ەلىمىزدە وڭدەۋشى ونەركاسىپتىڭ ءوندىرىس كولەمى 25 تريلليون تەڭگەگە جەتتى
استانا. KAZINFORM - بيىل ەلىمىزدە وڭدەۋشى ونەركاسىپ ءوندىرىسىنىڭ كولەمى 2021-جىلمەن سالىستىرعاندا 7,9 تريلليون تەڭگەگە ارتتى.
- ەلدىڭ ونەركاسىپتىك ساياساتى وڭدەۋشى ونەركاسىپتى تۇراقتى دامىتۋعا باعىتتالعان. بۇل - باسەكەگە قابىلەتتى، جوعارى تەحنولوگيالىق جانە ەكسپورتقا باعىتتالعان ءونىم ءوندىرۋ كولەمىن ارتتىرۋ، سونداي- اق شيكىزات مودەلىنەن باس تارتۋ ارقىلى جۇزەگە اسىرىلادى. مەملەكەتتىك قولداۋ شارالارى، ەڭ الدىمەن، ەكونوميكانىڭ ۇزاقمەرزىمدى باسەكەگە قابىلەتتىلىگىن ايقىندايتىن، نەگىزىنەن ورتا جانە جوعارى قايتا وڭدەۋ ونىمدەرىن وندىرۋگە باعىتتالعان يندۋستريالىق-يننوۆاتسيالىق قىزمەت سۋبەكتىلەرىنە كورسەتىلەدى، - دەلىنگەن پرەمەر-مينيستر ولجاس بەكتەنوۆتىڭ دەپۋتاتتىق ساۋالعا بەرگەن جاۋابىندا.
ۇكىمەت باسشىسى كەلتىرگەن مالىمەتكە ساي، وڭدەۋ دەڭگەيى مينيستر بۇيرىعىمەن بەكىتىلگەن باعالاۋ ادىستەمەسىنە سايكەس ايقىندالادى. اتالعان ادىستەمەدە تەحنولوگيالىق كۇردەلىلىك، ەكسپورتتىق الەۋەت جانە ىشكى سۇرانىس سياقتى ولشەمشارتتار ەسكەرىلگەن.
- قولدانىلعان شارالاردىڭ ناتيجەسىندە وڭدەۋشى ونەركاسىپ ءوندىرىسىنىڭ كولەمى 2021-جىلمەن سالىستىرعاندا 7,9 تريلليون تەڭگەگە ءوستى. 2024 -جىلى سالانىڭ ناقتى كولەم يندەكسى 106,9 پايىزدى (جوسپار - 104,8 پايىز) قۇراپ، نومينالدى كولەمى 25,0 تريلليون تەڭگەگە جەتتى. نەگىزگى كاپيتالعا سالىنعان ينۆەستيتسيا كولەمى 2074,5 ميلليارد تەڭگەنى قۇرادى (2021-جىلمەن سالىستىرعاندا 34,6 پايىز). وڭدەلگەن ءونىم ەكسپورتى 28,8 ميلليارد اقش دوللارىن قۇراپ، 2021-جىلمەن سالىستىرعاندا 45,1 پايىزعا ارتتى. ستاتيستيكا دەرەكتەرىنە سايكەس، 2025-جىلعى قاڭتار-مامىر ايلارىندا قازاقستانداعى ونەركاسىپ ءوندىرىسىنىڭ يندەكسى 106,0 پايىز- دى قۇرادى. وسى كەزەڭدە جالپى سوماسى 2387,8 ميلليارد تەڭگەگە ونەركاسىپ ءونىمى ءوندىرىلدى، - دەيدى پرەمەر-مينيستر.
ەسكە سالا كەتسەك، جۋىردا وتكەن ۇكىمەت وتىرىسىندا ولجاس بەكتەنوۆ ونەركاسىپ جانە قۇرىلىس ءمينيسترى ەرسايىن ناعاسپايەۆقا مەتاللۋرگيا سالاسىنا نازار اۋدارۋىن ەسكەرتىپ، سالانىڭ دامۋ قارقىنى ءماز ەمەس دەپ سىن ايتقان ەدى.