ەلىمىزدە ەڭ تومەنگى جالاقى مولشەرى قاشان ءوسۋى مۇمكىن
استانا. KAZINFORM - ەلىمىزدە ەڭ تومەنگى جالاقى وسە مە؟ بۇل سۇراققا ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جاۋاپ بەردى.
- بىلتىر ەڭ تومەنگى جالاقى ايقىنداۋدىڭ جاڭا ادىستەمەسىن قابىلدادىق. وندا ەڭبەك ءونىمى مەن مەدياندىق جالاقىنىڭ سايكەستىگى ەسكەرىلگەن... قازىرگى كەزدە بىرنەشە ينستيتۋت وڭىرلەر مەن سالالار بويىنشا ەڭبەك ونىمدىلىگى مەن مەدياندىق ەڭبەكاقى جانە ينفلياتسيا دەڭگەيىنە قاتىستى ناقتى كورسەتكىشتەردى شىعارۋ ءۇشىن زەرتتەۋ جۇرگىزىپ جاتىر. وسىنىڭ ءبارى ەلىمىزدە ەڭ تومەنگى جالاقىنى ەسەپتەۋ كەزىندە ەسكەرىلەدى، - دەدى س. جاقىپوۆا پارلامەنت پالاتالارىنىڭ بىرلەسكەن وتىرىسى الدىندا.
وسى ورايدا تىلشىلەر ەڭ تومەنگى جالاقى قانشالىقتى كوتەرىلەتىنىن سۇرادى.
ءوز كەزەگىندە مينيستر ناقتى دەڭگەي اتالعان زەرتتەۋدەن كەيىن جاريالاناتىنىن، ياعني جىل سوڭىنا دەيىن ايقىندالاتىنىن ايتتى.
- كەلەر جىلدىڭ 1- قاڭتارىنان ەڭ تومەنگى جالاقى دەڭگەيىن كوتەرۋ ءۇشىن بۇل جۇمىستار جىل سوڭىنا دەيىن اياقتالادى، - دەدى ۆەدومستۆو باسشىسى.
ايتا كەتەيىك، ەلىمىزدە ەڭ تومەنگى جالاقى 85000 تەڭگە. بۇعان دەيىن بىلتىر كۇزدە سۆەتلانا جاقىپوۆا ەلىمىزدەگى ەڭ تومەنگى جالاقىنىڭ وسۋىنە قاتىستى تۇسىنىك بەرگەن ەدى.
سونىمەن قاتار جاقىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءماجىلىستىڭ جالپى وتىرىسىنان كەيىن ەڭ تومەنگى ايلىقتى كوتەرۋ تۋرالى دەپۋتات ۇسىنىسىنا جاۋاپ بەردى.