ەلىمىزدەن قارا مەتالل سىنىقتارىن تەمىرجولمەن اكەتۋگە تىيىم سالىنادى

 استانا. KAZINFORM - ەلىمىزدەن قارا مەتالل سىنىقتارىن تەمىر جول كولىگىمەن اكەتۋگە ۋاقىتشا تىيىم سالىنباق. بۇل جايىندا ونەركاسىپ جانە قۇرىلىس مينيسترلىگىنەن حابارلاندى.

ءتيىستى نورماتيۆتىك قۇجاتتىڭ جوباسى كوپشىلىككە ۇسىنىلدى.

الەمدىك تاجىريبەدە شيكىزات تۇرىندە قايتالاما مەتالداردى قولدانۋ - ەكولوگيالىق تازالىق پەن ونى وڭدەۋ كەزىندە ەنەرگيا شىعىنىنىڭ مينيمالدى بولۋىنا بايلانىستى ستراتەگيالىق ماڭىزدى باعىت سانالادى.

ەلىمىزدە قارا جانە ءتۇستى مەتالل سىنىقتارى مەن قالدىقتارى - 11 وتاندىق مەتاللۋرگيالىق كاسىپورىن ءۇشىن شيكىزاتتىڭ جالعىز جانە ستراتەگيالىق ءتۇرى.

بۇيرىق جوباسىندا ىشكى نارىقتى قامتاماسىز ەتۋ ماقساتىندا قازاقستان اۋماعىنان قارا مەتالل سىنىقتارىن كولىكتىڭ تەمىرجول تۇرىمەن اكەتۋگە ۋاقىتشا تىيىم سالۋ كوزدەلەدى.

ق ر ۇلتتىق ەكونوميكا ءمينيسترىنىڭ 2014 -جىلعى 29-جەلتوقسانداعى № 180 «ەلەۋلى ماڭىزدى تاۋارلاردىڭ تىزبەسىن بەكىتۋ تۋرالى» بۇيرىعىمەن ىشكى نارىقتا دەفيتسيتتىڭ الدىن الۋ ءۇشىن ورتالىق مەملەكەتتىك ورگاندار ءوز قۇزىرەتى شەگىندە ءبىرقاتار ماڭىزدى ازىق- تۇلىك نەمەسە وزگە دە تاۋارلاردى ەلدەن شىعارۋعا تىيىم سالا جانە ساندىق شەكتەۋ ەنگىزە الادى.

قارا مەتالل قالدىقتارى مەن سىنىقتارى وسى تىزىمگە كىرەدى.

وتاندىق مەتاللۋرگيا كاسىپورىندارىنىڭ قايتالاما شيكىزاتپەن تولىققاندى قامتاماسىز ەتىلۋى ەل ىشىندە سىنىق دايىنداۋ كاسىپورىندارى جينايتىن سىنىقتاردىڭ بۇكىل كولەمىن قايتا وڭدەۋگە مۇمكىندىك بەرەدى.