ەلىمىزدەگى اتوم ەلەكتر ستانسيالارى تولىققاندى جۇمىس ىستەۋى ءۇشىن قانشا مامان قاجەت

استانا. KAZINFORM – ق ر ەنەرگەتيكا مينيسترلىگى قازاقستانداعى اتوم ەلەكتر ستانسيالارىنىڭ تولىققاندى جۇمىس ىستەۋى ءۇشىن قانشا مامان قاجەت ەكەنىن، سونداي-اق ەلەكتر ستانسياسىنىڭ قىزمەتكەرلەرىن وقىتۋ بويىنشا جۇرگىزىلىپ جاتقان جۇمىستاردى ايتىپ بەردى.

ەنەرگەتيكا مينيسترلىگىنىڭ مالىمەتىنشە، اتوم ەلەكتر ستانسياسىن پايدالانۋ كەزىندە ورتا ەسەپپەن 2 مىڭعا جۋىق جوعارى جانە ورتا ارناۋلى ءبىلىمى بار كادرلار قاجەت.

«اتومدىق ماماندىقتار بويىنشا ءبىلىمى بار زاۋىت قىزمەتكەرلەرى ا ە س جالپى پەرسونالىنىڭ شامامەن 20 پايىزىن قۇرايدى»، - دەدى ەنەرگەتيكا مينيسترلىگى اگەنتتىك ءتىلشىمسىنىڭ ساۋالىنا بەرگەن جاۋابىندا.

ۆەدومستۆوداعىلار الداعى ۋاقىتتا اتوم ەنەرگەتيكاسىن دامىتۋدىڭ مەملەكەتتىك باعدارلاماسى اياسىندا كادرلاردى دايارلاۋدىڭ ارنايى جوسپارىن جەكە ازىرلەپ، ىسكە قوساتىندارىن اتاپ ءوتتى.

قازىر قازاقستاندا «فيزيكا»، «تاۋ-كەن ءىسى جانە تاۋ-كەن ءىسى»، «يادرولىق فيزيكا جانە يادرولىق ەنەرگەتيكا»، «اتوم ونەركاسىبىنىڭ ماتەريالدارى مەن ماتەريالدىق تەحنولوگيالارى» جانە «ۋران ونىمدەرىن ءوندىرۋدىڭ يننوۆاتسيالىق ادىستەرى» ماماندىقتارى بويىنشا كادرلار دايارلاۋ جۇزەگە اسىرىلادى. 2023-2024 وقۋ جىلىنا مەملەكەتتىك ءبىلىم بەرۋ تاپسىرىسى شەڭبەرىندە ءبىلىم بەرۋ باعدارلامالارىنىڭ جوعارىدا اتالعان توپتارى بويىنشا 3664 گرانت بولىنگەن (ونىڭ 3258- ءى باكالاۆريات، 330-ى ماگيستراتۋرا، 76-سى دوكتورانتۋرا).

قازاقستاندىق جوعارى وقۋ ورىندارىندا اتوم جانە اتوم ونەركاسىبى ماماندارىن دايارلاۋ 18 ءبىلىم بەرۋ باعدارلاماسى مەن قوس ديپلومدىق باعدارلامالار نەگىزىندە جۇزەگە اسىرىلاتىنىن اتاپ وتكەن ءجون.

ستۋدەنتتەر وندىرىستىك تاجىريبەدەن «ءۇلبى مەتاللۋرگيالىق زاۋىتى» ا ق (وسكەمەن ق. )، يادرولىق فيزيكا ينستيتۋتى ر م ك (الماتى ق. )، ق ر ۇلتتىق يادرولىق ورتالىعى ر م ك (كۋرچاتوۆ ق.) وتەدى.

اۆتور

ورالحان قوجانوۆ