ەلىمىزدىڭ 7 قالاسى مەن 3 وبلىسىندا ساباق ونلاين وتەدى

12-جەلتوقساندا ەلىمىزدىڭ 7 قالاسى مەن 3 وبلىسىندا وقۋشىلار ساباقتى قاشىقتان وقيتىن بولدى، دەپ حابارلايدى Kazinform.

ءبىلىم باسقارماسىنىڭ حابارلاۋىنشا، استانادا ايازدىڭ كۇشەيۋىنە بايلانىستى 12-جەلتوقساندا ءبىرىنشى اۋىسىمداعى 0-11-سىنىپ وقۋشىلارى مەن كوللەدجدەردىڭ 1-2-كۋرس ستۋدەنتتەرى ساباقتى ونلاين وقيتىن بولدى.

اقتوبە قالالىق ءبىلىم ءبولىمىنىڭ حابارلاۋىنشا، 12-جەلتوقسان كۇنى اۋا رايىنىڭ قولايسىزدىعىنا بايلانىستى ءبىرىنشى اۋىسىمنىڭ ساباعى ونلاين فورماتقا كوشىرىلدى. 0-9-سىنىپ وقۋشىلارى قاشىقتان وقيدى.

قاراعاندى قالاسىنىڭ ءبىلىم ءبولىمى دە 12-جەلتوقساندا قاتتى ايازعا بايلانىستى ءبىرىنشى جانە ەكىنشى اۋىسىمنىڭ 0-11-سىنىپ وقۋشىلارىنىڭ ساباعى قاشىقتان وقۋ فورماتىنا كوشىرىلگەنىن حابارلادى.

كوكشەتاۋدا ℃36- ايازعا بايلانىستى ءبىرىنشى اۋىسىمنىڭ 1-11-سىنىپ وقۋشىلارى ونلاين وقيتىن بولدى.

سونداي-اق، اقتاۋ قالاسى جانە ماڭعىستاۋ وبلىسىنداعى مەكتەپ وقۋشىلارى مەن كوللەدج ستۋدەنتتەرى قاشىقتان وقۋعا اۋىستى. سينوپتيكتەر بۇل وڭىردە قاتتى جەل سوعىپ، كوكتايعاق بولادى دەگەن بولجام جاساعان.

قوستاناي وبلىسىندا دا ۇسكىرىك اياز كۇشىنە ءمىنىپ تۇر. اۋا تەمپەراتۋراسى ℃32-، ℃34- قا دەيىن تومەندەۋىنە بايلانىستى قوستاناي قالاسىندا ءبىرىنشى اۋىسىمداعى 0-11-سىنىپ وقۋشىلارى قاشىقتان وقيتىن بولدى.

ءبىلىم باسقارماسىنىڭ حابارلاۋىنشا، وبلىستاعى اۋليەكول، قامىستى، ءجىتىقارا، مەڭدىكول، التىنسارين، بەيىمبەت مايلين اۋداندارىندا دا وقۋشىلار ساباقتى ونلاين فورماتتا وتەدى.

سينوپتيكتەردىڭ بولجامى بويىنشا، 12-جەلتوقساندا قىزىلوردا وبلىسىندا جەل سولتۇستىكتەن 9-14، وبلىستىڭ ورتالىعىندا 15-20 م/س ەكپىنمەن سوعادى، اۋانىڭ تەمپەراتۋراسى تۇندە ℃20-25-، وبلىستىڭ سولتۇستىگىندە ℃29- ، كۇندىز ℃15-20-، وبلىستىڭ وڭتۇستىگىندە ℃10-  اياز كۇتىلەدى.

وسىعان بايلانىستى، ارال، قازالى، قارماقشى، جالاعاش، سىرداريا اۋداندارى مەن قىزىلوردا قالاسىنداعى بارلىق مەكتەپتەردىڭ (مەملەكەتتىك، جەكەمەنشىك) 0-11-سىنىپ وقۋشىلارى؛ شيەلى، جاڭاقورعان اۋداندارىنداعى مەكتەپتەردىڭ (مەملەكەتتىك، جەكەمەنشىك) 0-9-سىنىپ وقۋشىلارى 12-جەلتوقسان كۇنگى ساباقتارىن قاشىقتىقتان وقىتۋ فورماتىندا وتەدى.

 

اۆتور
ەربول جانات