 3400-5400 تەڭگە تۇرادى. تۇركىستاندىقتار بولسا پىسكەن ەتتەن جاسالعان شۇجىقتى 2700، ال جارتىلاي ىستالعانىن 2500 تەڭگەگە ساتىپ الا الادى.

وزگە وڭىرلەرگە قاراعاندا شىمكەنتتە باعا وزگەشە. مۇندا پىسكەن ەتتەن جاسالعان شۇجىق كەلىسى 2900-3700 تەڭگە، ال جارتىلاي ىستالعان شۇجىق كەلىسى 2570 تەڭگەدەن باستالىپ 4200 تەڭگەگە جەتكەن.

ەلىمىز بويىنشا ەڭ قىمبات شۇجىق قاراعاندىدا بولىپ شىقتى. مۇندا پىسكەن ەتتەن جاسالعان شۇجىق 3000-4000 تەڭگە، ال جارتىلاي ىستالعانى ورتا ەسەپپەن 4500-5000 تەڭگە.

ايتا كەتەيىك، Kazinform بۇعان دەيىن ەلىمىزدەگى ىرىمشىك باعاسىن سالىستىردى.